Tuku kamaxkika laktsu kinchichi

»Xtatayananin Jehová ni kajwatiya tlan xkalikatsinikgo latamanin, nachuna tlan xkalikatsinikgo laktsu kinchichi. Akgtum kilhtamaku chatum puskat tiku wanikan Elaine xlichuwinama Dios kcarrito, chu kamaxkilh galletas laktsu kinchichi. Alistalh, akxni anta xakkatatitaxtu laktsu kinchichi xlakan xtalakatsuwikgo niku xwilakgolh carritos xlakata xkamaxkika galletas.

»Titaxtutilhalh papaʼ. Laktsu kinchichi lu xlipaxuwakgo la xkatawakan galletas, chu akit, chuna la xakkatakgalhchuwinan xtayayananin Jehová. Pero ni lu xakkatalakatsuwiniputun. Liwaka 70 kata xakkgalhi chu ni liwana xakkatsi tuku xkanajlakgo xtatayananin Jehová. Xlakata amakgapitsi takanajla xkimakgalipuwankgonit, xaklakpuwan pi tlakg tlan kiʼakstu xaklikgalhtawakgalh Biblia.

»Lata amacha kilhtamaku tlakg lhuwa xtatayananin Jehová kkaʼakxilhli pi kaxanikawa niku xlichuwinankgo Dios kcarritos kʼuma kachikin. Xlakan na tlan xlikatsikgo. Ankgalhin xlimaklakaskinkgo Biblia xlakata nakgalhtikgo kintakgalhskinin nema xakkatlawani, wa xlakata ktsukulh kalipawan.

»Akgtum kilhtamaku Elaine kinkgalhskilh: “¿Lakpuwana pi animales akgtum xtamaskiwin Dios litaxtukgo?”. Akit kkgalhtilh: “Chuna”. Chu kilikgalhtawakganilh Isaías 11:6-9. Lata uma kilhtamaku putum talakgpalilh, maski nina xaklakpuwanit naklin maktum likgalhtawakga.

»Alistalh makglhuwa lu tlan kkatakgalhchuwinalh Elaine chu xchixku, Brent. Kiwanikgolh pi xlakata xakʼakgatekgsli tuku kilhchanima stalanikan xtatukit Cristo xaklikgalhtawakgalh lata Mateo asta Hechos. Chu chuna ktlawalh. Ni makgas kilhtamaku titaxtulh, kmakgamakglhtinalh takgalhtawakga nema kimalaknunikgolh Brent chu Elaine. Uma chuna lalh akxni xʼitat lama kata 2016.

»Xatapaxuwan xakkgalhkgalhi chuna la xkilimakgalhtawakgekan Biblia akgatunu semana chu tamakxtumit anta kPukgalhtawakga. Lu xaklipaxuwa chu xakpaxtikatsininan xlakata tuku xakkatsinima kBiblia. Max tsinu liwakaya akgtum kata titaxtulh, ktamunulh. La uku kkgalhi 79 kata, chu liwana kkatsi pi ktekgsnit xaxlikana. Jehová kisikulunatlawanit xlakata kmakgtapakgsi kʼakgtum familia xlikalanka katiyatni nema skujnani».