¿Tuku kinkamatliwakglhan nalichuwinanaw Dios?
1. ¿La tatalakxtumi tapaxkit chu akxni lichuwinankan Dios?
1 Lichuwinankan xalakwan xalaksasti xla xTamapakgsin Dios wa tlakg tlan taskujut la uku kilhtamaku, xlakata chuna lakgachixkuwiyaw umakgolh pulaktiy limapakgsin: kgalhiniyaw tapaxkit Jehová chu latamanin (Mar. 12:29-31). Tapaxkit kinkamaxkiyan litliwakga xlakata chuntiya nalichuwinanaw Dios (1 Juan 5:3).
2. ¿Tuku xlakata wanaw pi akxni lichuwinanaw xTachuwin Jehová limasiyayaw pi paxkiyaw?
2 Tapaxkit nema kgalhiniyaw Jehová. Tapaxkit nema kgalhiniyaw kiAmigojkan tiku tlakg paxkiyaw, Jehová, kinkamatliwakglhan natatayayaw xlakata Satanás lixkajni lichuwinama chuna la titaxtunit akgchaxan mil kata (2 Cor. 4:3, 4). Kaj xlakata xkuenta Akgskgawini, latamanin lakpuwankgo pi Dios kamapatini makglakgalhinanin kpupatin, kamakanajli pi Dios akgtum trinidad chu wan pi Dios ni kapaxki latamanin. Chu lhuwa latamanin lakpuwankgo pi Dios ni anan. ¿Xlikana pi lakaskinaw pi putum latamanin xkatsikgolh xaxlikana xpalakata kinTlatkan xalak akgapun? Akxni liskujaw chu limasiyayaw pi xtatayanin akinin, makgapaxuwayaw xnaku chu tlawayaw pi ni nakanajlanikan Akgskgawani (Prov. 27:11; Heb. 13:15, 16).
3. ¿Tuku xlakata wanaw pi akxni kalitachuwinanaw xTachuwin Dios latamanin kalimasiyaniyaw tapaxkit?
3 Tapaxkit nema kgalhiniyaw latamanin. Akxni chatum lataman litachuwinanaw xTachuwin Dios, limasiyaniyaw kintapaxkitkan. Katsiyaw pi latamanin lu lakaskinkgo nakgaxmatkgo xalakwan xalaksasti la uku katuwa kilhtamaku. La uku latamanin xtachuna la ninivitas, «tiku ni katsikgo tuku tlan chu tuku nitlan» (Jon. 4:11). Pero akxni litachuwinankgoyaw xTachuwin Dios makgtayakgoyaw tlan latamat nalinkgo chu napaxuwawkgo (Is. 48:17-19). Chu maxkikgoyaw takgalhkgalhin (Rom. 15:4). Chu komo nakgaxmatkgo chu natlawakgo tuku katsinikgo, nakgalhikgo lakgtaxtut (Rom. 10:13, 14).
4. ¿Tuku nalakapastaka Jehová xliputum kilhtamaku?
4 Chatum kgawasa tiku tlan likatsi putum kilhtamaku kalimasiyani tapaxkit xnatlatni chu ni kaj akxni lakaskin. Nachuna, tapaxkit nema kgalhiniyaw Dios chu latamanin tlawa pi putum kilhtamaku nalichuwinanaw Dios, chu ni kaj akxni anaw akgatunu chiki. Wa xlakata chuntiya kalichuwinaw Dios (Hech. 5:42). Komo chuna natlawayaw, nalimasiniyaw tapaxkit Jehová chu xla nikxni katipatsankgalh (Heb. 6:10).