Kakamaxkiw tiku laktsujku chu tiku laklankata Ki libro xla takgalhtawakga xalak Biblia
1. ¿Tukuya liʼakxilhtit limasiya pi libro Takgalhtawakga xalak Biblia na likgalhtawakgaputunkgo tiku laklankata chu tuku xlakata?
1 «¡Klakaskin ama xalanka chu xasmukuku!» Wa uma tuku skilh chatum puskat tiku lina kata akxni akxilhli pi xtalakatsu xmaxkikanit maktum libro Takgalhtawakga xalak Biblia. Puskat tataxtulh xlixtokgo chu xwan: «¡Putum kamaxkitit libro chu akit nitu kilamaxkimaw!». Natalan tunkun maxkikgolh xaʼawatiya libro nema xkgalhikgo. Uma liʼakxilhtit nema lichuwinan Anuario 2009 limasiya pi tiku laklankata chu ni kajwatiya tiku laktsujku likgalhtawakgaputunkgo uma libro. Pero ¿tuku xlakata namastayaw kxatotonaco chu la natlawayaw?
2. ¿Tuku xlakata uma likgalhtawakga tlakg nalikgalhtawakgaputunkan kmakgapitsi tachuwin?
2 Biblia nema anan kxatotonaco ni xatakgatsin. Xlakata kmakgapitsi tachuwin ni xatakgatsin anan Biblia, o latamanin ni kgalhikgo kxtachuwinkan, wa xlakata lakgatikgo libro Takgalhtawakga xalak Biblia. Uma libro limin 116 takgalhtawakga chu 125 dibujos nema kgalhi color kinkamasiyaniyan tuku lichuwinan Biblia. Nachuna, xlakata ni maklakaskin xalaktuwa tachuwin tlawa pi tiku nalikgalhtawakga nakatsi tuku lichuwinan Biblia chu naʼakgatekgsa o namakgachakgxi. Chuna tlan nakatsikgo pi “xlipaks tatsokgni lu tlan” (2 Tim. 3:16).
3. ¿Tiku tlan nakamaxkiyaw?
3 Tiku tlan nakamaxkiyaw libro. Tlan namastayaw akxni anaw lichuwinanaw Dios akgatunu chiki chu akxilhaw pi tiku tachuwinamaw kgaxmata. Na tlan nakamaxkiyaw tiku kamakgalhtawakgayaw chu tiku ankgo ktamakxtumit akxni lakapastakkan akxni tinilh Jesús o ankgo kaj kmakgapitsi tamakxtumit nema tatlawa kcongregación, chu na nakamaxkiyaw tiku makglhtinankgo revistas. Xlikana, uma lu kamakgtaya xlakata “paks latamanin nalakgapaskgo wa talulokgtat” o xaxlikana (1 Tim. 2:4).
4. ¿Tuku tlan nawanaw akxni namastayaw libro Takgalhtawakga xalak Biblia?
4 Tuku nawanaw akxni namastayaw. Kalakkaxwili tuku nawana nema nakgaxmatputunkan niku lichuwinana Dios chu tiku katachuwinana. Max akxni wanitata kgalhen tlan nawana: «Lhuwa latamanin kakgalhskinkan tuku xlakata Dios malakatsukilh kakilhtamaku chu latamanin. ¿Tukuya libro xmaklakaskinti xlakata tlan natekgsa xtakgalhtin? [Kamaxki talakaskin nakgalhtinan.] Biblia wa matsokgninalh Dios [kalikgalhtawakga 2 Timoteo 3:16]. Uma libro kgalhi 116 takgalhtawakga xalak Biblia chu 125 dibujos nema namakgtayayan xlakata tlan natekgsa xtakgalhtin uma takgalhskinin [kamalaki libro ktakgalhtawakga akgtiy chu kalikgalhtawakga párrafo akgkitsis]». Kawani tiku tachuwinanti pi maxkiputuna libro. Akxni nalakgpimparaya, kalakpuwanti pi natsukuya limakgalhtawakgeya libro ¿Tuku xlikana masiyay Biblia?
5. ¿La nakamakgtaya tiku likgalhtawakgakgo uma libro chu tuku nalakpuwanaw natlawayaw?
5 Libro takgalhtawakga xalak Biblia limin liʼakxilhtit nema namakgtaya kstalanina Cristo la nalin xlatamat, xlakata ni tuwa la lichuwinan latamanin tiku xatlan chu nixatlan liʼakxilhtit wilikgolh nema lichuwinan Biblia. Nachuna, kinkamakgtayayan nakatsiyaw tukuya kata latamakgolh chalhuwa tiku tsokgkgolh Biblia, chu uma kamakgtaya tiku kamakgalhtawakgemaka naʼakgatekgskgo wantuku pulana masiya Biblia. ¡Lu lanka talakgalhaman kgalhiyaw xlakata tlan nakamaxkiyaw putum latamanin uma lu xlakaskinka likgalhtawakga! (Hech. 10:34, 35.)