Akgtum chiki niku tamastay takaknin

¿PI KATSIYA wix tuku uma chiki? Ni xʼanan atanu chiki la uma, anta niku xkakninanikan Jehová. Xtukuwani tabernáculo. Kachikin tlawakgolh uma akxni xtitaxtunitta akgtum kata akxni taxtukgocha kʼEgipto. ¿Katsiya wix tiku lakpuwa natlawakan?

Wa xtalakapastakni Jehová. Akxni Moisés xwilacha anta ksipi wanikan Sinaí, Jehová wanilh la natlaway. Wanilh pi xtlawalh chuna la ni tuwa xmalakgxtuka. Chuna anu anu tlan xlinka chu anta tlan xmalakgnuparaka. Wa xlakata, akxni li Israel anu anu xʼankgoy anta kxakaskakni tiyat, na xlinkgoy uma chiki.

Komo naʼakxilha aktsu pulaktu niku kgatsputa chiki, naʼakxilha akgtum caja. Uma caja wanikan caja xla talakkaxlan. Kgankgatu kgankgatu xkgalhiy chatum ángel o querubín nema xlitatlawanit oro. Kpakgtiy chiwix Dios tsokgpa Akgkaw Limapakgsin, xlakata Moisés xlakgpakglhnit xapulana. Chu uma chiwix kamakika anta kcaja xla talakkaxlan. Na anta makika xalu niku xtajuma maná. ¿Lakapastakaku tuku uma maná?

Jehová laksakli Aarón xtala Moisés xlakata xapuxku sacerdote nawan. Aarón kapulalin kachikin kxtakaknin Jehová. Chu xkamanan na sacerdotes.

Chu uku kaʼakxilhti apulaktu nema tlakg lanka xla uma chiki. Chu uma apulaktu xlilanka lakomo akgtiy xlakata xaktsu pulaktu. ¿Akxilhpat aktsu caja niku taxtuma jin? Uma anta niku sacerdotes lhkuyokgoy limajinin, uma lu muksun. Na kaʼakxilhti xpuyawakan makgskgot kgalhi pukgantujun xmakgskgot. Chu xliʼakgtutu tuku wi anta unu kxalanka pulaktu, wa akgtum mesa, kxkgalhni putum kilhtamaku wi makkutiy kaxtalanchu.

Kxkilhtin tabernáculo patum xwi chuchut. Sacerdotes lichakganankgoy. Na anta wi niku lhkuyukan animales nema makamastanikan Jehová. Xlimakgstili chiki niku xkakninanikan Jehová anta xwilakgolh xchikkan li Israel nema xlitatlawanit xuwa.