Artículo nema nakinkamakgtayayan xlakata liwana namasiyayaw
1. ¿La pulaktiy kinkamakgtayayan uma artículo «Akxni natachuwinankgoyan xtatayananin Jehová»?
1 Minit kilhtamaku Makatsinina nema kamaxkiyaw latamanin, limin akgtum artículo nema wanikan «Akxni natachuwinankgoyan xtatayananin Jehová», uma pulaktiy la kinkamakgtayayan: masiya tuku wan Biblia chu nalakgatikgo, kinkamasiyaniyan la nakalitachuwinanaw makgapitsi temas pero ni nakalimakgasitsiyaw (1 Ped. 3:15). Kaʼakxilhwi la tlan nakinkamakgtayayan umakgolh artículos.
2. ¿La tlan namaklakaskinaw uma artículos niku lichuwinanaw Dios?
2 Lu makgtayanan akxni lichuwinanaw Dios. Tlan nawan komo namakiyaw revista Makatsinina niku limin uma artículo. Chu komo wi tiku natachuwinana max lu nalakgati o max tiku makgalhtawakgepat xkinkatlawanin takgalhskinin o xkinkawanin tuku lichuwinan kʼuma artículo, tlan namaxkiyaw o komo nalakaskin tlan natalikgalhtawakgayaw. Pero, komo ni kgalhiya Makatsinina, tlan namaktiya kpágina jw.org.
3. ¿La maklakaskinkgonit makgapitsi artículo nema limin Makatsinina chu tlan kakitaxtuninit?
3 ¿La tlan namaklakaskinaw uma artículos xla Makatsinina? Wilakgolh natalan tiku pixlanka likgalhtawakga tuku wan xtatayana Jehová, chu wani tiku tachuwinama pi kalikgalhtawakgalh tiku tlawa takgalhskinin. Lu tlan kitaxtunit akxni chuna tlawakanit xlakata latamanin ni makgkatsikgo pi kamafuerzajnikan (Deut. 32:2).
4. ¿Tuku tlan nakatsiniyaw kʼuma artículo?
4 Lu kinkamakgtayayan xlakata nakatsiniyaw chu namasiyayaw. Akxni nalikgalhtawakgaya uma artículos, kaʼakxilhti textos xalak Biblia, liʼakxilhtit, chu la kgalhtinan tiku lichuwinan Dios chu chuna la chuwinama. Nachuna kaliskujwi natlawayaw akxni naʼanaw lichuwinanaw Dios (Prov. 1:5; 9:9). Chatum tala puskat wa: «Likgalhtawakgakan umakgolh artículos xtachuna la komo akxilhkan chatum precursor tiku putum katsi la nakgalhtinan».
5. ¿Tuku natlawayaw xlakata namasiyaniyaw la nalichuwinan Dios tiku makgalhtawakgemaw?
5 Umakgolh artículos na tlan nalimaklakaskinaw xlakata nakamakgtayayaw tiku kamakgalhtawakgemaw akxni na nalichuwinankgo Dios. Tlan natalikgalhtawakgakgoyaw chu wa nalitaxtukgo tiku lichuwinan Dios. Umakgolh liʼakxilhtit nakamasiyani la nalichuwinankgo tuku kanajlakgo, pero ni nalimakgasitsi tiku tachuwinama (Col. 4:6). Xlikana uma artículo nema kinkamaxkinitan Jehová, kinkamakgtayayan xlakata liwana natlawayaw xtaskujut (2 Tim. 4:5).