Ni kapekuani xlisputni uma kakilhtamaku

Nialh makgas tsankga xlakata Jehová namalakgsputu uma kakilhtamaku. Akxni nachin uma kilhtamaku, nixaxlikana takanajla namasputukan, lhuwa kachikinin namasputuputunkgo xkachikin Dios, chu Jehová nakamasputu kʼArmagedón putum latamanin tiku lixkajni likatsikgo. Kimputumkan lu kgalhkgalhimaw akxni nakgantaxtu uma.

Xlikana, lhuwa tuku ni katsiyaw xlakata la nala lhuwa tapatin. Akgtum liʼakxilhtit, ni katsiyaw tuku kilhtamaku natsuku. Nachuna, ni katsiyaw tuku nalikilhankgo mapakgsinanin xlakata nakatalatlawakgo takanajla. ¿La xlilhuwa namakgapala akxni lhuwa kachikinin natalatlawakgo xkachikin Dios chu la natlawakgo? ¿Chu tuku natlawa Jehová xlakata nakamalakgsputu kʼArmagedón tiku nitlan likatsikgo? Ni katsiyaw.

Pero ni kilipekuanitkan tuku aku nala, xlakata Biblia wan putum tuku kilikatsitkan xlakata ni napekuanaw. Akgtum liʼakxilhtit, katsiyaw pi lamaw kxlikgalhsputni xaʼawatiya kilhtamaku (2Ti 3:1). Na katsiyaw pi chuna la nakatalatlawakan takanajla “namaktsuwikan” kaj xlakata ni nalakgsputa xaxlikana takanajla (Mt 24:22). Nachuna, liwana katsiyaw pi Jehová nakalakgmaxtu xkachikin (2Pe 2:9). Chu katsiyaw pi Jehová laksaknit tiku xaʼakgstitum chu kgalhi lhuwa litliwakga xlakata nakamalakgsputu tiku nitlan likatsikgo chu nakalakgmaxtu lhuwa latamanin kʼArmagedón (Ap 19:11, 15, 16).

Akxni nala putum uma, «latamanin nalitakatalakgo kaj xlakata xtapekuakan» (Lu 21:26). Pero akinin ni. Komo nalikgalhtawakgayaw chu nalilakpuwanaw la Jehová kalakgmaxtunit xkachikin xalamakgasa chu tuku kinkamasiyaninitan xlakata tuku aku nala, tlan natlawayaw tuku wan Lucas 21:28: «Tliwakga kawantit chu ni kapekuantit xlakata milakgtaxtutkan talakatsuwinit».