Jesús taspitli kʼakgapun

TITAXTULH kilhtamaku chu Jesús makglhuwa katasiyanilh xtamakgalhtawakgen. Akgtum kilhtamaku, max 500 xtamakgalhtawakgen akxilhkgolh. Akxni katasiyanilh Jesús, ¿katsiya tuku kalixakgatlilh? Xlakata xtamapakgsin Dios. Jehová makamilh Jesús kKatiyatni xlakata xkalixakgatlilh kristianos xTamapakgsin. Chu Jesús chuntiya xkalixakgatlima kristianos asta akxni ay xmalakastakwanikanit.

¿Lakapastaka tuku xtamapakgsin Dios? Wa lu xaxlikana xtamapakgsin Dios nema wilacha kʼakgapun chu Dios Laksaknit Jesús xlakata mapakgsina nawan. ¡Chuna la akxilhnitawa, Jesús limasiyalh pi lu tlan mapakgsina nawan akxni natawilayacha xlimapakgsina kʼakgapun, limasiyalh akxni kamawilh wantiku xtsinksnimakgolh, kamapaksalh tiku xtatatlakgoy chu asta kamalakastakwanilh tiku xnikgonitta!

Wa xlakata, akxni namapakgsinanacha kʼakgapun akgtum mil kata, ¿la natawilay Katiyatni? Chuna, xlikalanka Katiyatni xakalipaxaw nawan. Nialh katiʼanalh guerra, nipara tuku nitlan katilatlawanikgoka, nialh katianalh tajatat chu nitiku katinilh. Katsiyaw pi chuna nalay, xlakata Dios tlawalh Katiyatni xlakata putum xakalipaxaw nawan, chuna xlakaskin anta xlatamakgolh kristianos. Wa xlakata tlawalh jardín xaEdén. Jesús natlaway pi nachan kilhtamaku pi kalalh tuku Dios lakaskin.

Chalh kilhtamaku akxni Jesús xʼama taspitparay kʼakgapun. Tipuxum kilhtamaku katasiyanilh xtamakgalhtawakgen chu xlakan katsikgoy pi nitu ninit. Pero akxni ni axʼan, kawaniy xtamakgalhtawakgen: Anta kJerusalén katamakgxtakgtit xlakata namakgamakglhtinanatit espíritu santo. Wa uma xlitliwakga Dios, la un, chu wa uma litliwakga nakamakgtayay xtamakgalhtawakgen Jesús xlakata natlawakgoy xtalakaskin Dios. Chu awatiya Jesús kawani: Wixin nakalixakgatlikgoyatit kimpalakata xlikalanka Katiyatni.

Akxni chuna wankgolh Jesús, wintuku lalh nilay tamakanajla. Xla tsukulh an kʼakgapun chuna la akxilhpat unu kdibujo. Chu alistalh akgtum puklhni matsekgli chu xtamakgalhtawakgen nialh akxilhkgolh. Jesús alh kʼakgapun, anta tsukulh kamapakgsiy kstalaninanin tiku xwilakgolh kKatiyatni.