Liwana kalimaklakaskinti minkilhtamaku xlakata nalichuwinana Dios
1. ¿Tuku kinkamasiyaniyan xliʼakxilhtit David?
1 Mapakgsina David ni mastalh talakaskin pi xlitaxlajwanilh tuku titaxtulh kxlatamat. Akgtum liʼakxilhtit, akxni xtlawaputun akgtum chiki niku xkakninanika Jehová, ni maxkika talakaskin natlawa. Wa xlakata lakgpalilh tuku xlakpuwanit natlawa chu lakkaxwililh pi wa xkgawasa Salomón xmakgantaxtilh uma taskujut (1 Rey. 8:17-19; 1 Crón. 29:3-9). Ni lilakgaputsalh tuku nila xtlawa, wata tlawalh tuku xmatlani. ¿La nakinkamakgtayayan xliʼakxilhtit David akxni naputsayaw la nalichuwinanaw Dios?
2. ¿Tuku tlan nalakgpaliyaw kkilatamatkan?
2 Katlawa tuku matlaniya. Lhuwa natalan lakkaxwilikgonit nialh lhuwa tuku nakgalhikgo chu tlakg tlan nalichuwinankgo Dios la precursores auxiliares o regulares (Mat. 6:22). ¿Na tlan chuna xtlawa? Katlawani oración Jehová chu liwana kalakpuwanti komo matlaniya; max naʼakxilha pi lakki la akgtum lanka malakcha nema nalinan niku wi lhuwa taskujut. Komo matlaniya chuna katlawa (1 Cor. 16:8, 9).
3. Maski nila naliskujaw la precursores, ¿Tuku tlan natlawayaw xlakata nalichuwinanaw Dios?
3 ¿Pero komo ni matlaniyaw xlakata precursores nalitaxtuyaw? Kalakpuwaw tuku matlaniyaw. Akgtum liʼakxilhtit, komo niku skujaw wilakgolh latamanin tiku ni kgalhikgo kintakanjlakan, kakalitachuwinaw xtachuwin Dios. Komo tatatlaya, tlan nakalitachuwinana Dios makuchinanin o tiku kuentajtlawanankgo. Kalakapastakti pi tiku tatatlakgo tlan namastakgo maski kaj akgkukitsis minutos. Akxni namalakgatsamaya mi informe natsokgwiliya la xlilhuwa kalitachuwinanti latamanin xlakata Dios niku katatanokglhti, chu la xlilhuwa likgalhtawakga masta, maski kaj tratado o invitación xla akxni natalakapastaka akxni tinilh Cristo o xla asamblea regional. Lu kaks nalilakawana la xlilhuwa tuku tlawaya.
4. ¿Tuku lakpuwanitaw natlawayaw?
4 Maski nila precursores litaxtuyaw, kalimaklakaskiw kinkilhtamakujkan nalichuwinanaw xalakwan xalaksasti. Komo chuna natlawayaw tlan nalimakgkatsiyaw xlakata lhuwa lichuwinamaw xlakata xTamapakgsin Dios (Mar. 14:8; Luc. 21:2-4).