Anta xlikilhmaktiy kchiki

UKU jueves ay tsiswanit, ay akgtiy kilhtamaku titaxtunit. Jesús chu kgalhkutiy xʼapóstoles minkgonit anta unu kchiki kxakilhmaktiy xlakata nawakgoy taway nema wanikan Pascua. Chu wantiku tasiya kdibujo pi taxtuma xtukuwani Judas Iscariote. Ama kawaniy sacerdotes la natlawakgoy xlakata tlan nachipakgoy Jesús.

Likgotana xkalakganit sacerdotes chu kakgalhaskinilh: ¿Tuku nakilamaxkiyaw komo nakkamakgtayayan xlakata tlan nachipayatit Jesús? Sacerdotes wanikgolh: Puxamakaw tumin xaplata nakkamaxkiyan. Chu uku Judas kalakgama sacerdotes xlakata nakalin niku wi Jesús. ¡Lu lanka nitlan!, ¿nixlikana?

Taway nema wanikan pascua kgatsputli. Pero Jesús matsukima atanu taway nema ni anan xtachuna. Jesús kamaxki maktum kaxtalanchu xʼapóstoles chu kawani: Kawatit uma kaxtalanchu wa nema kilhchanima kintiyatliwa nema nakmakamastay minpalakatakan. Jesús na tiyalh pukgotnu nema xkgalhiy vino chu kawani: Kawatit xlakata wa uma kilhchanima kinkgalhni nema nastajtamakgan minpalakatakan. Biblia waniy uma taway, xtaway kinPuxkukan Jesús.

Li Israel xwakgoy Pascua nema xlilakapastakkgoy akxni xʼángel Dios lakatsalalh xchikkan li Israel anta kʼEgipto pero kamakgnilh xalakpuxkun xlakgkgawasakan li Egipto. Pero uku Jesús lakaskin pi kstalaninanin kalakapastakkgolh pi nakapalakaniy. Wa xlakata xla kawanilh pi nachuna katlawakgolh uma taway kata kata.

Akxni xwakgonitta uma taway nema wanikan Taway xla kinPuxkukan, Jesús kawaniy xʼapóstoles pi ni kapekuankgolh chu lakgtliwakga kawilikgolh xtakanajlakan. Akxni ay kgatsputli, tsukukgolh tlinikgoy Dios chu taxtukgocha. Max liwakay itat tsisni uku. Kaʼakxilhwi niku ankgolh.