¡Talakaskin tiku namasiyakgo akgtum tachuwin!
1. ¿Tuku xlakata xlikalanka katiyatni lakkaxwilikan cursos niku tlan lakapala katsinikan akgtum tachuwin?
1 Jehová kinkasikulunatlawanitan xlakata “putum kalitachuwinamaw xalakwan xalaksasti tamakatsin” latamanin tiku kgalhikgo “atanu xtachuwinkan” (Hech. 20:24; Apo. 7:9). Nachuna, «skujni, luwa xatalipaw, chu na luwa akgskgalalh» lhuwa tuku limaklakaskinkgo xlakata tlan nakamasiyanikgo tiku tanu tachuwin chuwinankgo (Mat. 24:45). Wa xlakata, xlikalanka katiyatni lakkaxwilikgo cursos niku tlan lakapala katsinikan akgtum tachuwin. Xlakata tlan chuna tlawakan, akgatunu kata chalhuwa kamasiyanikan xlakata tlan nakamasiyanikgo amakgapitsi.
2. ¿Tuku xlakata chuntiya talakaskin tiku namasiyakgo atanu tachuwin?
2 Akgkitsis kata nema titaxtunit, kMéxico kamaxkikanit uma curso 144 natalan xlakata tlan namasiyakgo chu 34 tanu tanu tachuwin chuwinankgo unu kMéxico. Xlakata tuku tlawakgolh umakgolh makgalhtawakgananin, liwaka akgkututu mil xlichuwinanin xTamapakgsin Dios kamasiyanikanit xlakata tlan nakalitachuwinankgo Dios tiku kgalhikgo atanu tachuwin. Pero, kMéxico wilakgo 68 tanu tanu tachuwin chu 364 variantes. Uma limasiya pi ananku lhuwa taskujut nema xlitatlawat. Wa xlakata, komo wix chuwinana atanu tachuwin, ¿tlan xtlawa la Isaías tiku wa: «¡Unu kwi! Akit kakimalakgacha»? (Isa. 6:8.) ¿Tuku xlimakgatsitkan tiku na mastaputunkgo uma curso? ¿Tukuya tamakgtay kgalhikgo?
3. ¿Tuku talakaskin xlakata wi tiku namasiya akgtum tachuwin?
3 Tuku talakaskin. Tuku tlakg talakaskin wa pi tliwakga natawila xtakanajlakan. Wa xlakata, kalaksakkan lakgkgolotsin chu siervos ministeriales. Maski ni wankan tukuya kata xlikgalhitkan, talakaskin pi tliwakgaku xliwanatkan. Tlan nalaksakkan tiku tamakgaxtokgnit chu tiku ni. Maski talakaskin pi lata laktsujku xlichuwinatkan uma tachuwin, tuku tlakg talakaskin wa pi liwana xlikatsinitkan uma tachuwin. Tiku makgalhtawakgana wamputunkgo, talakaskin pi namakatsinikgo superintendente xla circuito, xla malakgacha kapsnat niku tlan kalichuwinan chu na malakgacha xkapsnatkan lakgkgolotsin xalak kxcongregación.
4. ¿Tuku natlawa sucursal chu superintendente xla circuito xlakata nalakkaxwilikgo curso?
4 Tuku tlawa sucursal. Sucursal nakatachuwinan natalan tiku nakalaksakkan xlakata tlan namasiyakgo, chuna sucursal nakatsi komo chuntiyaku tlan namakgalhtawakganankgo. Alistalh nakamalakgachanikan invitación xlakata naʼankgo ksucursal xlakata nakamasiyanikan la namakgalhtawakgenankgo. Sucursal nalakkaxwili pi chatum superintendente xla circuito nakalaksaka lakgkgolotsin tiku namakgtaya nalakkaxwilikgo la natlawakan curso. Uma natlawa pi makgalhtawakgena kaj wa nalakpuwan la namasta curso. Superintendente xla circuito na nalaksaka asta puxamachaxan tiku nakamasiyanikan (1 Cor. 14:40).
5. ¿La tlan namastakan curso?
5 Tuku xlitlawat makgalhtawakgena. Makgalhtawakgena nawani superintendente xla circuito tukuya hora tlan namasta curso. Curso ni xlilakatsalat akgchaxan papaʼ chu komo ni anan lhuwa kilhtamaku akgatunu semana tlan namastakan maski kaj akgtum o asta akgtutu hora. Nachuna komo makgalhtawakgena tlan makglhuwa namasiya akgtum semana, curso tlan namakgapala akgtum papaʼ o maski ni nachan.
6. ¿Tukuya liʼakxilhtit limasiya pi Jehová kasikulunatlawa wantiku makgalhtawakganamputunkgo?
6 ¿Nakilamakgtayayaw? Max natawilakgo natalan tiku namakgkatsikgo pi nila masiyakgo xtachuwinkan o max maxanankgo. Pero espíritu santo nakamakgtaya xlakata tlan natlawakgo xtalakaskin Jehová (Juan 14:16). Chuna limasiya akgtum carta nema malakgachalh ksucursal chatum makgalhtawakgena: «Kkawaniputunan pi nitu kanit kʼescuela. Katsinilh la kgalhtawakgakan chu la tsokgnankan anta kcongregación. Akxni nina xkimasiyanikan la tlan nakmasta curso, xakmakgkatsi pi nila xakama makgantaxti uma taskujut nema xaklakgaya. Pero xlakata kimakgtayama Jehová, la uku kkatsinima la makgalhtawakganankan. Akxni kmasta curso kakxilha la xespíritu santo Jehová kamakgtaya tiku kgalhtawakgamakgolh chu la kimakgtaya. Kkasipijni niku klama, ni lu anan tumin. Pero akinin xlakskujnin Jehová kmakgkatsiyaw pi lhuwa tuku kkgalhiyaw xlakata klakgapasaw Dios».
7. Xlakata skinaw kʼoraciones pi Jehová tlakg kamalakgachalh kskujnin xlakata nalichuwinankgo xlimapakgsin, ¿tuku kilitlawatkan?
7 Jehová kgalhtinama oraciones niku skinaw pi tlakg kamalakgachalh kskujnin xlakata nalichuwinankgo xlimapakgsin (Mat. 9:38). Xlikana, kamalakpuwani lhuwa mil precursores chu tiku lichuwinankgo Dios xlakata naʼankgo makgtayanankgo niku tlakg talakaskin nalichuwinankan xTamapakgsin Dios kʼatanu tachuwin. ¿Na kamasiyaniputuna mintachuwin tiku katsiniputunkgo? Komo chuna, liwana kakatsi pi Jehová nasikulunatlawa putum taskujut nema natlawaya (Mal. 3:10).