Kkachikin Nínive xʼanan lhuwa lakstlan jardines, laklanka edificios chu laklanka bibliotecas.
¿Xkatsiyata?
¿Tuku akgspulalh Nínive?
MAX kkata 670 akxni nina xmin Jesús, Asiria xlitaxtunit tlakg xalanka tamapakgsin kxlikalanka kakilhtamaku. Chuna la wan xpágina internet xla Museo Británico, xmapakgsinan lata kxʼoeste Chipre asta kxʼeste Irán, chu makgapitsi kata mapakgsinalh asta kʼEgipto». Nínive, xcapital, xlitaxtu tlakg xalanka kachikin kxlikalanka kakilhtamaku. Xlitlankan pi xkgalhi lhuwa lakstlan jardines, laklanka edificios chu laklanka bibliotecas. Kxamakgan Nínive, tekgskanit niku talakalhkatawilinit kpatsaps tuku limasiya pi mapakgsina Asurbanipal, xtachuna la amakgapitsi asirios, xʼakstu limapakuwika «xmapakgsina kakilhtamaku». Ama kilhtamaku xtasiya pi nila xkamakgatlajakan, Asiria chu Nínive.
Xtamapakgsin Asiria tlakg xalanka tamapakgsin xlitaxtunit ama kilhtamaku.
Pero akxni Asiria xlitaxtu tlakg xalanka tamapakgsin kxlikalanka kakilhtamaku, palakachuwina Sofonías lichuwinalh tuku xʼama tlawa Jehová: «Namasputu Asiria. Chu natlawa pi niti katilatamalh kNínive, kaskakni nawan chuna la desierto». Nachuna, Nahúm, atanu xpalakachuwina Jehová, wa: «¡Kamakglhtitit xplata! ¡Kamakglhtitit xʼoro! [...] ¡Kkachikin nialhti lama, kaskakni chu malakgsputukanit! [...] Kaxatikawa tiku naʼakxilhan natsalataxtu chu nawan: “¡Nínive malakgsputukanit!”» (Sof. 2:13; Nah. 2:9, 10; 3:7). Akxni kgaxmatkgolh uma tuku wanka pi xʼama la, max latamanin lakpuwankgolh: «¿Xlikana nakgantaxtu? ¿Anan tiku namakgatlaja lanka kachikin Asiria?». Max nila kanajlakgolh.
Nínive xakaskakni litaxtulh chu nialhti tawilalh anta.
Pero kgantaxtulh tuku xlakpuwankan pi nila xʼama kgantaxtu. Max kkata 600 akxni nina xmin Jesús, babilonios chu medos xmakgatlajakgonita Asiria. Titaxtulh kilhtamaku, Nínive akgxtakgwilika chu nialhti lakapastakli. Maktum tuku lichuwinan Museo de Arte Metropolitano de Nueva York lichuwinan pi, «milh kilhtamaku, uma kachikin akgxtakgwilika chu nialhti lakapastakli, chu Nínive kajwatiya xlakgapaskan xlakata tuku lichuwinan Biblia». Chuna la wan Biblical Archaeology Society Online Archive, akxni xtsukuma siglo diecinueve, «niti xkatsi komo uma xlakaskinka xkachikin Asiria xlikana xʼanatit». Pero, kkata 1845, arqueólogo Austen Henry Layard tsukulh kawaxa chu tekgsli kachikin Nínive. Tuku tekgska limasiyalh pi Nínive xlitaxtu akgtum lanka kachikin.
Xlakata liwana kgantaxtulh tuku xwankanit pi xʼama akgspula Nínive uma tlawa pi tlakg nakanajlayaw pi na nakgantaxtu tuku wankanit pi nala xpalakata laklanka tamapakgsin nema wilakgolh la uku (Dan. 2:44; Apoc. 19:15, 19-21).