KILATAMATKAN LA KSTALANINANIN CRISTO

**¿Liwana maklakaskimpat Texto nema nalikgalhtawakgayaw chali chali?**

¿Likgalhtawakgaya texto xalak Biblia nema min kfolleto Texto nema nalikgalhtawakgayaw chali chali? Komo ni chuna tlawaya, ¿tlan chuna xtsuku tlawaya? Lhuwa tiku likgalhtawakgakgo tsisa chu tlan lilakpuwankgo uma akxni tlawakgo xtaskujutkan (Jos 1:8; Sl 119:97). ¿La tlakg tlan xlitamakgtaya texto nema lakgchan chali chali? Xlakata liwana na’akgatekgsa texto kalikgalhtawakga tuku talichuwinan xapulana. Kalilakpuwanti pulaktum tuku lichuwinan Biblia chu masiya tastakyaw nema min ktexto. Alistalh, kalilatapa uma tastakyaw. Akxni wi tuku laksakaw chu kilhtiyayaw kxTachuwin Dios, mastayaw talakaskin pi wa kakinkapulalin chu lu litamakgtayayaw (Sl 119:105).

Familia Betel xlikalanka katiyatni likgalhtawakgakgo folleto Texto nema nalikgalhtawakgayaw chali chali akxni wayankgo tsisa. Nina makgas titaxtunit, kJW Broadcasting^® niku wan videos PROGRAMAS XLA TAKANAJLA wilikanit la kakninanikan Dios tsisa. ¿Tuku kilhtamaku akxilhti uma programa? Max wa uma tuku milikgaxmatat. Akgtum li’akxilhtit, kalilakpuwanti la max nakinkamakgtayayan kkilatamatkan tuku titaxtulh Lot.

AKXNI AKXILHNITATA VIDEO NI KAPAXKIW KAKILHTAMAKU (1JN 2:15), KAKGALHTI UMAKGOLH TAKGALHSKININ:

¿Tuku texto maklakaskinka ktakaknin Dios tsisa?
¿La kinkamasiyaniyan xliʼakxilhtit Lot pi lu nitlan kitaxtu paxkikan kakilhtamaku chu tuku wi anta? (Gé 13:12; 14:12; 19:3, 12, 13, 24-26).
¿La limasiyayaw pi paxkiyaw Jehová chu ni wa kakilhtamaku chu tuku anan anta?

Makgapitsi fotos: Chatum tala lilakpuwama tuku likgalhtawakgalh kTexto nema likgalhtawakgakan chali chali: 1) Akxni tala likgalhtawakgama texto xala chali chali, lilakpuwan la ángeles kamakgachipaxtukgo Lot chu xfamilia anta kSodoma; 2) akxni wayama, chuntiya lilakpuwama tuku likgalhtawakgalh tsisa; 3) akxni kgapsma xlhakgat katsisni chuntiya lilakpuwama tuku likgalhtawakgalh — Chuna la titaxtu hora akgtum kilhtamaku, ¿la nalimasiyayaw pi paxkiyaw xTachuwin Jehová?