Ni kaj akglakgwa kakgaxinaw
1. ¿Tuku kilhchanima tachuwin nema tatsokgtawilanit 1 Corintios 9:26 akxni lichuwinanaw Dios?
1 Apóstol Pablo tsokgli: «Akit ni kkgosnan la tiku ni katsi tuku natlawa, ni kaj akglakgwa kkgaxinama» (1 Cor. 9:26, NM). Akxni Pablo wa uma tachuwin, xwamputun pi xla liwana xmakgantaxtiputun tuku xlakpuwanit natlawa kxtaskujut Dios. Pero uma, na kilhchanima akxni akinin lichuwinanaw Dios, xlakata akinin lakaskinaw pi akxni «nakgaxinanaw», o naliskujaw, tlan nakinkakitaxtuniyan. ¿La tlan chuna natlawayaw?
2. ¿La natlawayaw xtachuna la Pablo chu amakgapitsi tiku xlichuwinankgo Dios kxapulana siglo akxni nalaksakaw niku nalichuwinanaw Dios?
2 Kaputsaw niku wilakgolh latamanin. Pablo chu amakgapitsin tiku xlichuwinankgo Dios kxapulana siglo xʼankgo lichuwinankgo Dios niku xkatsikgo pi xkatekgskgolh latamanin (Hech. 5:42; 16:13; 17:17). Komo niku lichuwinanaw Dios latamanin tatekgskgo kxchikkan katsisni, max tlakg tlan nakitaxtu uma hora naʼanaw lichuwinanaw Dios. ¿Na wilakgo lhuwa latamanin kʼterminal xla autobuses, tsisa, kakgotanun, o smalankgan, akxni amakgo kxtaskujutkan o taspitmakgolha? ¿Tuku hora tsamakan niku anan negocios niku lichuwinana Dios? Max tlakg tlan nakitaxtu komo uma hora nalichuwinana Dios ktiji.
3. ¿Tuku tlan natlawayaw xlakata liwana natlawayaw kintaskujutkan niku lichuwinanaw Dios?
3 Liwana kalakapastakwi la tlakg tlan nalichuwinanaw Dios niku kinkalakgchanan. Atanu la tlakg tlan natlawayaw kintaskujutkan wa akxni liwana lakkaxwiliyaw la nalichuwinanaw Dios niku kinkalakgchanan. Akgtum liʼakxilhtit, akxni kamalakgachakan lhuwa natalan watiya territorio, tamaklakaskin lhuwa kilhtamaku chu tlawa pi tiku pulalima la nalichuwinankan Dios nakgalhi lhuwa taskujut xlakata putum nakgalhikgo niku nalichuwinankgo Dios. Tlakg tlan xwa komo xmakgpitsika. Akxni natalan ankgo lichuwinankgo Dios tlakg tlan xwa komo ni lhuwa xʼankgolh watiya kputlaw xlakata liwana nalichuwinankgo Dios niku lakgamakgat tlawa pi tlakg tlan natakgalhchuwinankgo tlakg lhuwa latamanin. Nachuna, tlan naskinaw niku nalichuwinanaw Dios lakatsu kkinchikkan. Komo chuna natlawayaw kilhtamaku nema nalimaklakaskinaw xlakata nalichanaw ni lhuwa katiwa.
4. ¿Tuku nakinkamakgtayayan xlakata tlan «xchipananin chixkuwin» nawanaw?
4 Jesús wa pi tiku xlichuwinankgo Dios «xchipananin chixkuwin» (Mar. 1:17). Xatlan xchipana skiti, o tamakgni, ni kaj makgan xtsalh kchuchut, wata lakputsanan la nakachipa skiti: putsa tuku hora taxtukgo chu niku tlakg anan chu lakapala tsuku kachipa. Xlakan, liwana tlawakgo xtaskujutkan. Nachuna akinin katlawaw kintaskujutkan.