Carta xla Lakgkgolotsin tiku Pulalinkgo xTatayananin Jehová

Kinatalankan xalak chiki tiku kkapaxkiyan:

Lu kpaxuwayaw xlakata kkatsokgnaniman xtsukut uma kata nema lu xlakaskinka. Akxni nina kgalhsputa nawan kata 2014, natakgatsi akgtum siglo akxni kiMapakgsinakan Jesucristo tsukulh mapakgsinan kxlakgstipan xtalatlawananin (Sal. 110:1, 2).

Ktamakxtumit nema tlawaka Watch Tower Bible and Tract Society of Pennsylvania, 5 chu 6 xla octubre kata 2013, Tiku makgtayanankgolh natamatitaxtikan Biblia xaʼingles mastakgolh xasasti Biblia nema liwana xlakputsananikanit chu tlan xkgalhikgolh latamanin. Jehová kamaklakaskilh xkamanan tiku kalilaksaknit espíritu xlakata nakinkamaxkikgoyan Traducción del Nuevo Mundo original (Rom. 8:15, 16). Xlakata chuna tlawaka lu xlakaskinka litaxtulh, ¿nichuna akxilha?

Akglhuwa kata, Comité de Redacción xla Lakgkgolotsin tiku Pulalinkgo xTatayananin Jehová lu xlakaskinka akxilhkgonit namatitaxtikgo kʼatanu tachuwin xTachuwin Dios. La uku Traducción del Nuevo Mundo tamakgpitsi maktuminika o ni xamaktuminika libro, 121 tanu tanu tachuwin. Kkawaniyan pi kalimasiyanitit Jehová pi xlikana lu paxtikatsiniyatit Biblia nema kgalhiyatit. Kalikgalhtawakgatit chu kalilakpuwantit chali chali; uma natlawa pi tlakg nalakgtalakatsuwiya tiku matsokgninalh, Jehová Dios (Sant. 4:8).

Lu nitlan klimakgkatsiyaw tuku nitlan titaxtumakgolh kinatalankan tiku kkapaxkiyaw, chu kkaʼakgatekgsniyaw pi ni la katapaxuwakgo amakgapitsi kinatalankan. Akgtum liʼakxilhtit, akgtum familia xalak Asia lu nitlan tuku lanikgolh, xtsekan kamanan nialh la tatsuwilh xchatuminika. Makuchinanin, ni katsikgolh tuku natlawakgo xpalakata. ¡Uma lu makgalipuwanan! Xchixku talakaskin kuenta natlawa xpuskat tantaku chu tantaskaka, chu xkgawasa chu chatiy xlaktsuman akgtum lu tlan liʼakxilhtit xlakata xatapaxuwan makgtayamakgolh xnatlatnikan. Chuna la uma familia, putum wixin tiku tayanikgonitantit mintaʼakglhuwitkan xatapaxuwan makgkatsiyatit xlakata tayaninitantit tuku titaxtupatit xlakata mintakanajlakan (Sant. 1:2-4). Komo xatalaksakni akinin o ni, Jehová liwana kinkawaniyan pi kilhtamaku nema aku mima nalipaxuwayaw xlakata tayaniw tuku titaxtuw, xlakata Jehová nakinkalisikulunatlawayan latamat nema ni kgalhi lisputni (Sant. 1:12).

Kata nema titaxtulh akxni lakapastakkan akxni tinilh Cristo ankgolh 19,241,252 latamanin. ¡Lu tlan makgkatsiyaw akxni akxilhaw pi lhuwa latamanin maxkimakgolh kakni Jehová chu Jesús xlakata kinkatatamakxtumikgoyan kata akxni lakapastakkan akxni tinilh Cristo kxkachikin Dios! Nachuna lu tlan limakgkatsiyaw xlakata marzo chu abril maxkika kakni kiMalakatsukinakan, liwaka akgtiy millones tiku precursores auxiliares litaxtukgolh. Nachuna, paxuwayaw xlakata tiku precursores auxiliares nawankgo, akxni nakinkalakgapaxialhnanan superintendente de circuito tlan natawilakgo kputum tamakxtumit nema tatlawa xla precursores, tlan naʼankgo maski ni marzo chu abril. Tiku tliwakga wi xtakanajla liwana katsikgo xlakata lu xlakaskinka nalichuwinanaw Dios chu atanu tuku kinkalakgchanan. Wa uma tuku nakinkamakgtayayan xlakata tliwakga natawila kintakanajlakan, uma natlawa pi ni namakgantaxti tuku lakaskin Akgskgawini xlakata naxlajwanan kintakanajlakan chu tanu tiji natiyayaw (1 Cor. 15:58).

Nachuna, lu tlan limakgkatsiyaw xlakata kata nema titaxtulh tamunukgolh 277,344 chu tamakamastanikgolh Dios chu la uku tatekgskgo ktiji niku wilakgolh putum natalan xlikalanka kkatiyatni (Mat. 7:13,14). Uma tiku xalaksasti lakaskinkgo nakamakgtayayaw xlakata “lakatanks natawilakgo kxtakanajlakan” (Col. 2:7). Chuntiya kalamatliwakglhwi xlakata natayaniyaw asta akxni namin lisputni (Mat. 24:13). Biblia kinkawaniyan: «Namakgpuwantinikgoyatit wanti laklatayakgoy [o nitlan makgkatsikgo], chu na namakgtayakgoyatit wa nti xaxlajwananin, paks kapaxuwanalipinikgotit amakgapitsin» (1 Tes. 5:14). Xaʼawatiya, chuntiya kaskiw: «Kamilh mintamapakgsin» (1 Tes. 5:17; Mat. 6:10).

Klakpuwanaw pi lu paxuwayatit xlakata likgalhtawakgapatit Anuario, chu kkawaniyan pi kkapaxkiyan minchatunukan, wixin tiku paxkiyatit Jehová.

Minatalankan,

Lakgkgolotsin tiku Pulalinkgo xTatayananin Jehová