Tiku likgalhtawakgakgo katsiputunkgo
¿Na masiyakgo lakpuskatin tiku xtatayananin Jehová?
▪ Chuna, kxlikalanka katiyatni lhuwa lakpuskatin masiyakgo. Umakgolh lakpuskatin lichuwinankgo xatlan tamakatsin xla xTamapakgsin Dios chuna la wan Salmo 68:11, niku Jehová wan: «Lakpuskatin tiku lichuwinankgo xatlan tamakatsin litaxtukgo la lhuwa soldado».
Pero taskujut nema tlawakgo umakgolh xtatayananin Jehová ni xtachuna tuku tlawakgo lakpuskatin tiku tapakgsikgo kʼatanu takanajla o religión. ¿Tuku xlakata ni xtachuna?
Xapulana tuku litalakgpali wa pi tanu tanu tiku kamasiyanikgo. Lakpuskatin tiku wi tuku lakgatayakgo kxpusikulankan, pulalinanin litaxtukgo. Wa xlakata, kamasiyanikgo tiku tapakgsikgo kxtakanajlakan. Pero lakpuskatin tiku xtatayananin Jehová ni masiyakgo kcongregación. Xlakan kamasiyanikgo putum latamanin tiku katekgskgo akxni ankgo lichuwinankgo Dios akgatunu chiki o kaxanikawa.
Atanu tuku litalakgpali xtaskujutkan wa tuku tlawakgo kcongregación. Lakpuskatin tiku masiyakgo kpusikulan o kʼatanu takanajla, kapulalinkgo chu kawanikgo tuku xlitlawatkan tiku anta tapakgsikgo. Lakpuskatin tiku xtatayananin Jehová ni masiyakgo kcongregación akxni wilakgo lakchixkuwin tiku tamunukgonita. Kajwatiya chuna tlawakgo lakchixkuwin tiku kalaksakkanit xlakata namakgalhtawakgenankgo (1 Timoteo 3:2; Santiago 3:1).
Biblia masiya pi kajwatiya lakchixkuwin tlan napulalinankgo kcongregación. Tuku apóstol Pablo wanilh atanu superintendente nema xwanikan Tito kinkamasiyaniyan pi chuna. Pablo tsokgli: «Kmakgxtakgchan anta kCreta xlakata [...] kʼakgatunu kachikin nalakkaxwiliya tiku lakgkgolotsin nalitaxtukgo» (Tito 1:5). Alistalh wa pi chixku tiku kgolotsin xlitaxtuputun xtalakaskin pi “ni xlimawakaka tuku nitlan chu kaj chatum puskat xkgalhilh” (Tito 1:6). Apóstol Pablo na watiya tuku wa kxcarta nema malakgachanilh Timoteo. Wa: «Komo chatum chixku lu liskujma namakgatsi tuku talakaskin xlakata kgolotsin nawan, xla makgtlawaputun akgtum xatlan taskujut. Xlilat pi kgolotsin tlan napulalin xlatamat xlakata latamanin ni natekgskgo tuku nitlan nalimawakakgo, kaj chatum puskat nakgalhi, [...] nakatsini makgalhtawakgenan» (1 Timoteo 3:1, 2.)
Pero ¿tuku xlakata kajwatiya lakchixkuwin tlan lakgkgolotsin nalitaxtukgo kcongregación? Pablo lichuwinalh: «Ni kmasta talakaskin pi puskat namasiya nipara namapakgsi chixku, wata kgalhtsekg kakgaxmatli tamasiy. Xlakata Dios pulana tlawalh Adán chu alistalh tlawalh Eva» (1 Timoteo 2:12, 13). Uma wamputun pi chuna la Dios kamalakatsukilh xapulana latamanin, limasiyalh tiku xlakaskin pi xmasiyalh chu xpulalinalh.
Xlakata Jesucristo wa xPuxkukan putum tiku skujnanikgo Jehová, xlakan stalanikgo xliʼakxilhtit. Lucas lichuwinan pi Jesús «alh klaklanka kachikinin chu klaktsu kachikinin, xlichuwinantilha xatlan tamakatsinin xla xTamapakgsin Dios». ¿Chu tuku tlawakgolh xtamakgalhtawakgen akxni xla kamalakgachalh xlakata xtlawakgolh uma taskujut? «Ankgolh lakgatum klaktsu kachikinin, xlichuwinantilhakgo xatlan tamakatsinin» (Lucas 8:1; 9:2-6).
La uku nachuna tlawakgo kskujnin Jehová. Lakchixkuwin chu lakpuskatin xatapaxuwan makgantaxtikgo tuku wan Mateo 24:14. Anta Jesús lichuwinalh: «Uma xatlan tamakatsinin xla Tamapakgsin natalichuwinan kxlilakgatum katiyatni xlakata natamakatsininan kputum laklanka kachikinin, chu alistalh namin lisputni».
[Dibujo]