Latamat kxasasti kakilhtamaku niku naʼanan takaksni
Akxni akxilha dibujo nema wi ktratado, ¿la makgkatsiya? Xlikana pi wix lakaskina takaksni, tapaxuwan chu lu tlan xlatapa chuna la tasiya kdibujo. Pero ¿kaj akgtum tamanixni xlakata wankan pi namin kilhtamaku naʼanan uma tuku xalakglilakgatit?
Lhuwa latamanin max chuna lakpuwankgo. Wantuku lu nitlan lama uku wa umakgolh: guerra, tiku lakatsala limapakgsin, tatsinksni, tajatat, kgolonkan chu umakgolh kaj makgapitsi. Pero, wi tuku xlakata akinin tlan nakgalhiyaw takgalhkgalhin. Biblia wan pi kilhtamaku nema aku mima «likgalhkgalhiyaw xasasti akgapun, chu xasasti tiyat, xtachuna lantla nkinkawaninitan [Dios] mpi namin ntani ntatlawa ntalulokgtat» [o xaʼakgstitum] (2 Pedro 3:13; Isaías 65:17).
Chuna la wan Biblia, uma «xasasti akgapun» chu «xasasti katiyatni» ni kilhchanima akgapun chu Katiyatni tuku akinin akxilhaw. Katiyatni chu akgapun liwana katlawakanit, chu Biblia wan pi xliputum kilhtamaku natawilakgo (Salmo 89:36, 37; 104:5). Tachuwin «xasasti katiyatni» wamputun latamanin tiku xaʼakgstitum nalatamakgo kKatiyatni, chu tachuwin «xasasti akgapun», akgtum xatlan tamapakgsin xalak akgapun nema nakamapakgsi latamanin xalak katiyatni. Pero ¿tlan nakanajlayaw pi natawila «xasasti katiyatni», uma wamputun xalilakgatit xasasti kakilhtamaku?
Wa xlakata, kalakapastakti pi wa uma tuku lu xatlan xlakapastaknit Dios xlakata uma Katiyatni. Jehová wililh xapulana chixku chu xapulana puskat anta kparaíso xwanikan Edén chu kamaxkilh lu xatlan taskujut: «Kakgalhitit lakkamanan chu kalhuwantit chu kamalakgatsamatit katiyatni chu kakuentajtlawatit» (Génesis 1:28). Chuna, Dios xlakaskin pi xkgalhikgolh xkamanankan chu xmalakgatumikgolh paraíso xlikalanka Katiyatni. Xlakan laksakkgolh ni nakgalhakgaxmatkgo Dios chu limasiyakgolh pi ni xkalakgchan nalatamakgo xliputum kilhtamaku, maski chuna ni talakgpalilh tuku xlakapastaknit natlawa Dios. ¡Chu uma nakgantaxtu kxasasti kakilhtamaku! (Isaías 55:11.)
Asta akxni wix tlawaya oración nema wanikan Padrenuestro chu skina pi kamilh xTamapakgsin Dios, wix skimpat pi xtamapakgsin Jehová xalak akgapun kamasputulh tuku nitlan anan kKatiyatni chu kamapakgsinalh kʼuma xasasti kakilhtamaku (Mateo 6:9, 10). Chu tlan nalipawanaw pi Dios nakinkakgalhtiyan uma oración, xlakata xTachuwin wan: «Xalaktankswa, ixlakan nawan ama lipaxaw pulataman nima Dios nakamaxki ixkamanan; kanikxniwa natalatama ana» (Salmo 37:29).
La nalatamakan kxasasti xkakilhtamaku Dios
Wa xTamapakgsin Dios nalimin lhuwa tuku tlan nema nitu xtachuna, chuna namakgantaxti tuku xapulana xlakaskin Dios, pi xkachikin lhuwa tuku xlipaxuwakgolh kKatiyatni. Nialh katianalh tiku ni nalaʼakxilhputun, tiku nitlan lakpuwani achatum chu putum tiku nalatamakgo kKatiyatni lu xlikana tlan nalatalalinkgo. Dios malaknu kBiblia pi “namasputu guerra nak ixlitilanka, katiyatni”. «Ni katilatalatlawakgolh kachikinin chu na nialh katitlawakgolh guerra.» (Salmo 46:9; Isaías 2:4.)
Xaʼawatiya, xakalipaxaw nawan xlikalanka Katiyatni chuna la akgtum jardín. Biblia wan: «Desierto chu niku nitu anan kalipaxaw nawan chu kxakapuskan niku nitu anan kastlan nawan, chu kalilakgatit nawan chuna la xalilakgatit xanat. [...] Xlakata kdesierto nataxtukgo chuchut chu natawilakgo puxkga. Niku lu kachichi xwanit nataʼakgstokgtawilakgo chuchut; chu kxakaskawawa tiyat natawilakgo taxtunu» (Isaías 35:1, 6, 7).
Anta kxakalipaxaw Katiyatni naʼanankgo tuku tlan nalipaxuwayaw. Nialhti katitsinksnilh. Biblia wan: «Hasta jeé katiyatni lhuwa tu namakgalaj» (Salmo 67:6; 72:16). Putum nalipaxuwakgo tuku namakgalakgo, chuna la malaknu kiMalakatsukinakan: «Xlikana pi natlawakgo chiki chu anta natawilakgo chu nachankgo uvas chu nawakgo xtawakat. [...] Ni katichananankgolh chu atanu tiku nawakgo» (Isaías 65:21, 22).
Anta kxasasti xkakilhtamaku Dios nialh akglhuwa familias natawilakgo kʼakgtum chiki chuna la uku wilakgolh kʼedificios chu nialh lixkajni chiki katikgalhikgolh, xlakata Dios wan: «Natlawakgo chiki chu anta natawilakgo [...]. Ni tanu tiku natawila kchiki nema natlawakgo». Biblia na malaknu: «Ni kaj chuntiya katitlakgwankgolh» (Isaías 65:21-23). Wa xlakata latamanin tlan nakakitaxtuni tuku naliskujkgo chu tlan nalimakgkatsikgo. Anta ni katilakgachanikgolh.
Chuna la natitaxtu kilhtamaku, xTamapakgsin Dios natlawa pi animales nitu nalatlawanikgo chu latamanin tlan akxtum natalatamakgo animales chuna la xwanit kjardín xla Edén. Biblia wan: «Lobo chu borrego akxtum nalatamakgo chu nitu katilatlawanilh, chu leopardo akxtum natatamakgo aktsu cabra, chu aktsu toro chu aktsu león chu animal nema liwana wayanit akxtum nalatamakgo; chu chatum aktsu kgawasa nakakuentajtlawakgo» (Isaías 11:6-9; Oseas 2:18).
¡Kalakpuwanti, nak Paraíso nasputa putum tajatat chu tajatat la tiku nila tlawankgo o tanu tuku nitlan kalaninit! Anta kxTachuwin Dios kinkawaniyan: «Ni chatum lataman nawan: “Ktatatla”» (Isaías 33:24). «Na paks naxakanikgo Dios xlakgpixtajatkan; na nialh katianalh linin; chu na nialh katianalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwaj, wa ntu xʼanan xakgasiyaj, paks lakgsputli.» (Apocalipsis 21:4.)
Tuku militlawat xlakata tlan namakglhtinana umakgolh tasikulunalin
Xlikana pi minaku lu lipaxuwalh akxni katsinitilha uma tuku malaknu Dios xlakata latamat kxasasti kakilhtamaku niku naʼanan tuku xaʼakgstitum. Chu maski wi tiku wankgo pi lu lilakgatit takgaxmata ni xlikana nakgantaxtu, pero xapaxkina kiMalakatsukinakan nakinkamaxkiyan (Salmo 145:16; Miqueas 4:4).
Xlikana, xlakata xliputum kilhtamaku nalatamayaw kparaíso nema aku natawila kKatiyatni, wi tuku kilitlawatkan. Jesús lichuwinalh pulaktum tuku tlakg xlakaskinka akxni tlawanilh oración Dios: «Wa cha yuma liwi latamat wantu xaliʼankgalhin, mpi nalakgapaskgoyan wix mintastum [o mi akstu] Dios talulokgtat chu Jesucristo, wanti wix malakgachanita» (Juan 17:3).
Wa xlakata, komo xlikana latamaputunaw kxasasti xkakilhtamaku Dios, pulana kilikatsitkan wantuku xtalakaskin Dios chu alistalh natlawayaw xlakata xlikana pi «Wampi kakatsitit pi wa yuma katuxawat [o kakilhtamaku] anta ni lamaw fuerza nalakgsputa, chu xlipaks wantu kinkamalaknuniyan laklixkajni tatlawa, kaj natitaxtukgoy, wampi wanti tlawamakgo wantuku Dios lakgatiy kxlatamatkan wantu xaliʼankgalhin nalatamakgoy». Akxni chuna natlawayaw, tlan xliputum kilhtamaku nalipaxuwayaw lhuwa tasikulunalin nema nakinkamaxkiyan xapaxkina kiMalakatsukinakan (1 Juan 2:17, Hua Xasasti Talaccaxlan [1999]).
Akxni ni wilikan niku takilhtinit textos xalak Biblia, takilhtikgonit: Hua Xasasti Talaccaxlan, primera versión [1977], (tatsokgni xala uku); Salmos Ixtatlincan ti Talipawan Dios (tatsokgni xala uku). Lhuwa textos xalak Antiguo Testamento takilhtinit kBiblia xaʼespañol: Traduccion del Nuevo Mundo de las Santas Escrituras (con referencias), NM.