TUKU TSOKGLI SANTIAGO

1 Akit, Santiago, kskujni Dios chu Malana* Jesucristo, kkamalakgachaniyan tamakgachipat putum wixin akgkutiy laklanka familias nema lakgatum wilatit.

2 Natalan,* kalipaxuwatit akxni tipalhuwa tuku nakaliʼakxilhkanatit, 3 chuna la wixin katsiyatit, akxni mintakanajlakan tatalakastuka umakgolh taʼakglhuwit chu tlan kitaxtuni, ama kilhtamaku katsiniyatit tayaniyatit. 4 Chu xlakata lu natayanitilhayatit liwana nakatsiniyatit, xlakata xatakgatsin nawanatit chu putum tlan natlawayatit, chu nitu nakatsankganiyan.

5 Wa xlakata, komo wi tiku tsankgani liskgalala, xlilat chuntiya naskini Dios, chu namakglhtinan xlakata Dios putum xatapaxuwan kamaxki chu ni katisitsinilh* tiku skinima. 6 Pero kakgalhilh takanajla akxni chuntiya naskin, liwana kakanajlalh pi namakglhtinan, xlakata tiku ni liwana kanajla xtachuna la akgtum xtakgayawana pupunu nema snokglin un chu lakatum lakatum makankan. 7 Xlikana, ni xlilat pi uma chixku nalakpuwan pi Jehová wi tuku namaxki. 8 Uma chixku ni katsi tuku nalaksaka, chu putum kilhtamaku lakgpali xtiji.

9 Pero tala tiku ni lhuwa tuku kgalhi, kapaxuwalh* xlakata malankikanit, 10 chu tiku lhuwa tuku kgalhi kapaxuwalh xlakata maʼaktujukanit, xlakata tiku lhuwa tuku kgalhi nalakgsputa chuna la kgantum xanat xalak pukuxtu. 11 Xlakata chichini taxtu chu tliwakga lhkakna maxnakge tuwan; wa xlakata xanat yujtamakgan chu chuna la lilakgatit xtasiya lakgsputa. Nachuna nalakgsputa tiku lhuwa tuku kgalhi xlakata lu putsastalanima tuku lhuwa xtapalh.

12 Paxuwa ama chixku tiku tayani akxni titaxtuma tuku tuwa, xlakata akxni Dios tlan naʼakxilha, namakglhtinan tatlaja* xla latamat, nema Jehová kamalaknunilh tiku chuntiya paxkikgo. 13 Akxni wi tiku titaxtuma tuku tuwa, ni nawan: «Dios kiliʼakxilhma». Xlakata chatum lataman nila limaklakaskin tuku nitlan xlakata naliʼakxilha Dios chu Dios ni liʼakxilhnan tuku nitlan. 14 Pero tuku chatunu chatunu lu lakgati litaxtuni chuna la liʼakgsiyat.* 15 Alistalh, akxni xtalakgatin lu tatliwakglha, tlawa pi uma lataman nalakgalhinan chu uma talakgalhin linan klinin.

16 Natalan tiku lu kkapaxkiyan, ni miʼakstukan kakaliʼakgskgawikantit mintalakapastaknikan.* 17 Putum xatlan chu nema xalaktlan tamaskiwin* minacha kʼakgapun. Masta xMalakatsukina xkgakganat xalak akgapun chu xla ni talakgpali chuna la talakgpali mastilenkg. 18 Xla kinkamaxkin latamat akxni kanajlaw xtachuwin nema xaxlikana, xlakata chuna xlakaskin, xlakata xlitaxtuw xapulana tiku kalaksakli xliputum tiku kamalakatsukilh.

19 Klakaskin kakatsitit, natalan tiku lu kkapaxkiyan, pi putum wixin xlilat lakapala nakgaxpatatit, pero ni lakapala natsukuyatit chuwinanatit chu ni lakapala nasitsiyatit, 20 xlakata xtasitsi chixku ni makgantaxti tuku xaʼakgstitum nema Dios skin. 21 Wa xlakata, kalakgmakgantit putum tuku xataxkajwani chu putum tuku nitlan nema kgalhiyatitku, chu kalimasiyatit pi kgalhiyatit tsatata naku akxni namakgamakglhtinanatit xtachuwin Dios chu kamastatit talakaskin pi tliwakga kachipaxnalh kminakujkan, xlakata wa uma tuku tlan kalakgmaxtuyan.

22 Pero kamakgantaxtitit xtachuwin Dios chu ni kajwatiya kakgaxpattit, ni miʼakstukan kalitaʼakgskgawitit ni xaxlikana mintalakapastaknikan. 23 Xlakata, komo wi tiku kgaxmata xtachuwin Dios pero ni makgantaxti, litaxtu xtachuna chatum chixku tiku lakaʼakxilhkan kʼespejo: 24 lakaʼakxilhkan, chu akxni talakapanu lakapala patsankga* chuna la lakawan. 25 Pero tiku liwana lakputsanani limapakgsin nema xatakgatsin chu masta lakgtaxtut, chu chuntiya makgantaxti uma limapakgsin, litaxtunit chatum tiku makgantaxti xtachuwin Dios, nichuna la tiku kaj kgaxmatli chu patsankgalh;* chu nalipaxuwa putum tuku natlawa.

26 Komo wi tiku lakpuwan pi kakninani Dios* pero ni katsini mapakgsi* ksimakgat, akgskgawima xnaku chu takaknin nema maxkima Dios nitu litaxtu. 27 Wa uma takaknin nema kinTlatkan* Dios akxilha pi skulunku chu ni taxkajwaninit: nakakuentajtlawayaw akxni titaxtumakgolh tuku tuwa tiku ni kgalhikgo xnatlatnikan chu tiku nikgonita xchixkukan chu ni nalixkajwananaw kakilhtamaku.

2 Kinatalan, ¿akxtum tlawaputunatit talaksakpaxkin chu takanajla nema kgalhiniyatit kiMalanakan* Jesucristo tiku kgalhi lhuwa kakni? 2 Komo chatum chixku tiku tamakganunit anillo xla oro chu lu stlan klhakgat tanuyacha kmintamakxtumitkan chu nachuna tiku ni lhuwa tuku kgalhi chu taxkajwaninit klhakgat, 3 ¿tlakg tlan likatsiniyatit tiku stlan lhakgananit chu waniyatit «Unu katawila niku tlakg xatlan», pero tiku ni lhuwa tuku kgalhi waniyatit «Wix kaj kataya» o «Katawila katutsu»? 4 Komo chuna tlawapatit, chatum lataman tlakg xlakaskinka liʼakxilhatit nixawa achatum chu litaxtuyatit jueces tiku tlawakgo tuku nitlan.

5 Kakgaxpattit, kinatalan tiku lu kkapaxkiyan. ¿Ni kalaksakli Dios tiku ni lhuwa tuku kgalhikgo kkakilhtamaku xlakata nakgalhikgo lhuwa takanajla? Chuna, wa uma tiku kalaksakli xlakata namakglhtinankgo Tamapakgsin nema kamalaknunilh tiku paxkikgo. 6 Pero wixin kalakgmakganitantit tiku ni lhuwa tuku kgalhikgo. ¿Ni wa tiku lhuwa tuku kgalhikgo kamakgapatinankgoyan chu kaxwatalinkgoyan kxlakatinkan jueces? 7 ¿Ni lixkajni lichuwinankgo tlakg xatlan xtukuwani tiku tapakgsiniyatit? 8 Wa xlakata, lu tlan tuku tlawapatit komo wixin makgantaxtiyatit limapakgsin nema ni anan xtachuna,* chuna la wan tatsokgni: «Milipaxkit mintalataman chuna la miʼakstu paxkikana». 9 Pero komo chuntiya laksakpaxkinanatit, tlawapatit talakgalhin chu limapakgsin liwana limasiya* pi wixin lipinatit kuenta.

10 Wa xlakata, komo wi tiku kgalhakgaxmata putum Limapakgsin, pero ni makgantaxti maski kaj pulaktum tuku min klimapakgsin, lakatsalanit putum Limapakgsin. 11 Xlakata Dios tiku wa: «Ni militatalakgxtumit tiku ni wa tamakgaxtokga» na wa «ni milimakgninat». Chu maski ni tatalakgxtupiya tiku ni wa tamakgaxtokga pero makgninana, lipina kuenta xlakata lakatsalapat limapakgsin. 12 Chuntiya kachuwinantit chu kalikatsitit chuna la tlawakgo tiku nakalilakputsananikan limapakgsin nema kamalakgtaxti latamanin. 13 Xlakata tiku ni lakgalhamanan na ni katilakgalhamanka akxni nalakputsananikan. Lakgalhamanankan tlakg tlan nixawa lakputsanankan.

14 Kinatalan, ¿tuku tlan nakitaxtuni tiku nawan pi kgalhi takanajla pero ni kgalhi laktlan tatlaw? Uma takanajla nila nalakgmaxtu, ¿ni xlikana? 15 Komo chatum tala* chixku o chatum tala puskat tsankganima lhakgat* chu ni kgalhi xliwat xala chali chali, 16 chu maski chuna, makgapitsi wixin waniyatit «Kapit chu nitu kalilakgaputsa, katsitsijwanti chu tlan kawayanti», pero ni maxkiyatit tuku maklakaskin xlakata xmakni, ¿litamakgtaya uma? 17 Nachuna xlakata takanajla; komo ni tlawayaw laktlan tatlaw, kintakanajlakan ninit.

18 Pero wi tiku nawan: «Wix kgalhiya takanajla, chu akit kkgalhi laktlan tatlaw. ¿La tlan nalimasiyaya takanajla komo ni tlawaya laktlan tatlaw? Nakmasiyaniyan kintakanajla xlakata ktlawa laktlan tatlaw». 19 Wix kanajlaya pi wi chatum Dios, ¿ni xlikana? Lu tlan pi chuna tlawaya. Pero asta demonios na kanajlakgo chu lhpipikgo. 20 Chixku xatonto,* ¿ni katsiya pi takanajla nema ni kgalhi laktlan tatlaw nitu litaxtu? 21 ¿Ni xlikana pi xaʼakgstitum liʼakxilhka kintlatkan* Abrahán xlakata tuku tlawalh? Chuna, xaʼakgstitum liʼakxilhka akxni xmawakanita kpumakamastan xkgawasa, Isaac. 22 Akxilhti pi xtakanajla litasiyalh xlakata tuku tlawalh chu xlakata tuku tlawalh liwana limasiyalh pi xlikana xkgalhi takanajla.* 23 Chuna kgantaxtulh Tatsokgni nema wan: «Xaʼakgstitum liʼakxilhka Abrahán xlakata kanajlanilh Jehová», chu Jehová wa pi xʼamigo xliʼakxilha.

24 Akxilhatit pi chatum lataman xaʼakgstitum liʼakxilhkan xlakata xalaktlan xtatlaw chu ni kajwatiya xlakata xtakanajla. 25 Nachuna, ¿ni xlikana pi xaʼakgstitum liʼakxilhka Rahab, tiku ksta xmakni, xlakata laktlan xtatlaw akxni xkamakgtayanita skgalananin chu xkamalakgachanita kʼatanu tiji? 26 Xlikana, chuna la akgtum makni nema ni kgalhi latamat* xanin litaxtu, nachuna kitaxtu xlakata kintakanajlakan, komo ni kgalhi laktlan tatlaw xtachuna la xanin.

3 Kinatalan, ni lhuwa wixin makgalhtawakgenanin miliwanatkan, xlakata katsiyatit pi akinin tlakg palha nakinkalakputsananikanan. 2 Xlakata putum makglhuwa akgchakgxaw.* Tiku ni wan tuku nitlan, uma chixku ni kgalhi talakgalhin chu tlan machokgo putum xmakni. 3 Akxni kamakgalhnuyaw xfrenos kawayu xlakata nakinkakgalhakgaxmatkgoyan, tlan mapakgsiyaw putum xmakni. 4 Na kakaʼakxilhtit barcos: maski lu laklanka chu tliwakga un kasnokglinkgo, kaj aktsu tuku limatlawanikan chu an anta niku lakaskin tiku matlawanima.

5 Nachuna xlakata simakgat: maski kaj aktsu uma xtatakgatsin makni, pero liwanaw tuku litlankajwananaw. Kaʼakxilhtit pi maski kaj aktsu lhkuyat tlan malakgpasiwili lanka kakiwin. 6 Simakgat xtachuna lhkuyat. Uma xtatakgatsin makni tlawa tuku nitlan chu maxkajwani putum makni. Chu tlan laktlawa putum xlatamat chatum lataman chu xtachuna la Gehena,* xlakata malakgsputunan. 7 Xlakata tipalhuwa xalakluku animales, animales nema kgoskgo, luwa chu sluluk chu animales nema xalak chuchut tlan kamamansojlikan chu latamanin kamamansojlikgonit. 8 Pero ni anan chatum lataman tiku tlan mamansojli simakgat. Nila mapakgsikan chu tlawaninan tuku nitlan; litsama veneno nema makgninan. 9 Limaklakaskinaw xlakata nalimalankiyaw kinTlatkan* Jehová, pero na limaklakaskinaw akxni kawaniyaw laklixkajni tachuwin latamanin tiku katlawakanit «xtachuna la Dios». 10 Kkinkilhnikan taxtu tasikulunalin chu laklixkajni tachuwin.

Kinatalan, uma nichuna xlikgantaxtut. 11 ¿Pi kawa akxtum taxtukgo xasakgsi chu xaxun chuchut kʼakgtum taxtunu?* 12 Kinatalan, kxakiwi higos nila tawaka aceitunas chu kxakiwi uvas nila tawaka higos, ¿ni xlikana? Nachuna, niku taxtu xaskgokgo chuchut nila nataxtu xasakgsi chuchut.

13 Kmilakgstipankan, ¿wi chatum tiku skgalala? Komo chuna, kalimasiyalh pi skgalala chuna la tlan lima xlatamat, chu putum tuku tlawa kalimasiyalh pi kgalhi tsatata naku nema lakatsukuyacha kxaxlikana liskgalala. 14 Pero, komo wixin lu lalakgsitsiyatit chu kminakujkan taxtuyacha nalatalatlawayatit, ni lanka kakalimakgkatsikantit miliskgalalakan, komo lanka xkalimakgkatsikantit uma akgtum taʼakgsanin xlitaxtulh. 15 Uma liskgalala ni wa nema minacha kʼakgapun; wata wa xalak kakilhtamaku, wata wa xliskgalalakan tiku tlawakgo tuku lakaskin xmaknikan, xliskgalalakan demonios. 16 Xlakata niku lasitsinikan chu latalatlawakan nachuna anan tuku akglakgwa wilakgolh chu tipalhuwa tuku nitlan.

17 Pero liskgalala nema minacha kʼakgapun tlawa pi chatum lataman nakgalhi akgtum xaskulunku xnaku, kakswa nawan chu tlan nalakapastaknan, tunkun nakgalhakgaxmatnamputun chu lu nalakgalhamaninan chu namatlawi laktlan tatlaw, ni nalaksakpaxkinan chu ni nalakgaputiyunan. 18 Nachuna, latamanin tiku tlan katalalinkgo amakgapitsin malakgatumikgo takaksni chu chuna tlawakgo tuku xaʼakgstitum.

4 ¿Niku lakatsukuyacha guerras chu latalachipat nema kgalhiyatit? ¿Ni wa malakatsukikgo xtalakgatin xamakglakgalhina mimaknikan nema lu talatlawanankgo xlakata namakgatlajakgo mimaknikan?* 2 Wixin wi tuku lu kgalhiputunatit, pero ni kgalhiyatit. Chuntiya makgninampatit chu lakgatipatit tuku tapakgsini achatum, pero chuntiya ni kgalhiyatit tuku lakaskinatit. Chuntiya talachipanampatit chu xtachuna la xtlawatit guerra. Ni kgalhiyatit xlakata ni skinatit. 3 Chu maski skinatit ni makglhtinanatit, xlakata kaj litlawaputunatit tuku nitlan chu xlakata natlawayatit xtalakgatin xamakglakgalhina mimaknikan.

4 Wixin tiku makgxtakgnitantit Dios, ¿ni katsiyatit pi akxni tlan talalinkan kakilhtamaku xtalamakgasitsin Dios litaxtukan? Wa xlakata, putum tiku tlan talalimputun kakilhtamaku xtalamakgasitsin Dios litaxtuma. 5 ¿O lakpuwanatit pi nitu litaxtu tatsokgni akxni wan: «Kinakujkan nema tlawa pi nalakgkatsalakanaw, tlawa pi tipalhuwa tuku lu nakgalhiputunaw»? 6 Pero talakgalhaman nema ni anan xtachuna* nema xla limasiya makgatlaja uma tayat. Wa xlakata Tatsokgni wan: «Dios kalakatayani* tiku lanka kamakgkatsikan, pero kalimasiyani talakgalhaman nema ni anan xtachuna tiku taktujukgo».*

7 Wa xlakata, kakgalhakgaxpattit Dios, pero kalakatayanitit* Akgskgawini, chu xla nakatsalaniyan. 8 Katalakatsuwinitit Dios, chu xla nakatalakatsuwiniyan. Kamaskulunkitit mimakankan, wixin lakgalhinanin, chu kamaskulunkitit minakujkan, wixin tiku ni liwana kanajlayatit. 9 Lu katalakgaputsitit chu katasatit. Ni xlilat nalitsinatit, wata militasatkan. Ni xlilat napaxuwayatit, wata kalilakgaputsatit. 10 Katataktujutit kxlakatin Jehová, chu xla nakamalankiyan.

11 Natalan, nialh nitlan kalalichuwinantit. Putum tiku nitlan lichuwinan xtala* o lakputsanani xtala, nitlan lichuwinan limapakgsin chu lakputsanani limapakgsin. Chu komo wix lakputsananiya limapakgsin, juez litaxtuya chu nialh xmakgantaxtina limapakgsin. 12 Kajwatiya Dios xMastana limapakgsin chu Juez: kajwatiya xla tlan lakgmaxtu o malakgsputu chatum lataman. Pero wix, ¿tiku litaxtuya xlakata nalakputsananiya mintalataman?

13 Uku kakgaxpattit, wixin tiku wanatit «Uku o chali naʼanaw kʼama kachikin chu anta natawilayaw akgtum kata, katuwa tuku naliskujaw chu natlajayaw tumin», 14 pero wixin ni katsiyatit tuku nakaʼakgspulayan chali. Xlakata milatamatkan xtachuna puklhni* nema tasiya kaj puntsu chu alistalh lakgsputa. 15 Pero wixin miliwanatkan «Komo Jehová nalakaskin, nalatamayaw chu natlawayaw uma chu atanu». 16 Pero uku, wixin lanka kamakgkatsikanatit chu litlankajwananatit xlakata tuku tlawayatit. Lu nitlan pi chuna tlawapatit. 17 Wa xlakata, komo wi tiku katsi tlawa tuku xlilat pero ni tlawa, lakgalhinamaja.

5 Chu kakgaxpattit wixin tiku lhuwa tuku kgalhiyatit; katasatit chu kalakgaputsatit xlakata tuku nitlan nakalakgminan. 2 Tuku kgalhiyatit nema lhuwa xtapalh maskgonita chu milhakgatkan wakgonita xaluwa. 3 Miʼorojkan chu mimplatajkan tsulutlanit,* chu uma tuku tsulutlanit nalimasiya pi wixin lipinatit kuenta chu nawakgo mimaknikan. Tuku maʼakgstokgwilinitantit nema lhuwa xtapalh xtachuna lhkuyat nalitaxtu kxaʼawatiya kilhtamaku. 4 Kakgaxpattit, chuntiya pixlanka katasamakgolh* tiku makikgolh mintachanankan kmimpukuxtukan, xlakata wixin ni kaxokgoninitantit xtaskgawkan, chu Jehová tiku kamapakgsi ángeles kgaxmatnit chuna la pixlanka skimakgolh tamakgtay. 5 Wixin lhuwa tuku kgalhinitantit chu kajwatiya putsanitantit tuku nalipaxuwayatit kkatiyatni. Litaxtuyatit chuna la animales nema kamawikan chu kamakgonokan asta akxni lakgchan nakamakgnikan. 6 Lakputsaninitantit chu makgninitantit tiku xaʼakgstitum likatsi. Wa xlakata xla kalakatakiyan.*

7 Wa xlakata, natalan, kakgalhkgalhitit asta akxni kinkatawilan nawan Malana.* Kaʼakxilhtit, chatum chanana chuntiya kgalhkgalhi akxni katiyatni namakgala tachanan asta akxni kaj tsinu min chu akxni lu lhuwa min sen. 8 Wixin na kakgalhkgalhinantit; kamatliwakglhtit minakujkan, xlakata talakatsuwinita akxni kinkatawilan nawan Malana.

9 Ni kalasitsinitit,* natalan, xlakata ni nakalakputsananikanatit. Kaʼakxilhtit, Juez nialh makgas namin.* 10 Natalan, kakaʼakxilhtit palakachuwinanin tiku chuwinankgolh kxtukuwani Jehová chu kastalanitit xliʼakxilhtitkan chuna la xlakan tayanikgolh tapatin chu kgalhkgalhinankgolh. 11 Kaʼakxilhtit, kwanaw pi lu paxuwakgo* tiku tayanikgonit tapatin. Wixin kgaxpatnitantit chuna la Job tayanilh chu katsinitantit chuna la Jehová sikulunatlawalh, chuna likatsiyatit pi Jehová lu xapaxkina chu xalakgalhamana.

12 Kinatalan, wa tuku xlakaskinka, nialh kalikilhpitit akgapun o katiyatni chu nialhtu kamalaknutit. Wata komo nawanatit “tlan”,* kamakgantaxtitit; pero komo nawanatit “ni”,* na kamakgantaxtitit, xlakata ni nakalakputsananikanatit.

13 ¿Wi kmilakgstipankan tiku patinama? Chuntiya katlawalh oración. ¿Wi tiku tapaxuwan wi? Kakilhtlilh salmos. 14 ¿Wi tiku tatatla kmilakgstipankan? Kakatasanilh lakgkgolotsin xalak congregación chu xlakan natlawakgo oración xpalakata akxni naʼakmawakakgo aceite kxtukuwani Jehová. 15 Chu oración nema xliputum takanajla tlawakan, natlawa pi tiku tatatla* natatlani, chu Jehová namatliwakglha. Nachuna, komo lakgalhinanit, Dios natapati.

16 Wa xlakata, kalawanitit mintalakgalhinkan chu kalapalakaskintit kʼoración, xlakata natatlaniyatit. Xʼoración chatum tiku akgstitum likatsi kgalhi lhuwa litliwakga chu tlan kamakgtaya latamanin.* 17 Elías nachuna xmakgkatsi chuna la akinin, pero akxni tlawalh oración xliputum xnaku xlakata ni ksenalh, ni senalh akgtutu kata aitat kkatiyatni. 18 Chu alistalh, tlawapa oración chu senalh chu katiyatni makgalanalh.

19 Kinatalan, komo wi tiku kmilakgstipankan maʼakgtsankgayawakan kxaxlikana takanajla chu atanu tlawa pi kataspitpa, 20 kakatsitit pi putum tiku tlawa pi chatum lataman namakgxtakga ni xatlan xtiji, lakgmaxtuma kkalinin chu na makgtayama xlakata Dios natapati xtalakgalhin.