La kamasiyani Jesús

AKGTUM kilhtamaku Jesús waniy chatum chixku pi xlipaxkit amakgapitsi kristianos. Chu tama chixku kgalhskilh: ¿Tiku kristianos nema kilipaxkit? Bueno, Jesús katsiya tuku lakpuwama uma chixku. Uma chixku lakpuwan pi kaj watiya nakapaxkiy tiku nachuna kgalhiy xcolor o nachuna xtachuwin, tiku nachuna kgalhiy xtakanajla o xtalakatsu. Wa xlakata kaʼakxilhwi tuku wanilh Jesús.

Lakgachunin Jesús limasiyay cuentos. Chu uku kalimasiyani akgtum cuento. Lichuwinama chatum chixku li Judá chu chatum li Samaria. Ay katsinitawa pi lhuwa li Judá nixkakxilhputun li Samaria. Wa uma cuento nema xlichuwinama.

Akgtum kilhtamaku chatum li Judá xtlawama kʼakgtum sipi xʼama kJericó. Pero lipataxtukgolh kgalhananin chu makgalhankgolh xtumin. Chu wilinikgolh atsinu ni makgnikgolh.

Titaxtulh hora anta ktiji titaxtulh chatum sacerdote li Judá. Akxilhli chixku tiku snun xwilinikanit. ¿Tuku wix lakpuwana pi tlawalh uma sacerdote? Kaj xkilhpan tiji titaxtulh chu ni tachokgolh. Chu na titaxtulh achatum kristiano tiku lu lhuwa xkgalhi xtakanajla. Li Leví xwanit. ¿Pi tachokgolh? Ni, nitu tachokgoma chu ni makgtayalh tama chixku. Akxilhpat sacerdote chu li Leví makgat amakgocha anta ktiji.

Pero kaʼakxilhti watiku makgtayama uma chixku lu snun wilinikanit. Uma chixku tiku makgtayanama, li Samaria. Chu makgtayama tiku li Judá. Mawakanima likuchun. Chu lilh anta niku tlan liwana najaxa chu napaksa.

Chu akxni wankgoy uma cuento, Jesús kgalhskilh tama chixku tiku xkgalhskininama: ¿Tiku lakpuwana wix pi limasiyalh pi paxkilh xtakristiano wantiku snun xwilinikanit? ¿Sacerdote, li Leví o li Samaria?

Uma chixku kgalhtinalh: Li Samaria, xla tlan likatsinilh tiku snun xwilinikgonit.

Jesús kgalhtinalh: Xlikana tuku wanti. Kapit chu nachuna katalalipinkgo amakgapitsi chuna la tlawalh li Samaria.

¿Ni lu stlan chuna la xmasiyay Jesús? Akinin lu lhuwa tuku tlan nakatsiyaw xlakata la xmasiyay Jesús, nema tatsokgtawilanit kBiblia, ¿nixlikana?