Kaliskujwi xlakata namakgalhtawakgenanaw
1. ¿La tlan nalakgtaxtukgo latamanin?
1 Tuku tatlawalh kata 2014 limasiya pi xkachikin Dios liwana chu xatapaxuwan lichuwinanit xalakwan xalaksasti xla xTamapakgsin Dios (Mat. 24:14). Xlakata lichuwinankan Dios akgatunu chiki, campañas akxni makgpitsikan invitaciones chu niku titaxtukgo lhuwa latamanin, chuna tlan kkaliniyaw lhuwa latamanin tamakatsin nema wi kBiblia. Pero, xlakata tlan nalakgtaxtukgo, talakaskin nakamakgtayayaw xlakata kstalaninanin Jesús nawankgo, nakamasiyaniyaw tuku xaxlikana xalak kBiblia (1 Tim. 2:4).
2. ¿Tukuya takgalhskinin nakinkamakgtayayan xlakata nalakapastakaw pi namalaknuyaw takgalhtawakga xalak Biblia?
2 Kamalaknuw takgalhtawakga xalak Biblia. Komo chatum lataman lakgati tuku wanimaw, ¿lakputsananiyaw xlakata nakinkawaniyan niku wi chu ni lhuwa kilhtamaku titaxtu lakgapaxialhnanaw xlakata namalaknuniyaw akgtum takgalhtawakga xalak Biblia? ¿Makgasata kilhtamaku akxni limasiyaw la tatlawa takgalhtawakga xalak Biblia akxni xlimakgtumku lakgapaxialhnaw? ¿Makgasata kilhtamaku malaknuniw akgtum takgalhtawakga xalak Biblia tiku maxkiyaw revistas? ¿Masiyawa video ¿Tuku xlakata nalikgalhtawakgaya Biblia? chu ¿Tuku tatlawa kʼakgtum takgalhtawakga xalak Biblia? tiku kataskujaw o kataʼanaw escuela, kintalakatsukan, kifamiliajkan o atanu? Akxni lichuwinanaw Dios niku kawilikan likgalhtawakga, ¿liskujaw xlakata nakawaniyaw tiku linkgo maktum likgalhtawakga nema limastayaw takgalhtawakga pi na tlan nakalimakgalhtawakgekan Biblia?
3. ¿Tuku maklakaskinaw xlakata liwana nakamasiyaniyaw tuku xaxlikana amakgapitsin?
3 Xtamakgtay Jehová chu Jesús. Akxni Jesús mastalh limapakgsin pi namakgalhtawakgenanaw, limaklakaskilh tachuwin «kapitit». Chuna limasiyalh, talakaskin pi naliskujaw chu natlawaputunaw. Wa xlakata, ni kaj kiakstukan kinkamakgxtakgni. Wa pi nakinkatatawilayan (Mat. 28:19, 20). Nachuna, Jehová ni kaj watiya kinkamaxkinitan espíritu santo, nachuna tuku maklakaskinaw chu kinkawanikanan la tlan nakamasiyaniyaw tuku xaxlikana amakgapitsin (Zac. 4:6; 2 Cor. 4:7). Tlan naskiniyaw Dios pi kakinkamaxkin litliwakga chu xlakata chuna natlawaputunaw uma xlakaskinka taskujut (Filip. 2:13).
4. ¿Tuku xlakata naliskujaw namakgalhtawakgenanaw?
4 Lichuwinankan xalakwan xalaksasti uma lu kinkamakgapaxuwayan. Pero komo wi tiku namasiyaniyaw tuku xaxlikana chu namakgtayayaw pi nalatama la akinin «[k]tiji wantu an klatamat», tlakg lhuwa nawan kintapaxuwankan (Mat. 7:14; 1 Tes. 2:19, 20). Chu tuku tlakg xlakaskinka, komo wa naliskujaw namakgalhtawakgenanaw, Jehová lu nalipaxuwa, xla «ni chatum lakaskin natsankgay, chi wampi paks kalakgchankgolh nalakgaspittayanikgoy xtalakgalhinkan» (2 Ped. 3:9).