Kalismani sokg nachipina
1. ¿Tukuya lu tlan liʼakxilhtit kinkamaxkiyan Jehová xlakata makgantaxti tuku wan?
1 Jehová putum xkilhtamaku makgantaxti tuku wan. Akgtum liʼakxilhtit, kamakgtaya kskujnin akxni maklakaskinkgo (Heb. 4:16). Nachuna kinkamaxkiyan taway xla takanajla chu «kxkilhtamaku» (Mat. 24:45). Wa xlakata, liwana katsiyaw pi akxni nalimasiya xtasitsi «ni katitamakgapalilh» (Hab. 2:3). ¡Lu tlan kinkakitaxtuniyan xlakata Jehová ni makgapala! (Sal. 70:5.) Pero, xlakata kgalhiyaw talakgalhin chu lhuwa tuku kilitlawatkan, lakgachunin tuwa makgkatsiyaw xkilhtamaku namakgantaxtiyaw. ¿Tuku xlakata kilismanitkan sokg nachanaw?
2. ¿Tuku xlakata malankiyaw Jehová akxni sokg chanaw o makgantaxtiyaw tuku wanaw?
2 Komo xaʼawatiya kilhtamaku lamaw, latamanin xakstukan kapaxkikan, chu ni machokgo tuku nitlan tlawaputun, tunkun tasiya pi niti sokg chan (2 Tim. 3:1-3). Wa xlakata kstalaninanin Cristo akxni sokg chanaw kintaskujutkan, o tuku wanitaw natlawayaw, chu sokg chanaw ktamakxtumit, latamanin akxilhkgo chu uma tlawa pi namalankikgo Jehová (1 Ped. 2:12). ¿Kinkaʼakgspulayan xlakata sokg chanaw kintaskujutkan pero ni sokg tlawayaw o chanaw tuku xla Dios? Sokg chankan ktamakxtumit, akxni nina tsuku takilhtlin chu oración, limasiyayaw pi liwana tlawayaw la kinTlatkan xalak akgapun (1 Cor. 14:33, 40).
3. ¿Tuku xlakata sokg chankan limasiyayaw pi lu tlan kalikatsiniyaw amakgapitsin?
3 Akxni sokg chanaw limasiyayaw pi kapaxkiyaw amakgapitsin (Filip. 2:3,4). Akxni sokg chanaw ktamakxtumit, nachuna akxni tamakxtumiyaw akxni anaw lichuwinanaw Dios, uma natlawa pi natalan tlakg tlan nakgaxmatkgo tuku lichuwinamaka. Nachuna, komo lismaninitaw ni sokg chanaw, max nakamalakpuwaniyaw amakgapitsin pi kinkilhtamakujkan tlakg xlakaskinka. Xlakata sokg chanaw limasiyayaw pi kgalhakgaxmatnanaw, lakskulujwa, chu tlan kinkalipawankanan, uma tayat lu tlan naʼakxilkgo amakgapitsin.
4. Komo tuwa makgkatsiyaw ni sokg chanaw, ¿tuku tlan tlawayaw?
4 Komo putum kilhtamaku ni sokg chipina niku chipimputuna, kakgalhskinka tuku xlakata. Liwana kalakkaxwili minkilhtamaku, xlakata namakgantaxtiya chu xkilhtamaku natlawakgoya mintaskujut (Ecl. 3:1; Filip. 1:10). Kaskini xtamakgtay Jehová (1 Juan 5:14). Xlakata sokg chanaw limasiyayaw pi lu xlakaskinka akxilhaw uma akgtiy Limapakgsin: paxkikan Jehová chu latamanin (Mat. 22:37-39).