Familia an kʼEgipto

JOSÉ ay xtasaputun. Wa xlakata kawaniy putum kskujnin pi kataxtukgolh. Akxni kaj xnatalan katatamakgxtakgli, José tsukulh tasay. Katlawa la akxilhpat la xlakawankgonit xnatalan, xlakata ni katsikgoy tuku xlakata xtasama. Aku kawaniy: Akit José. ¿Lamajku kintlat?

Xnatalan lu tanu lakawankgolh chu nikatsikgoy tuku nawankgoy. Pekuankgonit. Pero José kawaniy: Katlawatit litlan, katalakatsuwitit. Akxni talakatsuwikgolh, kawaniy: Akit mintalakan José wantiku wixin statit kʼEgipto.

José lakwan tachuwin kalixakgatli chu kawani: Ni kalitayatit talekgalhin xlakata kistatit kʼEgipto. Lu xlikana wa Jehová kimakamilh xlakata nakkalakgmaxtuy kristianos. Faraón mapakgsina kintlawanit xlilanka kachikin. Wa xlakata tunkun kalakgpitit kintlat chu kawanitit uma. Chu kawanitit pi kamilh latamay unu.

Chu alistalh José kaʼakglhtampixtiyalh xnatalan chu kalakatsukli xputumkan. Akxni Faraón kgaxmatli pi xminkgonit xnatalan José, waniy: Kalinka putlaw chu kaliminka mintlat chu putum mi familia, chu kaminkgolh unu. Nakkamaxkiy tlakg xatlan tiyat xalak kʼEgipto.

Chuna tlawakgolh. Akxilhpat José akglhtampixtiyama xtlat akxni milh kʼEgipto chu putum xfamilia.

Xfamilia Jacob lu lhuwata xwankgonit. Jacob, xkamanan chu xnatanatni xputumkan 70 xwankgonit akxni ankgolh kʼEgipto. Chu na anta minkgoy xlakpuskatin chu kskujnin nema xkgalhikgoy. Xputumkan tsukukgolh latamakgoy anta kʼEgipto. Kawanika li Israel, xlakata Dios wa xlilakgpalininit xtukuwani Jacob. Chu xkachikin xatalaksakni Dios wankgolh, chuna la naʼakxilhaw alistalh.