XLIMAKTIY TUKU TSOKGNANIKA TIMOTEO

1 Akit, Pablo, xlakata xtalakaskin Dios xʼapóstol Cristo Jesús klitaxtu chu xlakata xtamalaknun Dios xla latamat nema namakglhtinanaw xpalakata Cristo Jesús, 2 ktsokgnaniman wix, Timoteo, kinkgawasa tiku kpaxki:

Kamaxkikgon talakgalhaman nema ni anan xtachuna* chu takaksni kinTlatkan* Dios chu Malana* Jesucristo.

3 Kpaxtikatsini Dios, tiku ktlawanima xasanto taskujut chuna la tlawakgolh xalakgmakgan kinatlatni chu xaskulunku kkgalhi kintalakapastakni, chu ankgalhin klakapastakan akxni ktasaskin kkiʼoración kakuwani chu katsisni. 4 Akxni klakapastaka chuna la xtasaya, uma tlawa pi nakakxilhputunan xlakata kinaku lu napaxuwa. 5 Xlakata klakapastaka mintakanajla nema ni lakgaputiyunan, nema pulana kgalhilh minana* Loida chu mintse* Eunice, pero liwana kkatsi pi na kgalhiya uma takanajla.

6 Wa xlakata, kmalakapastakayan pi tamaskiwin* nema maxkin Dios akxni kakwilin kimakan chuntiya kamalhuwi xtachuna la xmalakgpasi lhkuyat. 7 Xlakata espíritu santo nema Dios kinkamaxkin, ni tlawa pi xapekua nawanaw, wata kinkamaxkiyan litliwakga chu tapaxkit chu tlawa pi liwana nalakapastaknanaw. 8 Wa xlakata, ni kalimaxananti akxni nalichuwinana kiMalanakan chu akit, tiku tanuma kpulachin xpalakata, wata xlakata xlitliwakga Dios katayani tapatin xpalakata xatlan tamakatsinin. 9 Xla kinkalakgmaxtun chu kinkatasanin xlakata santos nalitaxtuyaw, ni xpalakata tuku tlawayaw, wata xlakata xtalakaskin chu xtalakgalhaman nema ni anan xtachuna.* Lata makgasata Dios lakkaxwililh nakinkamaxkiyan uma talakgalhaman xpalakata Cristo Jesús, 10 pero la uku liwana tasiya xtalakgalhaman xlakata minit kiLakgmaxtunakan, Cristo Jesús, tiku laktlawalh linin chu xla kinkamasiyanin xatlan tamakatsinin xlakata nakgalhiyaw latamat chu akgtum makni nema ni masa. 11 Dios kilaksakli xlakata tlan naklichuwinan xatlan tamakatsinin chu naklitaxtu apóstol chu makgalhtawakgena.

12 Wa xlakata na klipatinama putum uma, pero ni klimaxanan. Xlakata klakgapasa ama Dios tiku kkanajlaninit chu liwana kkatsi pi tlan kuentajtlawa putum tuku kmaxkinit asta ama kilhtamaku. 13 Chuntiya akgtum liʼakxilhtit kalimaxtu tachuwin nema makgtayanankgo, nema akit klitachuwinanitan chu chuntiya kalimasiya mintakanajla chu mintapaxkit chuna la tlawa tiku akxtum tawi Cristo Jesús. 14 Kuentajkatlawa uma tuku lhuwa xtapalh nema lakgayawakanita xpalakata espíritu santo nema akinin kgalhiyaw.

15 Wix katsiya uma, pi putum lakchixkuwin kxlikalanka Asia kintamakgatlinikgonit, nachuna Figelo chu Hermógenes. 16 Malana kalimasiyanilh talakgalhaman tiku xalak xchik Onesíforo xlakata xla makglhuwa tlan kimamakgkatsinilh chu ni kilimaxanalh xlakata ktanuma kpulachin. 17 Wata lu liwana kimputsalh chu kintekgsli akxni xla xwi kRoma. 18 Malana Jehová kalimasiyanilh talakgalhaman ama kilhtamaku. Chu wix liwana katsiya putum tuku tlawalh kimpalakata anta kʼÉfeso.

2 Wa xlakata, kinkgawasa, wix chuntiya kalitatliwakglhti talakgalhaman nema ni anan xtachuna* nema limasiya Cristo Jesús; 2 chu tuku akit klitachuwinan nema lhuwa tiku kgalhmakgtayakgolh, uma kakamasiyani lakchixkuwin tiku tlan kalipawankan chu xlakan liwana nakatsinikgo xlakata na nakamasiyanikgo amakgapitsin. 3 Chuna la xatlan ksoldado Cristo Jesús, katayani tapatin. 4 Tiku soldado litaxtu ni makgtanu* kʼatanu taskujut xlakata naputsa tuku namaklakaskin kxlatamat, xlakata makgapaxuwaputun tiku soldado limaxtulh. 5 Nachuna, putum tiku makgkgamanan, ni katimaxkika xcorona komo ni kgamanalh chuna la xlakkaxwilikanit takgaman. 6 Xlilat pi chatum chanana tiku palha skuja, wa pulana naway tuku makgalalh kxpukuxtu. 7 Ankgalhin kalilakpuwanti tuku kwaniman; Malana* namaʼakgatekgsniyan putum uma.

8 Kalakapastakti pi Jesucristo tiku xminacha kxfamilia David,* malakastakwanika kkalinin; wa uma xatlan tamakatsinin nema akit klichuwinan, 9 chu xpalakata uma kpatinama chu ktanuma kpulachin chuna la chatum kgalhana. Pero xtachuwin Dios ni lichikanit cadenas. 10 Wa xlakata chuntiya ktayanima putum taʼakglhuwit kaj xlakata tiku kalaksakkanit, xlakata xlakan na nakalakgmaxtukan xpalakata Cristo Jesús chu nakgalhikgo kakni putum kilhtamaku. 11 Uma tachuwin lakgchan nakanajlaniyaw: komo akxtum naniyaw, nachuna akxtum nalatamayaw; 12 komo chuntiya tayaniyaw, nachuna makxtum namapakgsinanaw chuna la mapakgsinanin; komo wanaw pi ni lakgapasaw, xla na nawan pi ni kinkalakgapasan; 13 komo ni namakgantaxtiyaw tuku malaknuyaw, xla chuntiya namakgantaxti tuku malaknunit xlakata nila xʼakstu lakgmakgankan.

14 Chuntiya kakamalakapastakni putum uma, kakalistakyawa* kxlakatin Dios pi ni kalalitalatlawalh tachuwin, xlakata uma nitu litaxtu, wata kalaktlawa* tiku kgaxmatkgo. 15 Lu kaliskujti xlakata Dios tlan naʼakxilhan, chatum skujni tiku ni limaxanan taskujut nema tlawanit, tiku liwana maklakaskin xTachuwin Dios.* 16 Pero kalakgmakganti takgalhchuwin nema nitu litaxtu nema ni maxki kakni Dios, xlakata uma natlawa pi tlakg natamakgatlinikan Dios, 17 chu xtachuwinkan natalakgatumi xtachuna tsitsi nema mamasa liwa. Himeneo chu Fileto na makgtanumakgo tiku chuna tlawakgo. 18 Umakgolh lakchixkuwin makgxtakgkgonit xaxlikana tamasiy chu wankgo pi makgapitsi latamanin kamalakastakwanikanita chu makgapitsi kalaktlawanikgonit xtakanajlakan. 19 Maski chuna, tliwakga xkilhtsukut Dios lan wi chu wa uma tuku talhkatawilaninit: «Jehová kalakgapasa tiku tapakgsinikgo» chu «Putum tiku lipawan xtukuwani Jehová xlimakgxtakgat tuku ni xaʼakgstitum».

20 Chuna la katsiya, kʼakgtum lanka chiki ni kajwatiya anan vasos xla oro chu xla plata, na anan xla kiwi chu xla tiyat, chu makgapitsi kamaklakaskinkan xlakata natlawakan tuku xlakaskinka pero amakgapitsi xlakata nalitlawakan tuku limaxana. 21 Wa xlakata, putum tiku katamakgatlini vasos nema limaxana chuna la kalimaklakaskinkan, nalitaxtu chuna la vasos* nema kalimaklakaskinkan xlakata natlawakan tuku xlakaskinka; xasanto nalitaxtu, lu tlan vaso naliʼakxilha xmalana chu tlan nalimaklakaskinkan xlakata natlawakan putum xatlan taskujut. 22 Wa xlakata, katsalani tuku lu tlawaputunkgo tiku lakgkgawasanku chu laktsumanku, pero chuntiya kastalani tuku xaʼakgstitum, takanajla, tapaxkit chu takaksni. Akxtum kakatatlawa uma, amakgapitsi tiku lipawankgo Malana chu kgalhikgo xatlan naku.

23 Nachuna, kalakgmakganti takgalhchuwin nema nitu litaxtu, xlakata katsiya pi latalatlawat kikgantaxtu. 24 Xlakata kskujni Malana ni talakaskin natalachipanan, wata tlan nakalikatsini putum latamanin, liwana xlikatsinit chuna la namasiya, ni natamakgapuspita akxni wi tiku natlawani tuku nitlan, 25 nalimasiya pi kgalhi tsatata naku akxni nakastakyawa tiku ni matlanikgo tuku kamasiyani. Max Dios nakamaxki talakaskin namakgxtakgkgo tuku nitlan tlawamakgolh* xlakata liwana nalakgapaskgo xaxlikana, 26 tlan nalakapastaknankgo chu natsalanikgo Akgskgawini, xlakata xla xastakna kachipanit xlakata natlawakgo xtalakaskin.

3 Pero klakaskin kakatsi pi kxaʼawatiya kilhtamaku, tuku natitaxtukan lu tuwa nawan chu lu kalipekua nawan. 2 Xlakata lakchixkuwin xʼakstukan nakapaxkikan, napaxkikgo tumin, nawankgo pi xlakaskinka litaxtukgo, ni nataktujukgo,* lixkajni nalichuwinankgo Dios chu latamanin, ni nakakgalhakgaxmatkgo xnatlatnikan,* ni napaxtikatsininankgo, nakamakgxtakgkgo amakgapitsi latamanin,* 3 ni katilapaxkikgolh kfamilia, nila wi tuku nakatalakkaxlakan, nalimawakanankgo tuku nitlan, ni namachokgokgo tuku tlawaputunkgo, xalakluku nawankgo, ni napaxkikgo tuku tlan, 4 nakatlawanikgo tuku nitlan xʼamigos, laktsakatni nawankgo, lanka nakamakgkatsikan, kajwatiya napaxkikgo tuku nalipaxuwakgo chu ni wa napaxkikgo Dios, 5 kxlakatinkan amakgapitsin nalimasiyakgo pi kakninanikgo Dios, pero ni nalilatamakgo chuna la skin xtakakninkan; chu wix katamakgatlinikgo tiku chuna likatsikgo. 6 Kxlakgstipankan umakgolh taxtukgoyacha akgskgawinanin lakchixkuwin tiku limaklakaskinkgo taʼakgskgawin xlakata natanukgoyacha kxchikkan lakpuskatin tiku xaxlajwananin chu kgalhikgo lhuwa talakgalhin, umakgolh lakpuskatin kamakgatlaja tuku lu tlawaputunkgo, 7 tiku putum kilhtamaku katsinimakgolh pero nikxni liwana akgatekgskgo* tuku xaxlikana.

8 Chuna la Janes chu Jambres lakatakikgolh Moisés, nachuna umakgolh lakchixkuwin lakatakimakgolh xaxlikana. Umakgolh lakchixkuwin lu talakglakgalhikgonit xtalakapastaknikan chu Dios nitlan kaʼakxilha, xlakata lakatayakgo takanajla. 9 Pero ni makgat katichankgolh xlakata putum naʼakxilhkgo pi xalaktontos* chuna la kaʼakgspulalh Janes chu Jambres. 10 Pero wix liwana stalaninita kintamasiy chu chuna la klin kilatamat chu tuku kmakgantaxtiputun chu akxilhnita kintakanajla, chuna la kkgalhkgalhinan, kintapaxkit, chuna la ktayaninit, 11 nachuna taputsastalanit chu tapatin nema ktitaxtulh kʼAntioquía, kʼIconio, kListra. Xliputum umakgolh taputsastalanit ktayanilh chu Malana* kilakgmaxtulh. 12 Nachuna, putum tiku kakninaniputunkgo Dios kxlatamatkan chuna la kstalaninanin Cristo Jesús, na nakaputsastalanikan. 13 Pero lakchixkuwin tiku lixkajni likatsikgo chu akgskgawinankgo tlakg nitlan nalikatsikgo, naʼakgskgawinankgo chu xlakan na nakaʼakgskgawikan.

14 Pero wix chuntiya kakanajla tuku masiyanikanti chu makanajlikanti. Wix katsiya tiku masiyanikgon, 15 chu katsiya pi lata lakachinita lakgapasnita xasanto tatsokgni nema skgalala natlawayan. Uma liskgalala nalakgmaxtuyan xpalakata kanajlaniya Cristo Jesús. 16 Wa Dios masta putum tuku tatsokgnit kxaSanto Tatsokgni. Makgtayanan xlakata nakamasiyanikan latamanin, xlakata nakinkawaniyan tuku nitlan tlawamaw, xlakata putum lakatitum nawilikan* chu xlakata nakinkamasiyaniyan natlawayaw tuku xaʼakgstitum, 17 xlakata kskujni Dios liwana nakatsini chuna la natlawa akgtum taskujut, liwana takaxnit nawan xlakata natlawa putum xatlan taskujut.

4 Cristo Jesús nakalakputsanani tiku staknankgo chu tiku nikgonita akxni xla liwana natasiya chu akxni mapakgsinama nawan. Klimapakgsiyan kxlakatin Cristo Jesús chu kxlakatin Dios: 2 xatapaxuwan kalichuwinanti xtachuwin Dios, akxni tlan wi kilhtamaku chu akxni katuwa wi kilhtamaku; kawanti tuku nitlan tatlawama, palha kastakyawananti, kamasta tastakyaw, akxni chuna natlawaya ni lakapala nasitsiya chu liwana kamasiya. 3 Xlakata ama min kilhtamaku akxni ni katikgaxmatputunkgolh xatlan tamasiy,* wata xlakan natlawakgo tuku nalakaskinkgo chu namamakxtumikgo makgalhtawakgenanin tiku kajwatiya nawankgo tuku xlakan kgaxmatputunkgo. 4 Xlakan nialh katikgaxmatkgolh tuku xaxlikana chu kajwatiya nakgaxmatkgo cuentos.* 5 Wa xlakata, wix, liwana kalimaklakaskinti mintalakapastakni, putum kilhtamaku katayani tuku nitlan natitaxtuya, kalichuwinanti xatlan tamakatsinin, liwana kaskujnani Dios.

6 Kixtakgamakgamaka xtachuna la tamakamastan xla vino kxkgalhni tamakamastan, kilinin talakatsuwinita. 7 Ktlawanit putum tuku kmatlanilh kxtaskujut Dios, na kmasputunit uma takgosni,* chuntiya kkanajlani Dios. 8 Lata uma kilhtamaku, Malana,* tiku xaʼakgstitum lakputsanan, kimakgataxtininit akgtum corona. Uma corona wa kalakgchan tiku xa’akgstitum. Nakimaxki chuna la akgtum tatlaja ama kilhtamaku. Ni kajwatiya akit nakimaxki, nachuna tiku kgalhkgalhimakgolh kilhtamaku akxni natasiya.

9 Lu kaliskujti xlakata lakapala nakilakgtana. 10 Xlakata Demas kiʼakgxtakgwililh xlakata paxkilh uma kakilhtamaku,* chu alh kTesalónica; Crescente alh kʼGalacia chu Tito alh kDalmacia. 11 Kajwatiya Lucas kintatamakgxtakgnit. Kalita Marcos, xlakata lu nakimakgtaya chuna la kskujnanima Dios. 12 Pero Tíquico kmalakgachanit kʼÉfeso. 13 Akxni natana, kalita lhakgat tuku klitamakgtlapa klonkgni, nema kmakgxtakgcha kTroas kxchik Carpo, na kakalita rollos, tlakg liwaka xuwa nema lakkaxtlawakanit niku naktsokgnan.

14 Alejandro tiku liskuja cobre lhuwa tuku nitlan kintlawanilh. Jehová nalimalakgaxokge tuku nitlan tlawalh. 15 Wix na kuentajkatlawa xlakata nitu natlawaniyan, xla lu lakatitayalh tuku klichuwinanaw.

16 Akxni xapulana xaktakgalhmakgtayama kxlakatin mapakgsinanin, niti milh kinkgalhmakgtaya, wata putum kiʼakgxtakgwilikgolh, Dios ni kakaliyawalh uma. 17 Pero Malana kimakgtayalh chu kimaxkilh litliwakga, xlakata tlan lakgatum xaklichuwinalh xatlan tamakatsinin chu putum laklanka kachikinin xkgaxmatkgolh; Malana kilakgmaxtulh kxkilhni león. 18 Malana nakilakgmaxtu xliputum tuku nitlan chu nakinkuentajtlawa xlakata naktamapakgsinan kʼakgapun. Wa putum kilhtamaku kamaxkika kakni. Chuna kalalh.

19 Kamaxki kintamakgachipat Prisca chu Áquila chu tiku xalak xchik Onesíforo.

20 Erasto tamakgxtakgcha kCorinto, pero kmakgxtakgli Trófimo anta kMileto xlakata tatatlalh. 21 Nalakapalaya xlakata nachitana akxni ninaj min lonkgni.

Eubulo malakgachaniyan xtamakgachipat chu nachuna Pudente chu Lino chu Claudia chu putum natalanin.

22 Kskin pi Malana katatawi xatlan mintalakapastaknikan chu kakamaxkin xtalakgalhaman nema ni anan xtachuna.*