Carta xla Lakgkgolotsin tiku Pulalinkgo xTatayananin Jehová
Kinatalankan tiku kkapaxkiyan:
KinTlatkan xalak akgapun, Jehová, wa tlakg xatlan liʼakxilhtit xla tapaxkit. Wa xlakata Biblia wan pi: «Dios tapaxkit» (1 Juan 4:8). Maski wa tiku kgalhi putum litliwakga, kxTachuwin nikxni wan: «Dios litliwakga». Wa tuku tlakg xlakaskinka kxtamapakgsin wa tapaxkit, chu wa tuku tlawa natalakatsuwiniyaw.
Lu lipaxuwayaw xlakata Jehová ni xafuerza kinkawaniyan naskujniyaw. Ni kaj akglakgwa mapakgsinan. Xla lakaskin kaskujniw xlakata paxkiyaw xliputum kkinakujkan, o anima. Chuna limasiyayaw pi lakaskinaw kakinkamapakgsin, xlakata liwana katsiyaw pi xaʼakgstitum tlawa chu xapaxkina. Chu chuna litasiyanit akxni kamalakatsukilh latamanin.
Jehová ni tlawalh pi Adán chu Eva xafuerza xkgalhakgaxmatkgolh; wata kamaxkilh talakaskin xʼakstukan xlaksakkgolh tuku xtlawaputunkgo. Komo lu xlikana xtipaxkikgolh chu xpaxtikatsinikgolh tuku xkamaxkinit Jehová, ni xtimastakgolh talakaskin pi Satanás xkamatlawilh pi nialh nakgalhakgaxmatkgo Jehová.
Titaxtulh kilhtamaku, Moisés kxaʼawatiya xtaʼakgchuwin kawanilh israelitas: «La uku kwili kmilakatinkan latamat chu tuku tlan, chu linin chu tuku nitlan» (Deut. 30:15). Uma kachikin kamaxkika talakaskin nalaksakkgo la xlatamaputunkgolh. Nachuna, Josué kawanilh: «Komo nitlan akxilhatit naskujniyatit Jehová, kalaksaktit uku tiku skujniputunatit». Israelitas kgalhtikgolh Josué: «Ni xlilat, nakmakgxtakgaw Jehová, kimpalakatakan» (Jos. 24:15, 16). Akinin nachuna makgkatsiyaw. Paxkiyaw Jehová chu «ni xlilat» nalakpuwanaw namakgxtakgaw.
Akinin kstalaninanin Cristo akgatekgsaw tuku kilhchani akstu laksakkan tuku tlawaputunkan. Maski lakgkgolotsin kgalhikgo limapakgsin xlakata nakinkastakyawakgoyan, pero ni mapakgsiputunkgo xlatamatkan o xtakanajlakan amakgapitsin. Apóstol Pablo tsokgli: «Ni wa xpalakata mpala kaj kilitlankakan [o xmalanakan] [...] mintakanajlakan, wampi kaj kmakgamakgtayaputunaw mintapaxuwankan nkin, xampi wa xpalakata mintakanajlakan, tliwakglh liwilatit» (2 Cor. 1:24).
Akxni wi tuku tlawaputunaw tlakg lipaxuwayaw, nixawa akxni kaj fuerza nakinkamatlawikanan. Jehová kinkawaniyan katlawaw tuku tlan xlakata paxkinanaw. Litasiya pi chuna kilitlawatkan xlakata tuku apóstol Pablo: «Chu lapi xakmapapitsilh xlipaks nkimakaʼananat, [o tuku kkgalhi] lakimpi naklimawikgoy limaxkganin, chu lapi xakmakamastalh nkintiyatliwa [...] ni xakkgalhilh wa ntapaxkit, ni tu xlakgasi ntu xakkilitaxtulh» (1 Cor. 13:3).
Lu lipaxuwa Jehová, akxni akxilha pi lhuwa millones kinatalankan skujnikgo xlakata paxkikgo xliputum xnakujkan.
Chu Jehová na lu kapaxki xlakskujnin. Na kapaxkiyan wixin laktsu kamanan, lakgkgawasanku tiku paxkiyatit Jehová nixawa tuku anan chu tuku lipaxuwakan kkakilhtamaku. Na liwana kakatsitit pi akinin na lu kkapaxkiyan (Luc. 12:42, 43).
Xlakata wixin natalan, lakgkgawasan chu laktsuman lu paxkiyatit Jehová, katata skujnitit 1,748,697,447 horas akxni lichuwinantit xalakwan xalaksasti. Nachuna xlakata paxkikgo skujnikgolh 7,782,346 xlikalanka katiyatni. Na lu lipaxuwayaw pi 268,777 na kinatalankan wankgolh, lhuwa lakgkgawasan chu laktsuman xlakata tamakamastanikgolh Jehová chu tamunukgolh. Uma wamputun pi 5,168 tamunukgolh akgatunu semana. ¡Uma lu kinkamakgapaxuwayan!
Uma xlisputni kilhtamaku, xkachikin Dios titaxtuyaw lhuwa taʼakglhuwit, tuku tuwa, kinkaputsastalanikanan, tajatat chu lhuwa tiku linkgoya kata. Pero liwana lakapastaknitaw pi nikxni nataxlajwaniyaw. Lu kkapaxkiyan mimptumkan (Heb. 10:39; 2 Cor. 4:16).
Minatalankan,
Lakgkgolotsin tiku Pulalinkgo xTatayananin Jehová