Tlakg kakatsini la nalichuwinana Dios: niku stanankan

Tuku xlakata xlakaskinka. Xlakata atsinu ni putum latamanin lhuwa horas skujkgo akgatunu kilhtamaku, tlakg tlan naliniyaw tamakatsinin xla xTamapakgsin Dios niku skujkgo. Lichuwinankan niku stanankan lu tlan kitaxtu, xlakata putum kilhtamaku katekgsaw latamanin chu nachuna, tiku skujkgo anta tlan kamakgamakglhtinankgo latamanin xlakata lakpuwankgo pi natamawanankgo. Xlakata tlan nakitaxtu akxni chuna tlawayaw, tiku lichuwinankgo Dios talakaskin kuenta natlawakgo chu liwana nalhakganankgo chu natakaxtayakgo (2 Cor. 6:3). Tiku pulalin la lichuwinankan Dios kuenta xlitlawat la xlimakgasni talichuwinan Dios niku stanankan chu tiku chuna tlawakgo.

La natlawayaw:

Kalakkaxwili tuku nawana. Komo lhuwa natachuwinana chatum tiku skujma, max uma natlawa pi nialh katitachuwinamputunkgon alistalh.
Kapit niku stanankan akxni ni lu lhuwa taskujut kgalhikgo, max tlan napina akxni aku matsukimakgo xtaskujutkan.
Pulana katachuwinanti tiku pulalin taskujut chu tlan kalikatsi. Max tlan nawana: «Kaj tsinu kkalakgapaxialhnamaw niku skujkgo latamanin xlakata tlakg kkatekgsaw». Ni lhuwa minutos, kamasta tratado, revista o atanu likgalhtawakga. Tlakg tlan komo ni naskina tumin nema xatapaxuwan tamasta komo nitu kgalhskinpaka tuku litaxokgo tuku tlawayaw, xlakata ni nalakpuwankan pi akinin stananin.
Komo tiku pulalin taskujut tlan likatsi, kawani pi kamaxkin talakaskin xlakata nakatachuwinana tsinu amakgapitsi skujnin. Makgapitsi niku skujkan, max tlan nawan nakgalhskininana komo tlan namakgxtakga likgalhtawakga anta niku jaxkan.
Kuenta katlawa. Akgtum liʼakxilhtit, komo tiku skujma tachuwinama tiku makgtamawanan o wi tuku tlawama, tlakg tlan nawan nakgalhkgalhiyaw asta akxni tlan nakinkamakgamakglhtinanan.

Chuna kalitsakgsa putum papa’:

Akxni nakakninaniya Dios kFamilia kalitsakgsa la tlan nawana komo nalichuwinana Dios niku stanankan.