Tuku katsiputunkgo tiku likgalhtawakgakgo
¿Laksakpaxkinan Dios?
▪ Biblia wan pi «Dios, ni [laksakpaxkinan], kxlakgstipan chixkuwin; wampi kaxani kawa xala, wanti mpikuaniy Dios, chu na wantu xlilat ntu ntlaway, tlan tlaway» (Hechos 10:34, 35).
Liwana tasiya pi xtalakapastakni kiMalakatsukinakan ni xtachuna la latamanin. Lhuwa latamanin lakpuwankgo tlakg xlakaskinka kaʼakxilhkan xlakata xcolorkan o xlakata xkachikinkan ni xawa amakgapitsin. Uma talakapastakni xtachuna la tiwa Charles Darwin, tiku tsokgli: «Namin kilhtamaku, [...] latamanin tiku tlakg liwana lakapastakkgo namasputukgo tiku ni liwana lakapastakkgo». Lu ni tlan, pero lhuwa patinamakgolh xlakata wilakgolh tiku lanka kamakgkatsikan xlakata xcolorkan o xkachikinkan.
Pero ¿tlan uma talakapastakni? ¿Limasiyanit ciencia pi anan latamanin tiku tlakg tliwakga xlakata xcolor? Nichuna, Bryan Sykes, científico chu makgalhtawakgena xalak Universidad xla Oxford, wa: “Ni wi tuku limasiya pi anan tiku tlakg tliwakga xlakata xkachikinkan o xcolorkan. [...] Makglhuwa kinkgalhskinkgo komo anan akgtum ADN griego o ADN italiano, pero ni anan. [...] Kimputumkan akxtum chuna tasiyayaw”.
Uma tuku wan xtachuna la wan Biblia, pi Dios tlawalh chatum chixku chu chatum puskat chu kimputumkan anta minitanchaw (Génesis 3:20; Hechos 17:26). Wa xlakata, kxlakatin Dios kaj akgtum familia akinin.
Jehová ni akxilha tuku color kgalhiyaw chu la tasiyayaw, xla akxilha tuku tlakg xlakaskinka, wa kinakujkan uma wamputun la kgalhiyaw kintayatkan. Jehová kinkawaniyan: «Chixku kaj akxilha tuku tasiya; pero Jehová, xla akxilha tuku wi knaku» o anima (1 Samuel 16:7). Akxni katsikan uma lu tlan limakgkatsikan. Kaʼakxilhwi tuku xlakata.
Maski tanu kincolorkan, o kinkachikinkan, max kilhuwakan ni nalakgatiyaw la tasiyayaw. Chu xlikana nila lhuwa tuku tlawayaw xlakata nalakgpaliyaw. Pero tuku tlakg xlakaskinka nema nalakgpaliyaw wa: kintapuwankan chu la likatsiyaw (Colosenses 3:9-11). Akxni akxilhaw la limaw kilatamatkan, max naʼakxilhaw pi lanka kinkamakgkatsikanan o namakgkatsiyaw pi amakgapitsi tlakg xlakaskinka xlakata xcolorkan o xkachikinkan. Xlakata uma talakapastakni ni xtachuna la xtalakapastakni Dios, talakaskin naliskujaw xlakata ni chuna nalakapastakaw (Salmo 139:23, 24).
Komo liskujaw xlakata nalakapastakaw la Jehová, lu nakinkamakgtayayan. Biblia kinkawaniyan: «Jehová, lakputsama kxlikalanka katiyatni, la nalimaklakaskin xlitliwakga xlakata nakamakgtaya tiku xliputum xnaku skujnanikgo» (2 Crónicas 16:9). ¡Lu tlan limakgkatsiyaw akxni katsiyaw pi uma tachuwin kgantaxtu chu Dios ni akxilha tuku color kgalhiyaw o tuku kachikin lamaw!