Watchtower BIBLIOTECA KʼINTERNET
Watchtower
BIBLIOTECA KʼINTERNET
Totonaco
  • BIBLIA
  • LIKGALHTAWAKGA
  • TAMAKXTUMIT
  • nwt 1 Pedro 1:1-5:14
  • 1 Pedro

Nitu video xlakata tuku laksakti.

Kakilatapatiw, ni liwana tasiya uma video.

  • 1 Pedro
  • Biblia. Xtachuwin Dios xlakata Tiku nalatamakgo kxaSasti Katiyatni
Biblia. Xtachuwin Dios xlakata Tiku nalatamakgo kxaSasti Katiyatni
1 Pedro

XLIMAKTUM TUKU TSOKGLI PEDRO

1 Akit, Pedro, xʼapóstol Jesucristo, kkatsokgnaniman putum wixin tiku lakgatum wilatit kPonto, kʼGalacia, kCapadocia, kʼAsia chu kBitinia, chuna, wixin tiku xalak atanu kachikinin chu Dios kalaksaknitan. 2 Xla Tlat* xalak akgapun chu wa tiku kalaksakni chuna la xlakkaxwilinit. Kamaxkin espíritu santo xlakata nakamaskulunkiyan. Chuna tlawalh xlakata nakgalhakgaxpatatit chu nakalimaskulunkiyan xkgalhni Jesucristo:

Kskini Dios pi lu kakasikulunatlawan chu kakamakgtayan nakgalhiyatit takaksni.

3 Kamalankika Dios, xTlat kiMalanakan* Jesucristo, xlakata lanka xtalakgalhaman tlawa pi nalakachimparayaw xlakata nakgalhiyaw akgtum takgalhkgalhin nema ni lakgsputa. Kgalhiyaw uma takgalhkgalhin xlakata Jesucristo malakastakwanika. 4 Xla tlawanit pi nalakachimparayaw kʼakgtum latamat nema kgalhi akgtum tatlaja nema kinkamalaknunin pi nakinkamaxkiyan. Uma tatlaja ni lakxla. Uma kalikgalhkgalhipakantit kʼakgapun, 5 wixin tiku kalikuentajtlawapakantit xlitliwakga Dios xlakata kgalhiyatit takanajla. Dios kakuentajtlawayan xlakata namakglhtinanatit lakgtaxtut nema lakkaxwilikanit nakamaxkikanatit kxaʼawatiya kilhtamaku. 6 Wa xlakata wixin lu paxuwayatit, maski kaj tsinu kilhtamaku, komo chuna xlilat, nalilakgaputsayatit tipalhuwa tuku tuwa, 7 xlakata mintakanajlakan nema liʼakxilhkanit, natlawa pi nakamalankikanatit chu nakamaxkikanatit kakni akxni natasiya Jesucristo. Uma mintakanajlakan tlakg lhuwa xtapalh nixawa oro, nema tlan lakgsputa maski matitaxtikanit* klhkuyat. 8 Maski wixin nikxni akxilhtit, paxkiyatit. Maski ni akxilhpatit uku, limasiyayatit pi kanajlaniyatit chu lu lhuwa lipaxuwayatit 9 xlakata lakgchipimpatit tuku xmataxtukputun mintakanajlakan: wa lakgtaxtut.*

10 Palakachuwinanin lichuwinankgolh xpalakata xtalakgalhaman Dios nema ni anan xtachuna* nema kamaxkikanitantit wixin, xlakan xatapaxuwan kgalhskininankgolh chu putsanankgolh xlakata uma lakgtaxtut. 11 Dios xlimaklakaskinita xʼespíritu xlakata nakawani pi Cristo xʼama patinan chu alistalh xʼamaka malankikan. Wa xlakata, chuntiya xkatsiputunkgo tuku xʼama akgspula Cristo chu tuku kilhtamaku chuna xʼama la. 12 Dios kamakatsinilh palakachuwinanin pi ni xʼakstukan xkaskujnanimaka, wata kskujmakgolh mimpalakatakan. Palakachuwinanin tsokgwilikgolh tuku kalitachuwinankantit, chu wixin kgaxpattit uma xpalakata tiku kalitachuwinan xatlan tamakatsinin xlakata xtamakgtay espíritu santo nema makaminkancha kʼakgapun. Asta ángeles lu katsiputunkgo xlakata uma.

13 Kalakkaxwilitit mintalakapastaknikan xlakata natlawayatit lhuwa taskujut, xliputum tuku natlawayatit kalimasiyatit tlan talakapastakni chu kalipawantit pi namakglhtinanatit talakgalhaman nema ni anan xtachuna* akxni natasiya Jesucristo. 14 Chuna la kamanan tiku kgalhakgaxmatnankgo, nialh kamastatit talakaskin pi tuku xtlawaputunatit akxni ni xlakgapasatit Dios chuntiya nakamatlawiyan tuku nitlan; 15 pero xaskulunku kalitaxtutit kxliputum milatamatkan xtachuna la xaskulunku* Dios tiku katasanin, 16 xlakata tatsokgnit: «Xaskulunku* miliwanatkan xlakata akit xaskulunku».

17 Chu komo wixin kʼoración wi tuku skiniyatit xaTlat tiku ni laksakpaxkinan akxni kalakputsanani chatunu chatunu xlakata tuku tlawakgonit, chuna la lipinatit milatamatkan kalimasiyatit pi pekuaniyatit Dios akxni wilatitku niku ni makgas natawilayatit. 18 Xlakata wixin katsiyatit pi ni limaklakaskinka tuku lakxla xlakata nakalilakgmaxtukanatit, chuna la oro o plata, ni wa tlawalh pi nalakgtaxtuniyatit chuna la xlinkgo xlatamatkan nema nitu litaxtu xalakgmakgan minatlatnikan, nema xlakan kamatitaxtinikgon. 19 Wata kalilakgmaxtukantit xkgalhni Cristo nema kgalhi lhuwa xtapalh, xtachuna la xkgalhni tantum borrego nema ni kgalhi tuku nitlan chu xaskulunku. 20 Akxni Dios nina xmakilhtsuki kakilhtamaku laksakli Cristo xlakata nakatamawayan, pero masiyaka kxaʼawatiya kilhtamaku kaj mimpalakatakan. 21 Xlakata tuku xla makgantaxtilh wixin kanajlaniyatit Dios, tiku malakastakwanilh kkalinin chu maxkilh kakni xlakata wixin tlan xkanajlanitit chu tlan xlipawantit Dios.

22 Wixin skulunku litaxtuyatit xlakata kgalhakgaxpatatit xaxlikana chu uma tlawanit pi nakgalhiyatit tapaxkit xtachuna nema lakgalhinikan kfamilia chu ni lakgaputiyunan, wa xlakata uku, lu kalapaxkitit xliputum minakujkan. 23 Wixin lakachimparanitantit.* Ni kamalakachinin talhtsi* nema tlan niy, wata talhtsi nema masta latamat chu nila niy. Kamalakachinin xtachuwin Dios nema xastakna chu putum kilhtamaku wi. 24 Chuna la wan tatsokgni: «Putum latamanin xtachuna la tuwan, chu chuna la lilakgatit tasiya, xtachuna akgatum xanat xalak pukuxtu; tuwan xnakga chu xaxanat yujtamakgan, 25 pero xtachuwin Jehová putum kilhtamaku wi». Wa xlakata, uma «tachuwin» kilhchanima xatlan tamakatsinin nema kalitachuwinankanitantit.

2 Wa xlakata, kalakgmakgantit putum tuku nitlan, taʼakgskgawin, talakgaputiyun, lalakgsitsilakankan chu putum tachuwin nema limawakanankan tuku nitlan. 2 Chuna la tiku aku lakachinit, lu kawaputuntit leche xla xtachuwin Dios nema nitu talakgtlawakanit, xlakata uma nalitatliwakglhatit chu nakalakgmaxtuyan, 3 chu tlan chuna natlawayatit komo liwana lakgapasatit xtalakgalhaman Malana.*

4 Xlakata lakgtalakatsuwinitantit xtachuna la akgtum chiwix xastakna, chu maski latamanin lakgmakgankgolh, Dios laksakli chu xla litaxtu kxlakatin Dios tuku nitu xtachuna, 5 wixin litaxtuyatit chuna la chiwix xastakna chu akgtum chiki nema litlawamaka xʼespíritu Dios xlakata namakamastakan chuna la xtalakaskin espíritu chu nema namakgamakglhtinan Dios xpalakata Jesucristo. 6 Xlakata Tatsokgni wan: «¡Kaʼakxilhtit! Kwili anta kSion xatalaksakni chiwix, akgtum xastlan chiwix nema limakilhtsukinankan, chu putum tiku nalipawan ni katitamamaxanilh».

7 Wa xlakata, wixin lu xlakaskinka liʼakxilhatit, xlakata wixin kanajlayatit. Pero xlakata tiku ni kanajlanikgo, «chiwix nema xtlawananin chiki lakgmakgankgolh, wa uma litaxtulh chiwix nema limakilhastuknankan talhman kchastun»* 8 chu «chiwix nema liʼakgchakgxkan chu litakatalakan». Xlakan liʼakgchakgxkgolh xlakata ni kgalhakgaxmatkgolh tachuwin. Wa uma xpalakata kalilaksakka. 9 Pero wixin «tapakgsiniyatit akgtum lanka familia nema laksakkanit; mapakgsinanin chu sacerdotes litaxtuyatit, tapakgsiniyatit akgtum xasanto kachikin, wa kachikin nema Dios laksakli, xlakata lakgatum nalichuwinanatit xtalakgalhaman* Dios», xla katamakxtun niku kapukswa chu kamakgamakglhtinan kxastlan kxkgakganat. 10 Xlakata milh kilhtamaku wixin ni xkachikin Dios xwanitantit, pero uku xkachikin litaxtuyatit; milh kilhtamaku wixin ni xkalimasiyanikanitantit talakgalhaman, pero uku kalimasiyanikanitantit talakgalhaman.

11 Natalan tiku kkapaxkiyan, xtachuna la tiku xalak atanu kachikinin chu kaj ni makgas wilakgolh, kkatasaskiniyan pi chuntiya kaliskujtit xlakata tliwakglh nalakatakiyatit xtatlawaputu mimaknikan nema katalatlawaman. 12 Chuntiya kamasiyatit xatlan mintayatkan kxlakgstipankan kachikinin chu maski nakalimawakakanatit pi lixkajni likatsiyatit, xlakan naʼakxilhkgo xatlan mintayatkan, chu tuku tlan nakitaxtu wa pi nalimaxkikan kakni Dios akxni namin lakputsanan.

13 Xpalakata Malana, kakakgalhakgaxpattit mapakgsinanin nema latamanin kalaksakkgonit, tlakg chuna mapakgsina, xlakata tlakg xlakaskinka litaxtu nixawa wixin, 14 komo wa gobernador o tiku malakgachakgo xlakata nakamalakgaxokgekgo tiku tlawakgo tuku nitlan chu nakamalankikgo tiku tlawakgo tuku tlan. 15 Xlakata xtalakaskin Dios wa pi wixin katlawatit tuku tlan, chu chuna tlan nakamakgalhtsekgatit latamanin tiku ni liwana lakapastaknankgo. 16 Kalitaxtutit chuna la tiku niti tapakgsinikgo, pero ni kalimaklakaskintit uma xlakata natlawayatit tuku nitlan, wata kskujnanin Dios kalitaxtutit. 17 Kakamaxkitit kakni putum latamanin, kakapaxkitit putum natalanin, kakgalhinitit tapekua Dios, kamaxkitit kakni mapakgsina.

18 Skujnin kakgalhakgaxmatkgolh xmalanakan chu kamaxkikgolh kakni, ni kajwatiya tiku tlan likatsikgo chu tsatata xnakujkan, wata nachuna tiku tuwa kamakgapaxuwakan. 19 Dios tlan akxilha tiku lu liskuja xlakata nakgalhi xaskulunku xtalakapastakni kxlakatin, tiku tayani tuku tuwa chu pati, maski ni lin kuenta. 20 Komo kamalakgaxokgekanatit xlakata tlawatit talakgalhin, ¿la tlan nakalimaxkikanatit kakni? Pero komo tayaniyatit tapatin xlakata tlawatit tuku tlan, uma wa tuku lu makgapaxuwa Dios.

21 Dios kalaksakni xlakata nachuna natlawayatit, xlakata asta Cristo patinalh mimpalakatakan. Xla wililh liʼakxilhtit xlakata liwana nastalaniyatit xtatukit. 22 Xla nipara akgtum talakgalhin tlawalh na nipara akgsaninalh. 23 Akxni xwanimaka laklixkajni tachuwin ni kalitakgalhpuspitnilh laklixkajni tachuwin. Akxni xpatinama, ni kawanilh pi nitlan tuku xʼama katlawani. Wata mastalh talakaskin pi uma tuku xtitaxtuma wa xlakputsananilh Juez tiku xaʼakgstitum lakputsanan. 24 Xla lilh kintalakgalhinkan akxni xtokgowakaka kkiwi, xlakata xkinkalakgmaxtukan ktalakgalhin chu xlatamaw xlakata xtlawaw tuku xaʼakgstitum. Chu «xlakata xla masipanika* wixin kamapaksakantit». 25 Xlakata wixin xlitaxtuyatit chuna la borregos nema akgawani xlamakgolh, pero uku lakgtaspitnitantit mapuchwayanina tiku kuentajtlawa milatamatkan.

3 Nachuna, lakpuskatin, kakakgalhakgaxpattit minchixkukan, komo xachixku ni kgalhakgaxmata xtachuwin Dios, maski ni akgtum tachuwin nawanatit tlan nalimakanajliyatit minchixkukan xlakata tlan mintayatkan, 2 xlakata xlakan akxilhkgolh skulunku mintayatkan chu lu kamaxkiyatit kakni. 3 Ni kalitakaxtayatit tuku kaj tasiya kmimaknikan, xalaktuwa takgonkgxni kmiʼakchixitkan, litakaxtay xla oro chu ni kalilhakganantit tuku xalaktapalaxla, 4 nachuna, milistlankan* kalitasiyalh chuna la likatsiyatit kminakujkan. Wa xlakata kalitakaxtayatit takaksni chu tsatata naku, wa uma tuku Dios lhuwa xtapalh akxilha; nachuna, uma litakaxtay nikxni lakgsputa. 5 Xlakata chuna xtakaxtayakgo lakpuskatin xalamakgasa tiku ni xmakgxtakgkgo chu xlipawankgo Dios, xkgalhakgaxmatkgo xchixkukan, 6 chuna la Sara xkgalhakgaxmata Abrahán chu xlimapakuwi malana.* Wixin tlan litaxtuyatit chuna la Sara, komo chuntiya tlawayatit tuku tlan chu ni mastayatit talakaskin nakamakgatlajayan tapekua.

7 Nachuna, wixin xalakchixkuwin, chuntiya tlan* kakalikatsinitit* mimpuskatkan. Kakamaxkitit kakni, kakakuentajtlawatit xtachuna la tuku lakapala tapakglha, xlakata xlakan na nakatamakglhtinanan latamat xlakata xtalakgalhaman Dios nema ni anan xtachuna* chu xlakata nitu natlawa pi Dios ni nakgaxmata miʼoracioneskan.

8 Xaʼawatiya, putum wixin watiya talakapastakni kakgalhitit chu kalimasiyatit pi makgkatsiyatit tuku makgkatsi achatum, tapaxkit xtachuna nema lakgalhinikan kfamilia, lu kalakgalhamanantit chu kataktujutit. 9 Ni kalitamakgapuspittit tuku nitlan chu tuku nitlan kawanikantit. Wata kalitamakgapuspittit akgtum tasikulunalin, xlakata wixin, Dios kalaksakni nakamaxkiyatit amakgapitsin tasikulunalin, xlakata Dios nakasikulunatlawayan.

10 Xlakata «tiku paxki latamat chu tapaxuwan tawilaputun, xlikuentajtlawat ksimakgat xlakata tuku nitlan chu xkilhni xlakata ni nawan taʼakgsanin. 11 Katamakgatlinilh tuku nitlan chu katlawalh tuku tlan; kaputsalh takaksni chu kaliskujli xlakata chuntiya nakgalhi. 12 Xlakata Jehová kaʼakxilha tiku tlawamakgolh tuku xaʼakgstitum chu kakgaxmatni tuku tasaskinikgo, pero Jehová ni kaʼakxilhputun tiku tlawakgo tuku nitlan».

13 Chu, ¿tiku nakatlawaniputunan tuku nitlan komo lu tlawaputunatit tuku tlan? 14 Pero, komo napatinanatit xlakata xaʼakgstitum likatsiyatit, napaxuwayatit. Pero ni kapekuanitit tuku xlakan pekuanikgo* chu nipara kalilakgaputsatit. 15 Wata kamaxkitit kakni Cristo tiku Malana kminakujkan, putum kilhtamaku skgalalh katawilatit xlakata namaxkiyatit takgalhtin tiku nakakgalhskinan xlakata mintakgalhkgalhinkan nema kgalhiyatit, pero akxni chuna natlawayatit kalimasiyatit tsatata naku chu kalimasiyatit pi lu mastayatit kakni.

16 Chuntiya kakgalhitit skulunku mintalakapastaknikan, xlakata akxni xlakan nakalimawakakgoyan tuku nitlan, natamamaxanikgo xlakata wixin lu tlan tayat kgalhiyatit chuna la kstalaninanin Cristo. 17 Xlakata tlakg tlan napatinanatit xlakata tlawapatit tuku tlan, komo chuna xtalakaskin Dios, nixawa nalipatiyatit tuku ni xatlan tlawapatit. 18 Xlakata Cristo kaj makgtum nilh chu xapalh talakgalhin, chatum lataman tiku tlan likatsi xpalakata latamanin tiku nitlan likatsikgo, xlakata nakapulalinan kxlakatin Dios. Xla nilh chuna la chatum lataman, pero makglhtinalh latamat kʼakgapun. 19 Chu akxni xkgalhiya latamat kʼakgapun, alh kamakatsini tuku xʼamaka kalimalakgaxokgekan ángeles nema tachin xwilakgolh, 20 wa umakgolh tiku ni kgalhakgaxmatnankgolh makgasa, akxni Dios xkgalhkgalhinama kxkilhtamaku Noé xlakata nina xtlawakgokan arca niku ni lhuwa latamanin tanukgolh, uma wamputun, kaj kgalhtsayan latamanin, tiku kalakgmaxtuka kxkgalhni chuchut.

21 Tlan natamalakxtumiyaw tuku lalh ama kilhtamaku uma tamunut nema kalakgmaxtuman uku, xpalakata xtalakastakwanat Jesucristo. Tamunut ni mapanu tuku maxkajwani makni, wata wa liskinikan Dios akgtum xaskulunku talakapastakni. 22 Xlakata Cristo wi kxpakgastakat* Dios, xlakata alh kʼakgapun, chu ángeles, mapakgsinanin chu tiku kgalhikgo litliwakga, Dios tlawalh pi nakgalhakgaxmatkgo.

4 Xlakata Cristo patinalh akxni chatum lataman xwanit, wixin na kalimasiyatit watiya talakapastakni nema kgalhi Jesús; xlakata tiku patinanit lakgmakganit talakgalhin 2 xlakata nalilatama xtalakaskin Dios kkilhtamaku nema nalatamajku chuna la chatum lataman, chu nialh nalatama xlakata natlawa xtalakaskinkan latamanin xalak kakilhtamaku. 3 Xlakata titaxtulha lhuwa kilhtamaku chuna la xtlawapatit xtalakaskinkan latamanin xalak kakilhtamaku, akxni xtlawayatit tuku ni xlilat chu ni xlilakamaxananatit,* lu xtlawaputunatit tuku nitlan, xmalakatsaliyatit chuna la xwayatit kuchu, xtlawayatit xaʼakglakgwa paskua,* xtamakxtumiyatit kaj xlakata nakgotatit chu lixkajni chuna la xkakninaniyatit tatlawamakgxtu.* 4 Xlakan lu kaks lilakawankgo pi wixin nialh akxtum katatlawapatit tuku nitlan, wa xlakata xlakan lu nitlan kalichuwinankgoyan. 5 Pero umakgolh latamanin namaxkikgo kuenta Cristo, tiku nakalakputsanani tiku staknankgo chu tiku nikgonita. 6 Chu wa xlakata, kalitachuwinanka xatlan tamakatsinin tiku nikgonita, xlakata maski nakalakputsananikan chuna la kalakputsananikan latamanin, tlan nalilatamakgo xtapulalit xʼespíritu Dios.

7 Pero talakatsuwinit xlisputni putum tuku anan. Wa xlakata, kakgalhitit tlan talakapastakni chu putum kilhtamaku skgalalh katawilatit xlakata natlawayatit oración. 8 Pero tuku tlakg xlakaskinka, lu kalapaxkitit chatunu chatunu, xlakata tiku paxkinan putum kilhtamaku tapatiputun achatum. 9 Tlan kalamakgamakglhtinantit chatunu chatunu chu ni xtachuna la tsinka takuka kaliʼakxilhtit. 10 Tuku tlan tlawayatit nema makglhtinanitantit,* kalimaklakaskintit xlakata nalaskujnaniyatit chatunu chatunu chuna la laktlan skujnanin* xla xtalakgalhaman Dios nema ni anan xtachuna,* nema pulaklhuwa chuna la limasiyakan. 11 Komo wi tiku katsini liwana chuwinan, katlawalh chuna la tiku makatsininan xtamakatsin Dios; komo wi tiku kaskujnani amakgapitsin, chuna katlawalh xlakata Dios maxki litliwakga; xlakata xliputum tuku natlawakan nalimaxkikan kakni Dios xpalakata Jesucristo. Dios wa kgalhi kakni chu litliwakga putum kilhtamaku. Chuna kalalh.

12 Natalan tiku kkapaxkiyan, ni kaks kalilakawantit xlakata tuwa taputsan* nema kaʼakgspulaman, xtachuna la tuku xlimakgtumku kaʼakgspulaman. 13 Wata chuntiya kalipaxuwatit xlakata titaxtupatit watiya tapatin nema titaxtulh Cristo, xlakata na lu lhuwa nalipaxuwayatit akxni natasiya* xlilanka. 14 Komo lixkajni tachuwin kawanipakantit* kaj xlakata xtukuwani Cristo, paxuwayatit, xlakata uma limasiya pi kgalhiyatit xʼespíritu lilanka, uma wamputun, xʼespíritu Dios.

15 Pero ni klakaskin pi nipara chatum wixin kapatinalh xlakata litaxtunit makgnina, kgalhana, tiku lixkajni likatsi o tiku makgtanu kxlatamat achatum. 16 Pero komo wi tiku patinan xlakata kstalanina Cristo litaxtu, ni kamaxanalh; wata chuntiya kamaxkilh kakni Dios xlakata lin xlatamat chuna la kstalanina Cristo. 17 Xlakata wa uma kilhtamaku nema lakkaxwilikanit xlakata pulana natsukukan lakputsananikan xcongregación Dios. Pero komo pulana akinin nakinkalakputsananikanan, ¿la* nakakitaxtuni tiku ni kgalhakgaxmatkgo xatlan xtamakatsinin Dios? 18 «Chu komo tiku xaʼakgstitum likatsi xlilat lu naliskuja xlakata Dios tlan nalakgmaxtu, ¿tuku naʼakgspula tiku ni maxki kakni Dios chu tiku tlawa talakgalhin?». 19 Wa xlakata, tiku patinamakgolh xlakata tlawamakgolh xtalakaskin Dios, chuntiya katlawakgolh tuku tlan chu kamaxkikgolh xlatamatkan Malakatsukina, xla ni makgxtakgnan.

5 Xlakata akit na kgolotsin klitaxtu chu na kakxilhli xtapatin Cristo chu chatum tiku na namakglhtinan lilanka nema natasiya, kkatasaskini* lakgkgolotsin* tiku wilakgolh kmilakgstipankan: 2 kamapuchwayanitit kgamputum xborregos Dios nema kamakuentajlin, kakuentajtlawatit xcongregación; ni kaj xafuerza katlawatit, wata xatapaxuwan chuna la lakaskin Dios, ni kaputsatit lhuwa tuku nakgalhiputunatit, wata lu kaliskujtit, 3 ni xmalanakan* kakalitaxtunitit tiku Dios kalakgayawanitan, wata liʼakxilhtit kakalitaxtunitit kgamputum borregos. 4 Chu akxni xapuxku mapuchwayanina masiyakanita nawan, wixin namakglhtinanatit corona xla lilanka nema ni xnakga.

5 Nachuna, wixin lakgkgawasan tiku nina lipinatit kata, kakakgaxpatnitit lakchixkuwin tiku tlakg linkgoya kata.* Chu kalimasiyatit tataktujut chuna la nalalikatsiniyatit chatunu chatunu, xlakata Dios kalakatayani* tiku lanka kamakgkatsikan, pero kalimasiyani talakgalhaman nema ni anan xtachuna* tiku taktujukgo.*

6 Wa xlakata, katataktujunitit Dios tiku kgalhi litliwakga,* xlakata xla nakamalankiyan akxni nachan kilhtamaku, 7 chu kawilitit putum mintalakgaputsitkan kxmakan xlakata xla kalilakgaputsayan. 8 ¡Chuntiya tlan talakapastakni kakgalhitit chu skgalalh katawilatit! Mintalamakgasitsinkan, Akgskgawini, kamakgstilipulayan xtachuna tantum xatsinksni león nema putsama tiku tlan nawa. 9 Pero kalakatayanitit, tliwakga kakgalhitit mintakanajlakan, xlakata katsiyatit pi putum minatalankan* kxlikalanka katiyatni nachuna patinamakgolh chuna la wixin. 10 Chu akxni patinitantita ni lhuwa kilhtamaku, Dios tiku litsama putum talakgalhaman nema ni anan xtachuna,* tiku kalaksakni xlakata akxtum natatawilayatit Cristo chu putum kilhtamaku nakamaxkiyan lilanka, xla nakamalakgtawakgeyan xlakata tlan naskujnaniyatit. Xla tliwakglh nakayawayan, xla nakamatliwakglhan, liwana nakayawayan xlakata ni nalhtujatit. 11 Xla kgalhi litliwakga putum kilhtamaku. Chuna kalalh.

12 Kskinilh tala Silvano,* tiku ni makgxtakga Dios, pi wa xtsokgli uma kincarta nema kaj ni lhuwa tuku wan xlakata nakkamatliwakglhan chu liwana nakkamakatsiniyan pi wa uma xaxlikana xtalakgalhaman Dios nema ni anan xtachuna.* Chuntiya tliwakglh kakgalhitit. 13 Tala puskat nema wi kBabilonia tiku na xatalaksakni chuna la wixin, kamalakgachaniyan tamakgachipat chu nachuna Marcos, tiku kliʼakxilha chuna la kinkgawasa. 14 Kalalimasiyanitit tapaxkit akxni nalamakgachipayatit, chatunu chatunu kalamaxkitit tatsukni.*

Kakgalhitit takaksni putum wixin tiku kstalaninanin Cristo.

Alakatanu wankan «Tata o Tiku».

Alakatanu wankan «kimPuchinakan».

O: «maskulunkikanit».

O: «xlakgtaxtut milatamatkan».

O: «talakgalhaman nema ni kinkalakgchanan». Kaʼaxilhti glosario.

O: «talakgalhaman nema ni kinkalakgchanan». Kaʼaxilhti glosario.

O: «xasanto».

O: «Xasanto».

Alakatanu wankan «lakgawamparanitantit».

Uma wamputun, talhtsi nema tlan masta tawakat.

Alakatanu wankan «Puchina».

Uma chiwix xwilikan kxʼakpun o kxkgalhni niku xtakilhastukkgo akgtiy patsaps xlakata tliwakglh xtawilakgolh.

Xagriego: «xtayat». Uma wamputun, tuku tlawanit nema tlan limalankikan.

Alakatanu wankan «matakgawika».

Alakatanu wankan «mililakgatitkan».

Alakatanu wankan «puchina».

O: «katatawilatit».

O: «kakaʼakgatekgsnitit».

O: «talakgalhaman nema ni kinkalakgchanan». Kaʼakxilhti glosario.

O: «ni kapekuanitit tuku wankgo pi nakatlawanikgoyan».

Alakatanu wankan «kxpakgkana».

Griego, asélgueia. Kaʼakxilhti glosario.

O: «paskua niku tachilikan».

Alakatanu wankan «tamakanitlaw».

Xagriego: «kamaskiwikanitantit».

O: «tiku lakgayawakanit chiki».

O: «talakgalhaman nema ni kinkalakgchanan». Kaʼakxilhti glosario.

O: «taputsan xla lhkuyat».

O: «namasiyakan».

O: «Komo nitlan tachuwin kawanipakantit».

Alakatanu wankan «chi».

O: «kkastakyawa».

O: «lakgkgolotsin xalak congregación».

Alakatanu wankan «xpuchinakan».

O: «lakgkgolotsin».

Alakatanu wankan «katalalakgapaxtokga».

O: «talakgalhaman nema ni kinkalakgchanan». Kaʼakxilhti glosario.

Alakatanu wankan «tatutsunajikgo».

Xagriego: «xmakan Dios nema kgalhi lanka litliwakga».

Alakatanu wankan «minatakamanan».

O: «talakgalhaman nema ni kinkalakgchanan». Kaʼakxilhti glosario.

Na limapakuwikan Silas.

O: «talakgalhaman nema ni kinkalakgchanan». Kaʼakxilhti glosario.

Alakatanu wankan «tasputni».

    Likgalhtawakga xatotonaco (1993-2026)
    Ktaxtuputun
    Matsukikan sesión
    • Totonaco
    • Matitaxtikan
    • La lakkaxwilikan
    • Copyright © 2025 Watch Tower Bible and Tract Society of Pennsylvania
    • Tuku milikatsit
    • La maklakaskinkan uma página
    • Tlan nalakgpaliya tuku tsokgwili mimpalakata
    • JW.ORG
    • Matsukikan sesión
    Matitaxtikan