Jesús masiyanama kʼakgtum sipi

KAʼAKXILHTI Jesús unu wi. Jesús kamasiyanima putum kristianos anta unu ksipi xla Galilea. Wantiku tlakg lakatsu wilakgolh niku wi Jesús wa xtamakgalhtawakgen. Jesús laksaknit kgalhkutiy xlakata xʼapóstoles nawankgoy. Apóstoles wa kstalaninanin Jesús nixtachuna la amakgapitsi xtamakgalhtawakgen. ¿Katsiya wix tuku xtukuwanikan?

Xapulana, Simón Pedro chu xtala Andrés. Jacobo (Santiago) chu Juan linatalan. Atanu apóstol xtukuwani Jacobo (Santiago) chu atanu xtukuwani Simón. Chatiy apóstoles xtukuwanikan Judas. Chatum Judas Iscariote chu achatum Judas nema na xtukuwani Tadeo. Na wilakgolh Felipe, Natanael nema na wanikan (Bartolomé), Mateo chu Tomás.

Akxni kitaspitli kSamaria, Jesús tsukulh lichuwinantapuli xlakata Dios chu xwan: Tamapakgsin xalak akgapun ay talakatsuwinit. ¿Katsiya wix tuku tama tamapakgsin? Tama tamapakgsin wa xaxlikana xtamapakgsin Dios. Jesús wa xmapakgsina. Xpumapakgsin Jesús anta kʼakgapun natawila chu natlaway pi nialh kaʼanalh taʼakglhuwit unu kKatiyatni. Chu uma tamapakgsin xakalipaxaw natlaway Katiyatni.

Jesús kamasiyanima unu kristianos xlakata xtamapakgsin Dios. Jesús kawaniy: Chuna nawanatit akxni natlawayatit mioraciónkan. Tlati wix wantiku wilapi kʼakgapun katamalankilh mintukuwani. Kamilh mintamapakgsin. Kalalh mintalakaskin anta unu kKatiyatni chuna la lamacha anta kʼakgapun. Lhuwa kristianos wanikgoy uma oración Padrenuestro. ¿Tlan wana xatakgatsin uma oración?

Na kamasiyani kristianos la tlan natalalin xtakristiano. Jesús wan: Kakatlawanikgotit amakgapitsin chuna la wixin lakgatiyatit nakatlawanikanatit. ¿Nitlan makgkatsiya akxni wi tiku tlan likatsiniyan? Wa xlakata, akinin tlan nakalikatsiniyaw amakgapitsin. ¡Lu tlan nawan akxni putum tlan nalikatsikgokan anta kxakalipaxaw Katiyatni!, ¿nixlikana?