Timoteo xkamakgtayaputun latamanin

Timoteo chatum kgawasa tiku lu xlipaxuwa akxni xkamakgtaya amakgapitsin. Lakalhuwa kachikinin alh xlakata nakamakgtaya latamanin. Lhuwa tuku titaxtulh kxlatamat. ¿Tlakg katsiputuna xlakata Timoteo?...

Timoteo stakli kʼakgtum kachikin nema xwanikan Listra. Akxni skgataku xwanit xnana o xtsiyuna, Loida chu xtse Eunice, tsukukgolh masiyanikgo xlakata Jehová. Wa xlakata lata aktsujku, Timoteo xkamakgtayaputun amakgapitsin nalakgapaskgo Jehová.

Akgtum kilhtamaku akxni Timoteo kgawasaku xwanit, Pablo wanilh: «Nakan lichuwinan Dios kʼalakatanu kachikinin. ¿Kintapimputuna?». Timoteo lu lipaxuwalh chu wanilh: «¡Kamputun!». Timoteo xkamakgtayaputun amakgapitsin.

Timoteo taʼalh Pablo kTesalónica kʼakgtum kachikin nema xtapakgsi kʼGrecia. Xlakata xchankgolh anta, makgat tlawankgolh chu na tiyakgolh barco. Akxni chankgolh anta, kamakgtayakgolh lhuwa latamanin nalakgapaskgo Jehová. Pero makgapitsin lu sitsikgolh chu xkatlawaniputunkgo tuku nitlan. Wa xlakata, Pablo chu Timoteo taxtukgolh kʼama kachikin chu ankgolh lichuwinankgo Dios alakatanu.

Titaxtulh makgapitsi papaʼ, Pablo skinilh Timoteo pi xtaspitli kTesalónica. Xkatsiputun la xwilakgolh natalan. Xtalakaskin pi ni xpekualh xlakata xtaspitli kkachikin niku lu nitlan xlikatsinikanit kstalaninanin Cristo. ¿Tuku tlawalh Timoteo? Ampa xlakata xkatsiputun la xwilakgolh xnatalan. Akxni kitaspitli liminilh Pablo lu tlan tamakatsin. ¡Natalan xalak Tesalónica lu tlan kskujnanimakgolh Jehová!

Timoteo chu Pablo akxtum skujnikgolh Jehová akglhuwa kata. Chu makgtum Pablo tsokgli xlakata Timoteo: «Nakmalakgacha Timoteo xlakata nakamakgtaya natalan. Ni anan achatum la xla. Xla lu paxki Jehová chu latamanin».

Wix na kapaxkiya amakgapitsin, ¿ni chuna? ¿Kamakgtayaputuna nalakgapaskgo Jehová?... Komo chuna tlawaputuna, lu napaxuwaya chu natitaxtuya tuku tlan kmilatamat xtachuna la Timoteo.