TUKU KATSIPUTUNKGO TIKU LIKGALHTAWAKGAKGO

¿La likatsiyaw pi kaj lakapala akgchipaka Jericó?

Josué 6:10-15, 20 lichuwinan la soldados israelitas akgchipakgolh Jericó. Akgtum kilhtamaku makgtum xtlawankgo kxmakni kachikin, chuna tlawakgolh akgchaxan kilhtamaku. Chu xliʼakgtujun kilhtamaku makgtujun tlawankgolh kxmakni lanka kachikin. Jehová tlawalh pi laklanka xpatsaps Jericó xtalakxpulalh, chuna israelitas akgchipakgolh kachikin. ¿Wi tuku tlan limasiyakan pi xlikana lalh uma tuku lichuwinan Biblia?

Makgasa, akxni soldados xakgchipaputunkgo akgtum lanka kachikin, xmakgstilikgo xmakni kachikin xlakata niti xtsalalh. Komo soldados makgas kilhtamaku xmakgstilikgo, liwat nema xʼanan xchan kilhtamaku ksputa. Akxni soldados xakgchipakgo kachikin, xlinkgo putum tuku xlakaskinkgo, asta xlinkgo liwat. Wa xlakata, arqueólogos kaj tsinu tekgskgonit o nitu tekgskgonit liwat niku xwilakgolh kachikinin xalak palestina nema chuna kaʼakgchipaka. Pero anta niku xwi Jericó lhuwa liwat tekgskanit. Maktum revista xla arqueología, wan pi científicos lhuwa talhtsi tekgskgonit chu niku xmujukan liwat. Uma revista wan pi kachikinin nema chuna kaʼakgchipaka ni xtekgskan talhtsi.

Biblia wan pi soldados xalak Israel ni linkgolh liwat nema xʼanan kJericó, xlakata Jehová chuna kalimapakgsilh (Jos. 6:17, 18). Biblia na lichuwinan pi ama kachikin akgchipakgolh akxni primavera xwanit, akxni putum xmakikanita talhtsi. Wa xlakata lu lhuwa talhtsi xʼanan akxni akgchipakgolh Jericó (Jos. 3:15-17; 5:10). Wa xlakata putum talhtsi nema xmakikanit chu tekgskanit kJericó limasiya pi kaj lakapala akgchipaka, chuna la wan Biblia.