La tlan nakalakgchanaw kxnakujkan tiku katachuwinamaw
1. ¿La limakgkatsikgolh kstalaninanin tuku Jesús kamasiyanilh?
1 Jesús kalakgchanilh kxnakujkan tiku xkgaxmatnikgo, wa xlakata, Biblia lichuwinan pi xnakujkan «xlakgpasatilha» (Luc. 24:32, TNM). Xlakata nakgalhakgaxmatnanaw talakaskin nataxtuyacha kinakujkan; wa xlakata, ¿la tlan nakamakgtayayaw tiku kgalhtawakgamakgolh xlakata nalakgpalikgo xlatamatkan? (Rom. 6:17.)
2. ¿La kinkamakgtayayan akxni liwana lakapastakaw chu kaʼakgatekgsniyaw xlakata nakalakgchanaw kxnakujkan latamanin?
2 Liwana kalakapastakwi chu kakaʼakgatekgsniw. Atsinu ni putum latamanin ni talakgpalikgo kaj xlakata kawaniyaw tuku tlan chu tuku nitlan. Asta kalikgalhtawakganikan lhuwa versículos nema limasiya pi nitlan tuku kanajlakgo, uma natlawa pi nialh nakgaxmatputun tuku kawanimaw. Xlakata nakamakgtayayaw, pulana talakaskin naʼakgatekgsaw tuku xlakata chuna kanajlakgo chu likatsikgo. Takgalhskinin nema liwana lakapastakkan chu liwana tlawakan natlawa pi nakinkawanikgoyan tuku lakpuwankgo (Prov. 20:5). Akxni chuna natlawayaw tlan nakalikgalhtawakganiyaw versículos xalak Biblia nema nakalakgchan kxnakujkan. Wa xlakata lu xlakaskinka nakalilakgaputsayaw chu ni lakapala nakasitsiniyaw (Prov. 25:15). Kuenta katlawa la stakma xtakanajla xlakata tanu tanu la lakapastakkgo. Talakaskin kilhtamaku xlakata xʼespíritu santo Jehová nalakgpali xtalakapastakni chu la likatsi (Mar. 4:26-29).
3. ¿La nakamakgtayayaw tiku kamakgalhtawakgemaw nakgalhikgo tayat xla kstalaninanin Cristo?
3 Nakamakgtayayaw nakgalhikgo tayat xla kstalaninanin Cristo. Akxni nakatalikgalhtawakgayaw textos xalak Biblia nema lichuwinan xtapaxkit chu la tlan likatsi Jehová namakgtaya xlakata na nakgalhikgo uma lakwan tayat xla kstalaninanin Cristo. Xlakata nakatsi la lu xlakaskinka akxilha Dios, tlan nalikgalhtawakganiyaw Salmos 139:1-4 chu Lucas 12:6, 7. Akxni wi tiku lu paxtikatsini xlakata xtalakgalhaman Jehová tlawa pi nastaka xtapaxkit chu la maxki kakni (Rom. 5:6-8; 1 Juan 4:19). Nachuna, akxni katsini pi chuna la lin xlatamat tlan o nitlan nalimamakgkatsini Jehová, natlawaputun tuku makgapaxuwa chu namalanki Dios (Sal. 78:40, 41; Prov. 23:15).
4. ¿La tlan nalikatsiyaw la Jehová akxni kamasiyaniyaw amakgapitsin tuku xaxlikana?
4 Jehová ni kinkamafuerzaliyan namakgantaxtiyaw xlimapakgsin, wata kinkawaniyan tuku lu tlan kitaxtu tlawakan xtastakyaw (Is. 48:17, 18). Likatsiyaw la Jehová akxni mastayaw talakaskin pi tiku kamakgalhtawakgemaw nalaksakkgo tuku natlawakgo. Komo chuna, tuku nalakgpalikgo kxlatamatkan namakgapala (Rom. 12:2). Uma natlawa, tlakg natalakatsuwinikgo Jehová, tiku «kalakputsanani naku» (Prov. 17:3).