Wantuku klaksakli naktlawa akxni aktsujku xakwanit

Kkata 1985, akxni aku xakkgalhi 10 kata, makgapitsi kamanan xalak Camboya chinkgolh kʼescuela niku xakan kColumbus (Ohio, Estados Unidos). Chatum xkatsi makgapitsi tachuwin kʼinglés chu limaklakaskilh makgapitsi dibujos xlakata xkilitachuwinalh tuku lu nitlan xkatlawanikan amakgapitsin, la xmakgninankan chu la xtsalataxtukan. Katsisni xaktasa akxni xaklakpuwan tuku xtitaxtumakgolh. Xakkalitachuwinamputun Paraíso chu talakastakwanat, pero ni xʼakgatekgskgo inglés. Maski aku aktsu kgawasa xakwanit, klakapastakli nakkatsini camboyano xlakata tlan xakkatalichuwinalh Jehová. Nipara tsinu xaklakpuwan pi uma tuku xaklaksaknit lu xlakaskinka xʼama litaxtu kkilatamat.

Tuwa kkatsinilh camboyano. Makgtiy klakpuwa naklimakgxtakga, pero Jehová tlawalh pi kinatlatni xkimatliwakglhkgolh. Alistalh, kimakgalhtawakgenanin chu tiku xakkataʼan kʼescuela kiwanikgolh pi xakkgalhtawakgalh tuku xaklitlajalh lhuwa tumin. Pero akit precursor xakwamputun, wa xlakata kkgalhtawakgalh tuku xkimaxkilh talakaskin xakkgalhilh akgtum taskujut niku ni putum kilhtamaku xakskujli. Akxni xaktaxtu kʼescuela xakkataʼan lichuwinan Dios makgapitsi precursores. Na ktsukulh kkamasiyani makgapitsi tiku xkgalhtawakgamakgo chu xkatsinimakgo inglés, uma lu kimakgtayalh alistalh.

Akxni xakkgalhi 16 kata kkatsilh pi kLong Beach (California, Estados Unidos), xwi akgtum grupo ktachuwin camboyano, klakgapaxialhnalh chu kkatsinilh naklikgalhtawakga uma tachuwin. Akxni ktaxtulh kʼescuela precursor kwa chu chuntiya kkalitachuwinalh Dios camboyanos tiku xwilakgolh lakatsu kkinchik. Akxni xakkgalhi 18 kata xaklakpuwamaja nakan klatama kCamboya. Chuntiya kalipekua xwanit ama país niku xlamakgo max 10 millón latamanin, pero xakkatsi pi ni lhuwa xkalitachuwinankanit xTachuwin Dios. Ama kilhtamaku kaj akgtum congregación xwi chu 13 tiku xlichuwinan Dios kputum país. Akxni xakkgalhi 19 kata kkalakgapaxialhnalh, chu akgtiy kata alistalh anta kkalh latama. Ktekgsli akgtum taskujut niku xakmatitaxti kʼatanu tachuwin chu xakmasiya inglés xlakata tlan chuntiya xaklichuwinalh Dios. Titaxtulh kilhtamaku ktatamakgaxtokgli chatum tala tsumat tiku nachuna xlakapastaka natlawa kxlatamat la akit. Akxtum kamakgtayanitaw lhuwa tiku xalak Camboya natamakamastanikgo Dios.

Jehová kimaxkinit «wakg tu lakaskin [k]inakuj» (Sal. 37:4). Nakalimakgalhtawakgekan Biblia amakgapitsin tlakg makgapaxuwanan nixawa atanu taskujut. Kʼuma akgkuchaxan kata nema klatamanit kCamboya, maski kaj 13 kskujnin Jehová xwilakgolh, la uku wi 12 congregaciones chu 4 grupos. (Kinkalitachuwinanan Jason Blackwell.)