Chixku tiku tlakg tliwakga

¿KATSIYA wix tuku xtukuwani chixku tiku tlakg tliwakga nema latamalh? Xlakkaxtlawana takglhuwit, xtukuwani Sansón. Wa Jehová maxkiy litliwakga Sansón. Akxni Sansón niaxlakachin, Jehová wanilh xtse: Nialh makgas nakgalhiya aktsu minkgawasa. Wantiku napulalin xlakata nakalakgmaxtuy li Israel kxmakan li Filistea.

Li Filistea lixkajni likatsikgoy chu wilakgolh kCanaán. Lhuwa soldados kgalhikgoy chu katlawaniy tuku nitlan li Israel. Makgtum akxni Sansón alh niku wilakgolh li Filistea, tantum lanka león sitsinit milh paxtokga. Pero Sansón kaj xmakan limakgnilh. Chu na kamakgnilh akglhuwa ciento li Filistea.

Alistalh Sansón lu lakgatilh chatum puskat xtukuwani Dalila. Xalakpuxku li Filistea talakkaxlakgolh Dalila pi chatunu chatunu namaxkikgoy 1,100 tumin xaplata komo nakawaniy tuku xlakata lu tliwakga Sansón. Dalila lakaskin tama tumin. Ni xaxlikana xʼamiga Sansón nipara xaxlikana xʼamiga xkachikin Dios. Wa xlakata xlenkgalhin kgalhskin Sansón tuku xlakata lu tliwakga.

Chalh kilhtamaku akxni Dalila tlawalh pi Sansón kawanilh tuku xlakata lu tliwakga xwanit, wa nema niti axwaniy. Sansón wan: Nikxni akinchukunikan kinchixit, kilhtamaku akxni klakachilh Dios kililaksakli naktlaway akgtum lu xlakaskinka taskujut, akit nazareo. Komo xkinchukunika kinchixit, nakmakgatsputa kilitliwakga.

Chuna akxni Dalila kgaxmatli la wanilh, tlawalh pi kalhtatalh kxfalda. Chu akxni lhtatalh tlawalh pi chatum chixku kaʼakgsitli. Akxni Sansón lakgawa xmakgatsankganita xlitliwakga. Li Filistea tanukgolh chu chipakgolh. Maxtunikgolh akgtiy xlakgastapu, chu kskujnikan tlawakgolh.

Akgtum kilhtamaku li Filistea tlawakgolh akgtum lanka fiesta xlakata nakakninanikgoy xdioskan wanikan Dagón, maxtukgolh anta kpulachin Sansón xlakata nalilitsinkgoy. Xchixit Sansón ay stakniparanita. Chu Sansón waniy aktsu kgawasa tiku makgachipalin: Kakimaxami xatalayaw nema liya chiki. Chu alistalh tlawanilh Dios akgtum oración xlakata namaxkiy litliwakga chu chipalh talayaw. Chu pixlanka wa: Kakimaxki talakaskin akxtum naktanikgoy li Filistea. Wilakgolh 3,000 li Filistea kfiesta nema tatlawama, Sansón xlitliwakga limalakanilh talayaw nema xliya lanka chiki, chu kamakgnilh putum kristianos tiku lixkajni likatsikgoy.