Katlawatit chuna la tlawakgolh palakachuwinanin: Joel
1. ¿Tuku liʼakxilhtit kinkawilinin Joel, nema akinin na tlan natlawayaw?
1 ¿Tiku xwanit palakachuwina Joel? Libro nema lin xtukuwani, kaj wan pi «xkgawasa Petuel» xwanit (Joel 1:1). Uma skujni nikxni litlankajwanalh tuku xtlawa wata wa malankilh xtamakatsin Jehová. Akinin nachuna tlawayaw, ni putsayaw pi nakinkamalankikanan, akxni kalitachuwinkanaw Dios latamanin, lakaskinaw pi wa kakgaxmatnikgolh Dios chu xTachuwin (1 Cor. 9:16; 2 Cor. 3:5). ¡Lu tlan mamakgkatsininan tamakatsin nema linaw! Kaʼakxilhwi makgapitsi tuku lichuwinalh palakachuwina Joel nema kinkamaxkiyan akgtum takgalhkgalhin chu litliwakga.
2. ¿Tuku kilitlawatkan xlakata xkilhtamaku Jehová lu talakatsuwinita?
2 «Xkilhtamaku Jehová lakatsu wi.» (Joel 1:15.) Maski uma tachuwin atsinu ni akgtutu milh kata tsokgka kgantaxtuma la uku. Tlakg talhuwima taʼakglhuwit kkakilhtamaku, chu niku lichuwinanaw Dios nitlan kinkalichuwinankgoyan latamanin chu ni kgaxmatputunkgo. Uma wamputun pi lamaw xaʼawatiya kilhtamaku (2 Tim. 3:1-5; 2 Ped. 3:3, 4). Xlakata lu lakatsu wi xaʼawatiya kilhtamaku talakaskin pi pulana nawaliyaw kilatamatkan xtamapakgsin Dios (2 Ped. 3:11, 12).
3. Xlakata lu talakatsuwinita lanka talakgaputsit ¿tuku xlakata lu xlakaskinka tlakg nalichuwinanaw xTachuwin Dios?
3 «Jehová akgtum putatsekgni nalitaxtuni xkachikin.» (Joel 3:16.) Uma versículo na kinkawaniyan pi «akgapun chu katiyatni [...] natachikikgo», uma kilhchanima akxni Jehová nakatalakkaxla klanka talakgaputsit. ¡Lu lipaxuwayaw xlakata katsiyaw pi Jehová nakalakgmaxtukgo kskujnin tiku ni makgxtakgkgo! (Rev. 7:9, 14.) Akxni lichuwinanaw xTachuwin Jehová chu akxilhaw la kinkamakgtayayan chu kinkamatliwakglhan tlawa pi tlakg nakgalhiyaw takanajla chu putum tayaniyaw, umakgolh nakinkamakgtayakgoyan xlakata natitaxtuyaw klanka talakgaputsit nema talakatsuwima.
4. ¿Tuku xlakata kilipaxuwatkan chu ni napekwaniyaw kilhtamaku nema aku mima?
4 Maski wi tiku nawan pi xtamakatsinin Joel lu nitlan, uma ni xlikana, xtamakatsinin kinkamaxkiyan takgalhkgalhin xlakata wan pi xkachikin Dios nalakgtaxtu (Joel 2:32). Wa xlakata, ni kapekwaniw kilhtamaku nema mima, lhuwa kalichuwinaw xalakwan xalaksasti xla xTachuwin Dios chu kamakgamakglhtinaw xʼinvitación Joel 2:23, niku wan «Tlan kalimakgkatsitit chu kalipaxuwatit Jehová mi Dioskan».