Niku mastakan xatakgalhtin akgtum takgalhskinin
◼ ¿La tlan kimputumkan namakgtayananaw ktamakxtumit xalak congregación xlakata nitu natlawa pi nila nakatsiniyaw xlakata Dios? (Deu. 31:12.)
Xlakata maxkiyaw kakni Jehová chu tamakxtumit xalak congregación nema kinkamaxkiyan, kimputumkan kinkawanikanan pi sokg nachanaw chu skgalalh natawilayaw xlakata xla nakinkamasiyaniyan. Tlan nawan komo kxlakatin natawilayaw chu namakgxtakgaw putawilh nema wilakgo asta kkinkgenkan o kxtankgen, xlakata anta natawilakgo tiku kgalhikgo laktsu kamanan chu tiku min kilhtamaku ni sokg chinkgo. Akxni nina tsuku tamakxtumit talakaskin nakaxtlawakgo kcelularkan xlakata ni natakgaxmata akxni namakasanan xlakata ni natlawa pi tiku wilakgo ktamakxtumit nialh kuenta natlawakgo. Komo kimputumkan akxilhaw pi ktamakxtumit kakninaniyaw Jehová, ni lu katianalh tuku natlawa pi ni kuenta natlawayaw (Ecl. 5:1; Fili. 2:4).
Akxni wi tiku tsuku an ktamakxtumit, tlan napaxtutawila chatum xalak congregación tiku lakgapasa. Uma lu nakamakgtaya tiku kgalhikgo xalaktsujku xkamanan, xlakata xlikatsinitkan la natawilakgo ktamakxtumit. Max familia xlimakgtumku amakgo ktamakxtumit, chu max tlan nalimakgkatsikgo pi ni nakawilikan asta klakatin. Chuna, komo natlatni nataxtukgo tsinu akxni wi tuku namaklakaskinkgo xkamanankan, uma ni katitlawalh pi amakgapitsi nialh kuenta natlawakgo (Pro. 22:6, 15). Umakgolh familias ni alakatunu natawilakgo niku tlan nakgamanankgo xkamanankan. Tlakg tlan nawan komo xatlat o xatse nakatamakxtu tsinu xkamanan xlakata nakastakyawa o nakamaxki tuku maklakaskinkgo chu alistalh nakatamaknupara ktamakxtumit.
Kaxwilinanin makgtayanankgo xlakata niku kakninanikan Dios natawila chuna la xlilat. Kamakgtayakgo familias xlakata tlan natekgskgo niku natawilakgo chu wantiku min kilhtamaku ni sokg chan, chu kuenta tlawakgo la nakawanikgo amakgapitsi niku natawilakgo, ni kakilhnikgo chu chuna ni tlawa pi amakgapitsi nialh kuenta natlawakgo. Kuenta tlawakgo la nalakkaxtlawakgo tuku tlawama pi amakgapitsi nialh nakgaxmatkgo tuku lichuwinamaka. Komo chatum aktsu kgawasa tlawama pi amakgapitsi nialh kuenta natlawakgo, kaxwilinanin xatapaxuwan makgtayanankgo.
La akxilhwi, kimputumkan tlan namakgtayananaw pi tamakxtumit tlan natawila chu tlan nakatsiniyaw xlakata Jehová chu tuku lakapastaknit nalimin, xasasti kakilhtamaku niku naʼanan tuku xaʼakgstitum chu na ni katianalh taʼakglhuwit (Heb. 10:24, 25).