Makgapitsi kgantaxtunit chu makgapitsi ni

¿Katsiputuna tuku nala kilhtamaku nema aku mima? Lhuwa latamanin katsiputunkgo. Wa xlakata lhuwa latamanin wankgo tuku aku nala maski nakgantaxtu o ni nakgantaxtu. Akgtum liʼakxilhtit:

• CIENTÍFICOS laktlawakgo lhuwa tumin, chu maklakaskinkgo tuku xalaksasti xlakata nakatsikgo tuku laktlawama katiyatni, komo nasenan chali, o atanu.

• TIKU PUTSANANIKGO POLÍTICA CHU TUMIN wankgo tuku nala knegocios chu kpolítica. Warren Buffett, chatum chixku tiku tlakg kgalhi tumin xlikalanka kkatiyatni lilakgapaskan Oráculo xlakata lu katsi tuku tlakg nalikgalhikan tumin. Atanu, Nate Silver, limaklakaskin tuku putsanan, la política asta películas nema tlajakgo premios.

• MAKGAPITSI TATSOKGNI XALAMAKGASA xwankanit pi chuna xʼama la. Akgtum liʼakxilhtit, lhuwa lakpuwankgo pi tatsokgni nema ni taʼakgatekgsa xla Michel de Notredame (Nostradamus), xalak siglo XVI, mat kgantaxtuma la uku. Xcalendariojkan mayas nema sputma 21 xla diciembre kata 2012 lhuwa lakpuwankgolh pi xʼama min lisputni uma kilhtamaku.

• LHUWA XPULALINANIN TAKANAJLA lichuwinankgonit pi nitlan tuku xʼama la xlikalanka kkatiyatni, xlakata nakamakatsinikgo latamanin chu tlakg nakgalhikgo kstalaninanin. Harold Camping tiku lichuwinan tuku nitlan nala chu kstalaninanin lichuwinankgolh, pi kKatiyatni xʼamaka masputukan kata 2011. Ni kgantaxtulh tuku xlichuwinankgonit.

• PSÍQUICOS wankgo pi mat katsikgo tuku nala kilhtamaku nema aku mima. Edgar Cayce chu Jeane Dixon kgantaxtulh tuku xlichuwinankgonit nema xʼama la ksiglo XX, pero lhuwa tuku wankgolh ni kgantaxtulh. Akgtum liʼakxilhtit, Dixon lichuwinalh pi kata 1958 xʼama tsuku xliʼakgtutu Guerra xLikalanka Katiyatni, chu Cayce wa pi Nueva York xʼama lakgtsankga kpupunu kxitat kata 1970.

¿Tlan katsikan tuku nala kilhtamaku nema aku mima? Uma takgalhskinin lu xlakaskinka. Komo tlan xkatsiw tuku nala, tanu xwa kilatamatkan, ¿ni xlikana?