La tlakg tlan namakgalhtawakgenanaw
1. ¿Tuku kilitlawatkan putum akinin tiku makgalhtawakgenanaw?
1 Nila tiku kskujni Jehová nalitaxtu, komo ni wa, nalimin (Juan 6:44). Maski chuna, kilimakgtayatkan latamanin xlakata natalakglakatsuwinikgo xTlatkan xalak akgapun (Sant. 4:8). Uma wamputun pi liwana nalakkaxwiliyaw tuku namasiyayaw. Xlakata nakamakgtayayaw pi naʼakgatekgskgo tamakatsin chu nastaka xtakanajlakan, ni kaj watiya nakawaniyaw pi kalikgalhtawakgakgolh párrafos chu kaj nalikgalhtawakgakgo xa takgalhtin.
2. ¿Tuku kilitlawatkan xlakata liwana na makgalhtawakgenanaw?
2 Xlakata liwana namakgalhtawakganankan, tiku lichuwinan Dios xlimakgtayat tiku makgalhtawakgema, wa uma tuku tlan natlawa: 1) naʼakgatekgsa tuku masiya Biblia, 2) nakanajla chu 3) natlawa tuku katsinima (Juan 3:16; 17:3; Sant. 2:26). Xlakata nakatsini, max lhuwa papaʼ natitaxtu, pero talakaskin putum namakgantaxti uma, xlakata tiku kgalhtawakgama tlakg tlan natalalin Jehová chu naskujnaniputun.
3. ¿Tuku takgalhskinin natlawayaw komo lakaskinaw pi liwana namakgalhtawakgenanaw, chu tuku xlakata?
3 ¿Tuku lakpuwan tiku makgalhtawakgepat? Xlakata nakatsiyaw pi akgatekgsma tiku makgalhtawakgemaw chu kanajla tuku masiya Biblia, namaxkiyaw talakaskin kawa tuku lakpuwan, ni putum nawanaw akinin (Sant. 1:19). ¿Akgatekgsa tiku makgalhtawakgepat tuku masiya Biblia xlakata tuku lichuwinampatit? ¿Tlan nawan tuku akgatekgsli pero ni kaj nalikgalhtawakga? ¿Tuku lakpuwan xlakata tuku katsinima? ¿Kanajla pi xlikana tuku wan Biblia chu ni tuwa tuku skin? (1 Tes. 2:13.) ¿Akgatekgsa pi talakaskin nalakgpali la lin xlatamat? (Col. 3:10.) Xlakata nakatsiyaw tuku lakpuwan tiku makgalhtawakgemaw, talakaskin natlawaniyaw takgalhskinin nema liwana lakapastaknitaw chu ni natlawa pi ni tlan nalimakgkatsi, nachuna liwana nakgaxmatniyaw xtakgalhtin (Mat. 16:13-16).
4. ¿Tuku natlawayaw komo tiku makgalhtawakgemaw lu tuwa makgkatsi natlawa o naʼakgatekgsa tuku masiya Biblia?
4 Chuna la lakpuwankgo chu xtalismaninkan latamanin max nalin kilhtamaku nalakgpalikgo tuku wi kxnakujkan (2 Cor. 10:5). ¿Tuku natlawayaw komo tiku makgalhtawakgemaw ni lakapala makgamakglhtinan o ni tlawa tuku katsinima? Talakaskin namaxkiyaw kilhtamaku, xlakata xTachuwin Dios chu xʼespíritu santo natlawa pi nalakgchan kxnaku tiku makgalhtawakgemaw (1 Cor. 3:6, 7; Heb. 4:12). Komo tuwa makgkatsi naʼakgatekgsa o natlawa tuku masiya Biblia, max tlan atanu tema nalitachuwinanaw. Komo ni lakapala na sitsiyaw chu nalimasiyaniyaw tapaxkit akxni kamasiyaniyaw tuku wan Biblia, natitaxtu kilhtamaku ama natlawa pi nalakgpali tuku talakaskin xlakata nalakgpalikgo tuku talakaskin.