PULAKTIY
Ni nakatatalakxtumiyaw amakgapitsin
BIBLIA WAN: «Liwana kamakgantaxti mintaskujut, chu tlan nalimakgkatsiya xlakata tlan tlawa mintaskujut, chu ni talakaskin wi tiku natatalakxtupiya» (Gálatas 6:4, Nueva Traducción Viviente).
¿TUKU XLAKATA? Akinin xtachuna wamputunaw la amakgapitsin: minkilhtamaku tatalakxtumiyaw tiku ni lhuwa tuku kgalhikgo, pero tlakg katatalakxtumiyaw tiku tlakg kgalhikgo tumin, tiku tlakg lakgtliwakgan o wi tuku lu katsinikgo tlawakgo. Pero akxni chuna tlawayaw nitlan kinkakitaxtuniyan. Max natsukuyaw lakpuwanaw pi chatum lataman lu xlakaskinka kaj xlakata tuku kgalhi o xlakata tuku katsini tlawa. Chu asta max natsukuyaw lakgkatsananiyaw o nasitsiniyaw (Eclesiastés 4:4).
¿TUKU KILITLAWATKAN? Nachuna nalakpuwanaw chuna la Jehováa kinkaʼakxilhan. Uma natlawa pi tlakg tlan namakgkatsiyaw. Chuna la wan 1 Samuel 16:7, «chixku kaj akxilha tuku tasiya; pero Jehová, xla akxilha tuku wi knaku» o anima. Uma wamputun pi Dios nitiku kinkatamalakxtumiyan. Jehová lu xlakaskinka akxilha wa tuku wi kkinakujkan, tuku lakpuwanaw, tuku makgkatsiyaw chu tuku tlawaputunaw (Hebreos 4:12, 13). Katsi pi nila tlawayaw putum tuku lakaskinaw chu lakaskin chuna nalakpuwanaw. Nitlan nakitaxtu akxni nakatatalakxtumiyaw amakgapitsin: natlawa pi nalakpuwanaw pi tlakg katsiniyaw nixawa amakgapitsin o natlawa pi namakgkatsiyaw pi nitu tlan tlawayaw. Tlan nakitaxtu akxni nalakpuwanaw pi nila tlawayaw putum tuku lakaskinaw chu wi tiku tlakg katsini nixawa akinin (Proverbios 11:2).
Wa xlakata, ¿tuku tlawa pi Dios tlakg xlakaskinka nakinkaʼakxilhan? Dios malakpuwanilh palakachuwina Miqueas natsokgnan: «Jehová waninitan, chixku xalak katiyatni, tuku tlan. ¿Chu tuku skiniman Jehová natlawaya? Kaj wa natlawaya tuku xaʼakgstitum, lu tlan nalikatsiya, chu nalakapastaka pi miʼakstu nila putum tlawaya akxni naskujniya mi Dios» (Miqueas 6:8). Komo namakgantaxtiyaw uma tastakyaw, Dios nakinkakuentajtlawayan (1 Pedro 5:6, 7). ¿Pi anan atanu tuku tlakg nakinkamakgapaxuwayan?
[Notas nema wilakgo kpágina]
a Xtukuwani Dios, chuna la tatsokgnit kBiblia.
[Epígrafe xla página 5]
Jehová lu xlakaskinka kinkaʼakxilhan kaj xlakata tuku wi kkinakujkan