Tuku katsiputunkgo tiku likgalhtawakgakgo

¿Tuku wan Eclesiastés 5:8 kajwatiya kakilhchanima mapakgsinanin o na kilhchanima Jehová?

Eclesiastés 5:8 wi tuku kinkamalakpuwaniyan, xlakata wan: «Komo akxilha pi aktsu kminkachikin katlawanikan tuku nitlan tiku nitu kgalhikgo chu ni tlawakan tuku xaʼakgstitum chu lakatsalakan tuku kalakgchan latamanin, ni kaks kamalakawanin. Xlakata ama tiku kgalhi limapakgsin akxilhma tiku tlakg kgalhi limapakgsin nixawa la xla, chu wilakgolh tiku tlakg kgalhikgo limapakgsin nixawa xlakan».

Chuna la akxilhkgo latamanin, uma versículo liwana kalichuwinan tiku kgalhikgo limapakgsin. Nachuna kinkamasiyaniyan tuku xaxlikana xlakata Jehová nema kinkamakgoxomixiyan chu tlan kinkamamakgkatsiniyan.

Eclesiastés 5:8 lichuwinan chatum mapakgsina tiku katlawanikgo tuku nitlan tiku nitu kgalhikgo chu nitlan kalikatsinikgo. Uma chixku xlilakapastakat pi max wi tiku akxilhma tiku tlakg kgalhi limapakgsin nixawa xla. Chu wilakgolh tiku kgalhikgo tlakg limapakgsin. Lu nitlan pero mapakgsinanin tiku wilakgolh kkatiyatni tlawakgo tuku ni xaʼakgstitum chu latamanin patikgo tuku mapakgsinanin laksakkgo.

Maski lu nitlan wi kakilhtamaku, tlan kinkamamakgkatsiniyan akxni katsiyaw pi Jehová kaʼakxilhma tiku kgalhikgo limapakgsin. Tlan natasaskiniyaw Dios pi kakinkamakgtayan chu namakamaxkiyaw kintakukakan (Sal. 55:22; Filip. 4:6, 7). Katsiyaw pi «xlakgastapu Jehová kuentajtlawama xlikalanka katiyatni xlakata nalimaklakaskin xlitliwakga xlakata nakalimakgtaya tiku xliputum xnaku skujnanikgo» (2 Crón. 16:9).

Tuku lichuwinan Eclesiastés 5:8 kinkamalakapastakayan tuku xaxlikan: pi mapakgsinanin nema wilakgolh kkakilhtamaku ankgalhin wi tiku tlakg kgalhi limapakgsin. Tuku tlakg xlakaskinka, uma versículo kinkamalakapastakayan pi Jehová wa tiku kgalhi putum limapakgsin xlikalanka kakilhtamaku. La uku, xla mapakgsinama chu limaklakaskima xKgawasa, Jesucristo, xMapakgsinana Tamapakgsin. Tiku kgalhi putum litliwakga, tiku putum akxilha, lu xaʼakgstitum, chu xKgawasa nachuna.