¿Kgalhikgo xtatayananin Jehová limapakgsin akxni lalakgapasma xlakata tamakgaxtokgputunkgo?

Xtatayananin Jehová kkanajlayaw pi tuku masiya Biblia chu tuku limapakgsinan kinkamakgtayayan naklaksakaw tuku Dios lakgati chu tlan nakinkakitaxtuniyan (Isaías 48:17, 18). Ni akinin ktlawanitaw umakgolh tamasiy. Pero, klilatamayaw. Kalichuwinaw makgapitsi tuku makgtanu akxni wi tiku lalakgapasma xlakata tamakgaxtokgputunkgo.a

• Tamakgaxtokgat putum kilhtamaku makgapala (Mateo 19:6). Xtatayananin Jehová klakpuwanaw pi akxni wi tiku tsuku lalakgapasa, wamputun pi natamakgaxtokgkgo. Wa xlakata, lu xlakaskinka kakxilhaw.

• Komo wi tiku aktsujku, ni xlilat nakgalhi xlitatawilat o xtaskin. Kajwatiya tlan natamakgaxtokgkgo tiku «akchanita xkata», uma wamputun, akxni titaxtunita kilhtamaku akxni lu talakgxtumiputun (1 Corintios 7:​36, TNM).

• Talakaskin pi akxni wi tiku nakgalhi xlitatawilat o xtaskin ni naʼanan tuku nalaktlawa pi ni natamakgaxtokga. Maski wi tiku lakxtlawanit xtamakgaxtokgat kxlakatin mapakgsina, kxlakatin Dios ni wamputun pi tlan natamakgaxtokga. Kajwatiya tlan nalakxtlawakan tamakgaxtokgat komo tiku tatamakgaxtokgkanit atanu tiku natatalakgxtumi (Mateo 19:9).

• Kstalaninanin Cristo tiku tamakgaxtokgputunkgo kajwatiya natatamakgaxtokga tiku xtakanajlani (1 Corintios 7:​39). Uma wamputun pi xtatayananin Jehová kajwatiya natsukuyaw lakgapasaw chu natatamakgaxtokgaw atanu xtatayana Jehová tiku na tamununit, ni wa tiku kaj maxki kakni kintakanajlakan (2 Corintios 6:​14). Dios putum kilhtamaku kaskini kskujnin pi kajwatiya natatamakgaxtokgkgo tiku watiya xtakanajlakan kgalhikgo (Génesis 24:3; Malaquías 2:​11). Nachuna, tiku lu katsikgo xlakata uma akxilhkgonit pi uma limapakgsin lu tlan kitaxtu.b

• Kamanan xlikgalhakgaxmatatkan xnatlatnikan (Proverbios 1:8; Colosenses 3:​20). Kamanan tiku akxtum katawilakgo xnatlatnikan na xlikgalhakgaxmatatkan tuku kawanikgo xlakata kgalhikan litatawilat o taskin. Uma na kilhchanima asta tukuya kilhtamaku tlan nakgalhikgo xlitatawilatkan o xtaskinkan chu tuku tlan natlawakgo.

• Biblia wan pi «chatunu nkin, nkinkatapakgsiniyan wa ntu lu[...] kintakukakan» (Gálatas 6:5). Wa xlakata, xtatayananin Jehová tlan nalaksakaw komo wi tiku natsukuyaw lakgapasaw xlakata tatamakgaxtokgputunaw, pero putum kilhtamaku kililakapastakatkan tastakyaw xalak Biblia. Maski chuna, wi tiku lakgskgalalan chu kaskinikgo tastakyaw xtatayananin Jehová tiku tliwakga wi xtakanajlakan chu lakaskinkgo pi tlan kakakitaxtunilh (Proverbios 1:5).

• Akxni latamanin kgalhikgo xlitatawilatkan o xtaskinkan, tlawakgo lhuwa laklanka talakgalhin. Biblia wan pi ni xlitatlawat talakgxtumit nema ni xlilat. Uma ni kajwatiya kilhchanima akxni latatalakgxtumi tiku nina tamakgaxtokgkgo, wata na kilhchanima naxamanikan xlichixku o xlipuskat achatum, natlawakan talakgxtumit niku limaklakaskinkgo xkilhni achatum o kxtan, chu atanu tuku lixkajni (1 Corintios 6:​9-​11). Nachuna, komo chatiy tiku lalakgapasma latsuka chu laxama chuna la natlawa pi natalakgxtumiputunkgo, tlawamakgo tuku lixkajni nema ni lakgati Dios, maski ni natalakgxtumikgo (Gálatas 5:​19-​21). Chu Biblia na wan pi ni xlilat nalichuwinankan tuku lixkajni (Colosenses 3:8).

• Kinakujkan o tuku wi anta, lu akgskgawinan (Jeremías 17:9). Tlan natlawa pi chatum lataman katlawalh tuku katsi pi nitlan. Xlakata xnakujkan ni nakamatlawi tuku nitlan, tiku lalakgapasma talakaskin nikxni xakstukan natawilakgo niku max natlawaputunkgo tuku nitlan. Tiku lalakgapasma tlan ni nakgalhikgo lhuwa taʼakglhuwit komo akxtum kataʼankgo amakgapitsin akxni ankgo paxiʼalhnankgo o wi tiku kataʼan tiku nakakuentajtlawa (Proverbios 28:26). Kstalanina Cristo tiku tamakgaxtokgputun katsi pi lu nitlan kitaxtu putsakan tiku natatamakgaxtokgkan kʼInternet, xlakata lu nitlan kitaxtu natsukuya talalipina tiku kaj tsinu lakgapasa (Salmo 26:4).