Wantuku masiya xTachuwin Dios

¿La kinkamakgtayayan xlimapakgsin Dios?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿Tuku xlakata kilikgalhakgaxmatatkan Dios?

Xlilat nakgalhakgaxmataw xlakata wa tiku kinkamalakatsukin. Asta Jesús putum kilhtamaku kgalhakgaxmatli (Juan 6:38; Apocalipsis [Revelación] 4:11). Xlimapakgsin Dios kinkamakgtayayan nalimasiyaniyaw pi paxkiyaw. (Kalikgalhtawakga 1 Juan 5:3.)

Putum xlimapakgsin kinkamakgtayayan. Kinkamasiyaniyan la lu tlan nalinaw kilatamatkan la uku chu la namakglhtinanaw tasikulunalin nema ni kgalhi xlisputni. (Kalikgalhtawakga Salmo 19:7, 11 chu Isaías 48:17, 18.)

2. ¿La kinkamakgtayayan xlimapakgsin Dios xlakata ni lu natatatlayaw?

Xlimapakgsin Dios niku wan pi nitlan kgachikan kinkamakgtayayan nitu kaj lakapala nakinkaʼakgspulayan chu ni nalitatatlayaw kuchu asta naliniyaw. Tiku lhuwa kgota alistalh nialh la makgxtakga chu matlawi tuku nitlan (Proverbios 23:20, 29, 30). Jehová wan pi tlan nawayaw kuchu pero ni lhuwa. (Kalikgalhtawakga Salmo 104:15 chu 1 Corintios 6:10.)

Na wan pi ni wi tuku nalakgsitsiniyaw achatum, ni lhuwa nasitsiyaw chu ni nakgalhiyaw tayat nema kinkatlawaniyan tuku nitlan chu katlawani tuku nitlan amakgapitsin. Komo chuna natlawayaw ni lu katitatatlaw. (Kalikgalhtawakga Proverbios 14:30 chu 22:24, 25.)

3. ¿La kinkamakgtayayan xlimapakgsin Dios xlakata talakgxtumit?

Xlimapakgsin Dios wan pi nitlan tatalakgxtumikan tiku ni tamakgaxtokgkan (Hebreos 13:4). Tiku makgantaxtikgo uma limapakgsin tlakg tlan tawilakgo chu tlakg tlan kamakgastakkgo xkamanan. Pero akxni wi tiku tatalakgxtumi tiku ni tamakgaxtokga, kapasa tajatat, lakxtlawakgo xtamakgaxtokgatkan, latlawani tuku nitlan, nitlan tawila xtalakapastaknikan chu kaj chatum tiku litamakgaxtakga kamanan. (Kalikgalhtawakga Proverbios 5:1-9.)

Akxni xlikana kgalhakgaxmataw uma limapakgsin, kinkamakgtayayan tlan natalalinaw Dios chu ni nakatlawaniyaw tuku nitlan amakgapitsin. (Kalikgalhtawakga 1 Tesalonicenses 4:3-6.)

4. ¿La kinkamakgtayayan lu xlakaskinka naʼakxilhaw latamat?

Tiku lu xlakaskinka akxilhkgo latamat nema Dios kamaskiwinit makgxtakgkgo nitlan talismanin la uma, ni xkulikgo chu makgxtakgkgo atanu tuku nitlan xlismanikgonit (2 Corintios 7:1). Dios lu xlakaskinka akxilha latamat, asta xlatamat aktsu skgata nema wi kxpan xtse (Éxodo 21:22, 23). Wa xlakata ni xlilat namakgniyaw aktsu skgata nema nina lakachin. Nachuna tiku lu xlakaskinka akxilhkgo latamat chuna la Dios kuenta tlawakgo nitu nakaʼakgspula kxputaskujutkan, kxchikkan chu kxputlawkan (Deuteronomio 22:8). Na ni kgamanankgo niku kalipekua wili xlatamatkan xlakata katsikgo pi wa Dios kamaskiwinit. (Kalikgalhtawakga Salmo 36:9.)

5. ¿La kinkamakgtayayan pi Jehová xasanto akxilha kgalhni?

Kgalhni xasanto xlakata Dios wan pi kilhchani xlatamatkan putum tuku staknan (Génesis 9:3, 4). Xlimapakgsin Dios wan pi kgalhni xtachuna latamat chu uma kinkamakgtayayan. ¿Tuku xlakata? Xlakata uma Dios kinkalitapatiyan kintalakgalhinkan. (Kalikgalhtawakga Levítico 17:11-13 chu Hebreos 9:22.)

Xkgalhni Jesús lu lhuwa xtapalh xwanit xlakata ni xkgalhi talakgalhin. Akxni Jesús xmakamastanita xlatamat xpalakata latamanin, makamaxkilh Dios xtapalh xkgalhni nema xkilhchanima xlatamat (Hebreos 9:12). Xkgalhni nema makamastalh kinkamakgtayayan nakgalhiyaw latamat nema ni kgalhi xlisputni. (Kalikgalhtawakga Mateo 26:28 chu Juan 3:16.)

Komo tlakg katsiputuna xlakata uma, kaʼakxilhti capítulos 12 chu 13 xla uma libro, ¿Tuku xlikana masiyay Biblia?, tlawakgonit xtatayananin Jehová.