Lanka luwa nema litatlawanit cobre

¿LA XAXLIKANA tasiyay uma lanka luwa nema waka anta unu nak kiwi? Uma lanka luwa nixaxlikana. Litatlawanit cobre. Jehová wanilh Moisés pi talhman kamawakalh kkiwi xlakata kristianos tlan naʼakxilhkgoy chu ni nanikgoy. Pero amakgapitsi luwa nema lamakgolh kkatiyatni tama xaxlikana. Xkakgolh kristianos chu kamatatatlilh. ¿Katsiya wix tuku xlakata?

Xlakata li Israel wanikgonit tuku nitlan Dios chu Moisés. Makglhuwikgoy Moisés chu wanikgoy: ¿Tuku xlakata kinkamaxtu kʼEgipto xlakata unu nakniyaw kxakaskakni tiyat? Unu ni anan taway nipara chuchut. Chu nialh kwaputunaw maná.

Pero wa maná lu xatlan taway. Nilay tamakanajlay chuna la Jehová kamaxkiy maná chu na kamaxki chuchut. Pero kristianos ni tsinu paxtikatsinikgoy la kakuentajtlaway Dios. Wa xlakata Jehová kamalakgachaniy luwa nema kgalhiy veneno xlakata nakamalakgaxokgey li Israel. Chu luwa kaxkay li Israel chu lhuwa kristianos nikgoy.

Kristianos nialh tayanikgoy, lakgminkgolh Moisés chu wanikgoy: Nitlan tuku kwanitaw, xlakata nitlan klichuwinaw Jehová chu wix na kkawaninitan tuku nitlan. Kaskini litlan Jehová xlakata kakamapanulh luwa.

Wa xlakata, Moisés kataskin litlan kachikin. Chu Jehová wani Moisés pi kalitlawalh cobre tantum lanka luwa. Wani pi anta kamawakalh kkgantum kiwi, chu kristianos tiku nakaxkay luwa xliʼaxilhatkan uma lanka luwa. Moisés chuna tlawalh la Dios wani. Chu wantiku kaxkanit luwa ukxilhkgoy lanka luwa nema litatlawanit cobre chu paksparakgoy.

Uma wi tuku kinkamasiyaniyan. Putum akinin chuna lamaw la li Israel tiku xkaxkanit luwa. Akxilha wix pi putum kristianos kgolonkgoy, tatatlakgoy chu nikgoy. Wa xlakata pi xapulana chixku Adán chu xapulana puskat Eva, makgxtakgkgolh xtiji Jehová chu xlakata akinin xkamanan nachuna wilaw. Pero Jehová wiliy akgtum tiji xlakata nakinkalinan klatamat nema nikgalhiy xlisputni.

Jehová makamilh xkgawasa Jesucristo unu kKatiyatni. Jesús xtokgowakaka kkiwi xlakata kristianos xlakpuwankgoy pi nitlan xlikatsiy. Pero Jehová makamastalh xkgawasa Jesús xlakata nakinkalakgmaxtuyan. Komo naʼakxilhstalaniyaw, tlan namakglhtinanaw latamat nema nikgalhiy xlisputni. Pero alistalh tlakg nakatsiyawku xlakata uma.