Carta xla Lakgkgolotsin tiku Pulalinkgo xTatayananin Jehová

Natalan lakchixkuwin chu lakpuskatin tiku kkapaxkiyan:

«Xaliʼankgalhin kmaxkiyaw mpaxkatsinit Dios xlipaks wixin mimpalakatakan, na xaliʼankgalhin kkamapakuwiyan kkiʼoracionkan. Na ni anan xtamaktat kkalakapastakan [...] xpalakata ntu limalakastukatit mintakanajlakan, chu xpalakata ntu litlawayatit mintapaxkitkan chu lantla ntliwakglh kgalhiyatit ntakgalhkgalhitin xpalakata nkimPuchinakan Jesucristo [kxlakatin Dios, chu na kinTlatkan].» (1 Tes. 1:2, 3.) ¡Uma texto liwana limasiya tuku kmakgkatsiyaw mimpalakatakan! Lu kpaxtikatsiniyaw Jehová xlakata kilamakgtayayaw chu xlakata lu tlan taskujut nema tlawapatit.

Xliputum kata nema titaxtulh lu tlawapatit tuku «limalakastukatit mintakanajlakan» chu «ntu litlawayatit mintapaxkitkan» xpalakata Tamapakgsin. Milhuwakan putsapatit la tlakg nalichuwinanatit Dios. Akgtum liʼakxilhtit, makgapitsi ankgonit niku ni lhuwa anankgo tiku lichuwinankgo xTamapakgsin Dios, max kxpaiskan o kʼatanu país. Amakgapitsi lichuwinankgonit Dios niku lhuwa titaxtukgo latamanin. Chu lhuwa precursor auxiliar wankgolh akxni talakapastakli akxni tinilh Cristo, papaʼ akxni kalakgapaxialhnalh superintendente de circuito o kcampaña nema tatlawalh agosto kata 2014. Kkawaniyan pi lu tlan tlawapatit xlakata xliputum minakujkan liskujnipatit Jehová chuna la matlaniyatit (Col. 3:23, 24). Lu kpaxtikatsiniyaw kiDioskan xlakata tlawapatit tuku «limalakastukatit mintakanajlakan».

Na lu kpaxtikatsiniyaw xlakata «ntu litlawayatit mintapaxkitkan» akxni makgtlawayatit chiki nema litamalakgatumi xtamakatsinin Dios. Xlakata tlakg staktilhama xkachikin Jehová, lu talakaskin umakgolh chiki (Is. 60:22). Katata, takgatsilh 8,201,545 tiku lichuwinankgo Dios chu kamakgalhtawakgeka 9,499,933 akgatunu papaʼ. Xlakata talhuwilh, talakaskin nakamalankikan o nakakaxtlawakan lhuwa sucursales. Wamputun pi na tlakg talakaskin Pukgalhtawakga. Nachuna, klhuwa países talakaskin niku natawilakgo tiku matitaxtikgo kʼatanu tachuwin chu anta natawilakgo niku tachuwinan xtachuwinkan.

Chuna la lichuwinaw, ¿tuku tlan natlawayaw xlakata tlan namakgtayananaw kʼuma taskujut? Max tlan namakgtayananaw kʼuma taskujut. Pero, maski katsiniyaw o ni katsiniyaw makgpatsapsnanaw, kimputumkan tlan nalimakgtayananaw «wantuku laklanka xtapalh kgalhiya[w]» (Prov. 3:9, 10). Akxni nina xtlawakan tabernáculo, israelitas liminkgolh tuku namaklakaskinkan asta tamastalh tamakatsin pi nialh xliminkgolh (Éx. 36:5-7). Liʼakxilhtit xalamakgasa uma lakgchan kinakujkan chu uma tlawa pi nachuna natlawayaw. Natalan tiku kkapaxkiyan, xlakata uma taskujut «litlawakgonit xtapaxkitkan» wa uma tuku lipaxtikatsiniyaw Jehová.

Xlakata la tayanikgo chu ni taxlajwanikgo natalan wa tuku tlan kinkamamakgkatsiniyan. Akgtum liʼakxilhtit lata kata 1950, lakgkgawasan tiku xtatayananin Jehová xalak Corea del Sur katamaknukan kpulachin maski ni lhuwa o lhuwa xlakata ni makgatsankgananiputunkgo Jehová. Lhuwa natalan tayanikgonit chu ni taxlajwanikgonit. Xlakata la tayanikgonit matliwakglha kintakanajlakan.

Anta kʼEritrea, kgalhtutu kinatalankan linkgoya liwaka akgpuxam kata kpulachin. Chu nachuna natalan lakpuskatin chu xkamankan na katamaknukanit kpulachin ni makgas kilhtamaku. Maski lhuwa taliskujnit xlakata nakatamakxtukan pero nila tuku tatlawa. Maski putum tuku titaxtumakgolh kinatalankan chuntiya tayanimakgolh. Ni makgatsankgananikgo Dios asta akxni tlakg katuwa wilakgolh. Akinin kkapalakaskinaw kiʼoracioneskan (Rom. 1:8, 9).

Atsinu ni putum wixin nitu tanupatit kpulachin xlakata mintakanajlakan. Pero max titaxtupatit tajatat, takgolon, max mifamiliajkan ni lakgatikgo mintakanajla, o atanu tuku titaxtupatit nema max niti katsi. Maski chuna chuntiya skujnanipatit Jehová (Sant. 1:12). ¡Lu tlan tlawapatit! Xlakata tayanipatit wa tuku na klipaxtikatsiniyaw Jehová.

Xlikana: xlakata tuku tlawapatit, tapaxkit chu tayaniyatit tlawa pi «kapaxtikatsini[w] Jehová, xlakata xla tlan likatsi» (Sal. 106:1). Lu lhuwa kkapaxkiyan chu akxni ktlawayaw kiʼoracioneskan kskiniyaw Jehová pi kakamatliwakglhni, kakamakgtayan chu kakasikulunatlawan xlakata nalakskujnaniyatit putum kilhtamaku.

Minatalankan,

Lakgkgolotsin tiku Pulalinkgo xTatayananin Jehová