Kalipaxuwaw tuku nakitaxtu xlakata kintaskujutkan
1. ¿Tuku max natlawa pi nialh xatapaxuwan nalichuwinanaw Dios?
1 Dios tlawalh chixku xlakata tlan «nalipaxuwa xlakata lhuwa skujnit» (Ecl. 2:24). Wa xlakata, akxni ni akxilhaw tuku tlan kitaxtu akxni lichuwinanaw Dios, max xlajwananaw chu nialh paxuwayaw. ¿La tlan chuntiya napaxuwayaw?
2. ¿Tuku xlakata nalakpuwanaw pi tlan nakitaxtu?
2 Kalakpuwaw pi tlan nakitaxtu. Maski ni lhuwa tiku kgalhakgaxmatkgolh Jesús, nila nawanaw pi nitlan kitaxtunilh akxni lichuwinalh Dios (Juan 17:4). Akxni lichuwinalh chatum chanana, Jesús wa pi xʼama anan tiku ni xkgaxmatkgolh tamakatsin xla Tamapakgsin (Mat. 13:3-8, 18-22). Pero kaʼakxilhwi putum tuku lu tlan makgantaxtiyaw.
3. ¿La mastayaw tawakat maski ni kinkakgaxmatnikanan?
3 La mastayaw tawakat. Xliʼakxilhtit chanana wamputun pi tiku nakgaxmata tamakatsin xla Tamapakgsin namastakgo «xatawakat» (Mat. 13:23). Akxni xakiwi trigo staka chu katlan, ni kaj xasasti xakiwi tsuku taxtuni, wata xasasti talhtsi taxtu. Nachuna, tawakat nema masta kstalanina Cristo ni kajwatiya natlawa xasasti tamakgalhtawakgen, wata namalhuwi talhtsi, uma wamputun pi makglhuwa makglhuwa nalichuwinan xTamapakgsin Dios. Chuna tlawa pi “nalipaxuwayaw”, maski latamanin ni kinkakgaxmatnikgoyan. Akxni lichuwinanaw Dios, makgtayananaw pi natasantujtlawa xtukuwani Jehová (Is. 43:10-12; Mat. 6:9). Chu akgtum lanka talakgalhaman akxtum taskujkan Dios (1 Cor. 3:9). Chu Jehová lipaxuwa xlakata makamaxkiyaw «kintachuwinkan tu limaxkiyaw kakni» (Heb. 13:15, 16, Hua Xasasti Talaccaxlan, 1999).
4. ¿Tukuya tawakat max mastaw maski ni nakatsiyaw?
4 Na kalakapastakwi pi namin kilhtamaku ni katiʼakxilhwi tuku lu liskujwi. Max makgapitsi tiku kgaxmatnikgolh Jesús ni kstalanina litaxtukgolh akxni xlamajku kKatiyatni. Nachuna, max talhtsi xla Tamapakgsin nema chanaw kxnaku tiku kinkakgaxmatnin ni lakapala tsuku tatliwakglha chu staka, asta max na xtatayana Jehová nawan alistalh chu akinin ni katikatsiw. Liwana tasiya pi lichuwinanaw Dios wi tuku tlan kitaxtu. Wa xlakata chuntiya “kamastaw lhuwa xatawakat” chu kalimasiyaw pi xtamakgalhtawakgen Jesús akinin (Juan 15:8).