Akgtum lipaxuw taskujut
1. ¿Tukuya taskujut la kaj kalimapaksamaka latamanin uku?
1 Lu lipaxuwakgolh tiku akxilhkgolh akxni kamapaksaka latamanin kxapulana siglo (Luc. 5:24-26). Nachuna, kinkamakgapaxuwayan uku xlakata la kaj kamapaksamaka latamanin xlakata kamakgtayamaka nalakgapaskgo Jehová (Apo. 22:1, 2, 17). Lu paxuwayaw akxni likgalhtawakgayaw liʼakxilhtit nema limasiya pi xTachuwin Dios chu espíritu santo kalakgpali xlatamatkan latamanin tlakg lipaxuwayaw akxni staka xtakanajla tiku makgalhtawakgayaw.
2. ¿Tukuya tapaxuwan nakgalhiyaw akxni wi tiku namasiyaniyaw tuku xaxlikana?
2 ¿Tuku wanikan Dios? ¿Tuku xlakata masta talakaskin naʼanan tapatin? ¿Tuku natlawa xTamapakgsin xpalakata latamanin? Lipaxuw kakgalhtiyaw takgalhskinin la umakgolh, pero tlakg paxuwayaw akxni akxilhaw la paxuwa akxni katsi tuku xaxlikana tiku kamakgalhtawakgayaw (Pro. 15:23; Luc. 24:32). Nachuna, akxni nastaktilha xtakanajla, tsuku maklakaskin xtukuwani Jehová, lakgpali la takaxtaya chu xtalhakgan chu makgxtakga nitlan talismanin chu lichuwinan tuku katsinima. Komo natamakamastani Dios chu natamunu, kintalakan nalitaxtu chu tlan nataskujaw. Putum uma tuku tlawa tiku makgalhtawakgamaw, lu kinkamakgapaxuwayan (1 Tes. 2:19, 20).
3. ¿Tuku natlawayaw xlakata natekgsaw tiku namakgalhtawakgeyaw?
3 ¿Tlan namakgtayanana? Komo makgtlawaputuna uma lipaxuw taskujut, kaskini Jehová kamakgtayan xlakata natekgsa tiku namakgalhtawakgaya chu chuna natlawaya tuku naskina kmiʼoración (1 Juan 5:14). Kalichuwinanti Dios niku nakatatanokglha latamanin. Kawani pi makgalhtawakgaputuna akxni masta talakaskin tiku tachuwinampat (Ecl. 11:6). Chu komo natekgsa tiku nakgaxmata chu masiyani tuku xaxlikana, kataspitpara xlakata namunuwiliya (1 Cor. 3:6-9).
4. ¿Tuku xlakata lu kawaniyaw latamanin pi kalimakgalhtawakgaputunaw Biblia?
4 Lhuwaku wilakgo latamanin tiku lu katsiputunkgo tuku xaxlikana. ¿Tiku namakgalhtawakge xlakata tlan nakatsini xlakata Jehová? (Mat. 5:3, 6.) Chapaxuwana kamakgmasputuw xlakata la talichuwinama Dios chu kakamakgalhtawakgaw amakgapitsi xlakata nina a sputa uma taskujut (Isa. 6:8).