¿Xkatsiyata?

¿Xlimaklakaskinkan xLimapakgsin Moisés xlakata nalakkaxtlawakan laklanka taʼakglhuwit kxamakgan Israel?

UMA li’akxilhtit nakinkamasiyaniyan pi lakgachunin xtamaklakaskin. Deuteronomio 24:14, 15 kinkawaniyan: «Ni naʼakgskgawiya chatum skujni tiku nitu kgalhi chu limaxkgen, maski wa mintala o chatum tiku anta lama kminkachikin [...] xlakata ni naliwani Jehová mimpalakata, chu chuna max nalitayaya talakgalhin».

Lakatsu kkachikin xla Asdod, tekgska xatapakglhni xalu nema lichuwinan tuku lalh ksiglo 7 akxni nina xmin Jesús. Tuku lichuwinan xtachuna tuku tatakgsa kDeuteronomio 24. Xlichuwinamaka chatum chanana tiku ni xokgolh xtachanan. Wan: «Alistalh akxni akit miskujni [tiku malakgsiyanama] akxni nina makgas xakmakikgonit tachanan, milh Hoshayahu xkgawasa Shobay chu lilh kilhakgat. [...] Putum tiku xakkataskujma katsikgo [...] pi tuku klichuwinama xaxlikana. Akit ni klin kuenta. [...] Komo mapakgsina akxilha pi ni wa lakgchan nawan komo nakimaspitnikan kilhakgat, kakilakgalhamanti chu kakimaxki. Talakaskin namakgtayaya miskujni xlakata makglhtikanit klhakgat».

Historiador Simon Schama wan pi tuku xlama «ni kaj watiya xlichuwinama pi xlilakgaputsama xlakata namaxkikan [klhakgat] uma skujni». Chu lichuwinampara: «Wan pi tiku xmalakgsiyanama xlakgapasa limapakgsin xla Levítico chu Deuteronomio niku xlichuwinan pi talakgalhin kitaxtu komo nitlan nakalikatsinikan tiku lakglimaxkgenin».