Wantuku masiya xTachuwin Dios

¿Tuku kilhtamaku tsukulh mapakgsinan Jesús?

Uma artículo namakgtayayan xlakata natekgsa kmiBiblia xtakgalhtin makgapitsi takgalhskinin nema max miakstu tlawanikanita. Komo lakaskina, xtatayananin Jehová tlan natalikgalhtawakgakgoyan umakgolh takgalhskinin.

1. ¿Tuku tamapakgsin makglhtinalh Jesús?

Dios wanilh mapakgsina David pi kxfamilia xʼama taxtu tiku xʼama maxki xTamapakgsin Dios putum kilhtamaku. Wa Jesús Mapakgsinama kʼakgapun la uku, tiku xtalichuwinanit. (Kalikgalhtawakga Salmo 89:4 chu Lucas 1:32, 33.)

Jehová Dios laksakli David, akxni kgawasaku xwanit, xlakata xmapakgsinalh kʼIsrael. Alistalh laksakli Salomón xlakata wa xmapakgsinalh akxni xnilh David «kxputawilh Jehová», kJerusalén (1 Crónicas 28:4, 5; 29:23). Akxni Salomón nilh, lhuwa tiku tawilakgolh kxputawilh Jehová. Pero lhuwa mapakgsinanin ni kgaxmatnikgolh Jehová. Wa xlakata, Jehová mastalh talakaskin pi soldados xalak Babilonia xakgchipalh kachikin kata 607 akxni nina aʼxmin Jesús (a.n.j.) chu nialh xtawilalh mapakgsina kxputawilh. Akxni ama kilhtamaku nialh chatum tiku xalak xfamilia David mapakgsinalh kJerusalén. (Kalikgalhtawakga Ezequiel 21:27.)

2. ¿Niku akglit kata xtitaxtulh xlakata xtawilapa mapakgsina kxTamapakgsin Dios?

Akxni malakgsputuka Jerusalén, Jehová wanilh palakachuwina Daniel pi xʼama laksaka xasasti mapakgsina xlakata xmapakgsinancha kʼakgapun. Pero ¿tuku kilhtamaku xtsukulh mapakgsinan? (Kalikgalhtawakga Daniel 7:13, 14.)

Xtakgalhtin anta wi kʼakgtum tamanixni nema palakachuwina Daniel wa tuku xwamputun chuna la tiwanka. Chuna la Dios xlimapakgsinanit pi nialh xʼanalh chu xmasputuka tamapakgsin kJerusalén, uma tuku akxilhli, Dios limapakgsinalh pi xtankamika uma lanka kiwi. Alistalh wa pi «akgtujun kilhtamaku» xtitaxtulh xlakata kstakpa. Anta kBiblia akgtutu kilhtamaku aitat wamputun 1,260 kilhtamaku, wa xlakata akgtujun kilhtamaku chan 2,520 kilhtamaku (Apocalipsis [Revelación] 12:6, 14). Anta kBiblia makglhuwa talichuwinan pi tuku xʼama kgantaxtu, akgtum kilhtamaku xkilhchanima akgtum kata (Números 14:34). Wa xlakata, 2,520 kata xʼama makgapala xlakata xkgalhipa xmapakgsina xTamapakgsin Dios. (Kalikgalhtawakga Daniel 4:10-17.)

3. ¿Tuku kilhtamaku tsukulh mapakgsinan Jesús?

Dios Mapakgsina tlawalh Jesús kʼakgapun kkata 1914, akxni 2,520 kata xtitaxtunit akxni xmalakgsputukanita Jerusalén. Akxni tsukulh mapakgsinan kʼakgapun, tamakxtulh Satanás chu xdemonios (Apocalipsis 12:7-10). Latamanin nila akxilhkgolh akxni chuna lalh, pero akxilhkgonit tuku lama unu kKatiyatni (Apocalipsis 12:12). Lhuwa tuku tsukulh la, kkata 1914 litasiyalh pi Jesús tsukulh mapakgsinan ama kata. (Kalikgalhtawakga Mateo 24:14 chu Lucas 21:10, 11, 31.)

4. ¿La makgtayayan xlakata Jesús Mapakgsina?

Xlakata putum kgantaxtunit tuku xtawanit kBiblia, limasiya pi wix tlan nakanajlaya tuku wan chu xlakata Jesús mapakgsinamaja, nialh makgas namasputu tapatin unu katiyatni. (Kalikgalhtawakga Salmo 72:8, 12, 13 chu Daniel 2:44.)

Komo tlakg katsiputuna, kalikgalhtawakga páginas 215 asta 218 xla uma libro, ¿Tuku xlikana masiyay Biblia?, nema tlawakgonit xtatayananin Jehová.

[Tabla xla página 17]

(Xlakata nakatsiya la tasiya kaʼakxilhti likgalhtawakga)

← 2,520 kata →

1000 a.n.j. 1 a.n.j. 1 a.x.j. 1000 a.x.j. 2000 a.x.j.

← 606 kata chu 3 papaʼ →← 1,913 kata chu 9 papaʼ

2,519 kata chu 12 papaʼ