Chatum chixku tiku ni xapekua

KAKAʼAKXILHTI umakgolh kristianos, lilitsimakgolh uma kgawasa. ¿Katsiya wix tiku uma kgawasa? Wa Jeremías, chatum xpalakachuwina Dios.

Nina makgas xtitaxtunit kilhtamaku akxni mapakgsina Josías tsukulh malakgsputuy ídolos kkachikin, Jehová waniy Jeremías pi xpalakachuwina kawa. Pero Jeremías lakpuwan pi kajku kgawasa chu nila katitlawalh uma taskujut. Pero Jehová waniy pi namakgtayay.

Jeremías kawaniy li Israel pi nialh katlawakgolh tuku nitlan. Kawani pi dioses nema kakninanikgoy nixaxlikana. Pero lhuwa li Israel tlakg lakgatikgoy kakninanikgoy ídolos chu ni wa kakninanikgoy Jehová xaxlikana Dios. Kristianos lilitsinkgoy Jeremías akxni kawani pi Dios nakamalakgaxokgey xlakata tuku nitlan tlawamakgolh.

Titaxtulh akglhuwa kata. Josías nilh chu titaxtulh akgtutu papaʼ xkgawasa Jehoiaquim chalh xlimapakgsina. Jeremías chuntiya kawanima kristianos: «Jerusalén namalakgsputukan komo wixin ni namakgxtakgatit tuku nitlan tlawapatit». Sacerdotes chipakgolh Jeremías chu wankgoy: Kanilh Jeremías xlakata lixkajni kinkawanin.

¿Tuku natlaway Jeremías? ¡Xla ni pekuan! Kawani xputumkan: Jehová kimakamilh xlakata nakkamaxkiyan uma tamakatsin wa nema kkawaniman. Komo ni nalakgpaliyatit xalixkajni milatamatkan, xla namalakgsputuy Jerusalén. Pero stalanka kakatsitit uma: Komo nakilamakgniyaw namakgniyatit tiku nitu tlawanit tuku nitlan.

Mapakgsinanin nialh mamakgnininankgolh Jeremías, pero li Israel ni makgxtakgkgoy katuwa tuku nitlan tlawamakgolh. Alistalh milh Nabucodonosor xmapakgsina Babilonia katalachipay Jerusalén. Chu alistalh Nabucodonosor kskujnin katlawalh. Akglhuwa mil kristianos kalilh kBabilonia. ¡Kalakpuwanti la xmakgkatsi komo wintiku ni lakgapasa xlin alakatanu niku ni lakgapasnana!