¿Kaj wa akxilhaw la tasiya chatum lataman?

DON chatum xtatayana Jehová xalak Canadá, xla liskuja xlakata nakatachuwinan latamanin tiku kaj ktiji lamakgolh. Xla lichuwinan tuku titaxtulh akxni tachuwinalh chatum: «Peter chatum lataman tiku lu lixkajni xlikatsi chu ni xpaxa, chu ni makgtum chuna xaka’akxilha anta ktiji. Lixkajni xkawani amakgapitsin, chu ankgalhin xkatalachipa. Ankgalhin xlakgmakgan tiku xlakgalhaman». Maski chuna, liwaka akgkutati kata Don ankgalhin tlan likatsinilh.

Akgtum kilhtamaku Peter kgalhskilh Don: «¿Tuku xlakata lu kililakgaputsaya? Niti kililakgaputsa. ¿Tuku xlakata wix chuna tlawaya?». Don liwana tachuwinalh chu maklakaskilh Biblia xlakata nalakgchan kxnaku. Pulana kgalhskilh komo xkatsi pi Dios xkgalhi xtukuwani chu wanilh pi xlikgalhtawakgalh Biblia kSalmo 83:18. Alistalh masiyanilh Peter tuku xlakata lu xlilakgaputsa, wanilh pi xlikgalhtawakgalh Romanos 10:​13, 14 nema lichuwinan pi «putum tiku namapakuwi xtukuwani Jehová nalakgtaxtu». Chu xa’awatiya Don likgalhtawakgalh Mateo 9:​36, niku wan: «[Akxni] ukxilhli ntachixkuwitat, kgayaj katsanikgolh; sampi kaj lhtuj xtamakgaxtakgkgonit xtakgawanikgonit xtachuna nkgalhnilu ntu ni kgalhikgoy xmapuchuanina». Alistalh wanilh Peter pi wa xlikgalhtawakgalh. Akxni chuna tlawalh tsukulh tasa chu kgalhskininalh: «¿Na anta kwi niku wilakgolh uma kgalhnilu?».

Peter tsukulh lakgpali xtayat. Paxli, kaxtlawalh xkgalhchixit chu lhakgalh lhakgat nema maxkilh Don. Lata ama kilhtamaku, tsukulh lilakgaputsa xlakata nitu nalixkajwanan chu tlan natasiya.

Peter xtsokga tuku xtitaxtutilha kxlatamat. Tuku pulana tsokgli lu nitlan xtakgaxmata chu lu xatalipuwan, pero lu tanu xwanit tuku xa’awatiya tsokgli. Pulaktum xwan: «Uku kkatsinilh xtukuwani Dios. Akxni ktlawa oración tlan ktachuwinan Jehová. Lu tlan katsikan xtukuwani. Don wan pi Jehová tlan ki’amigo nawan, wa tiku ankgalhin kgalhi kilhtamaku xlakata nakinkgaxmatni, maski kaj xa tukuya kilhtamaku o tuku naklixakgatli».

Xa’awatiya tuku xtsokgnit wa xpalakata xnatalan. Tsokgli:

«Uku nitlan kmakgkatsi. Xlakata klina kata. Pero komo awatiya uma kilhtamaku kwi, kkatsi pi nak’akxilha ki’amigo Don anta kParaíso. Komo likgalhtawakgapatit uma, nakatsiyatit pi nialhtu klama. Pero komo akxni nakimaknukan na’akxilhatit chatum chixku tiku tanu likatsi nixawa amakgapitsin, katachuwinantit, chu katlawatit litlan kalikgalhtawakgatit uma libro xaspupuku [xkilhchanima likgalhtawakga nema pulalinan la likgalhtawakgakan Biblia La verdad que lleva a vida eterna, nema nina makgas xmakglhtinanit].a Wan pi tlan nak’akxilhpara ki’amigo kParaíso. Xliputum kinaku kkanajla. Mintalakan tiku lu kapaxkiyan, Peter».

Akxni maknuka, Ummi, xtala tsumat Peter, wa: «Akgtiy kata la Peter tsukulh kintachuwinan. Xlimakgtum lata makgasa, xtasiya pi xpaxuwa. Chu asta xlitsin». Wanilh Don: «Naklikgalhtawakga libro nema lakgpalinilh xnaku kintala, xlakata max lu xlakaskinka». Ummi na lakaskilh pi chatum xtatayana Jehová xlakgapaxialhnalh xlakata tlan xlikgalhtawakgakgolh libro ¿Tuku xlikana masiya Biblia?

Akinin na tlan chuna natlawayaw, ni kaj wa na’akxilhaw la tasiya chatum lataman, nalimasiyaniyaw tapaxkit chu ni lakapala nakatasitsiyaw (1 Tim. 2:​3, 4). Komo chuna natlawayaw, max latamanin nalakgpalikgo xlatamatkan la Peter, maski nitlan tasiyakgo, pero tlan likatsikgo. Liwana katsiyaw pi Dios «xla akxilha tuku wi knaku», xla tlan namastaka tuku xaxlikana anta kxnakujkan tiku lakgtalakatsuwiputunkgo (1 Sam. 16:7; Juan 6:44).