Takgalhtawakga 7
La tlan natalakatsuwiniyaw Dios kʼoración
¿Tuku xlakata snun xlakaskinka punchuna natlawayaw oración? (1)
¿Tiku natlawaniyaw kioraciónkan, chu la tlan natlawayaw? (2, 3)
¿Tuku tlan nawanaw akxni natlawayaw oración? (4)
¿Nikuliwaya chu tuku xlakata natlawaya oración? (5, 6)
¿Pi kgaxmata Jiova paks oración? (7)
1. Tlawakan oración wamputun natachiwinana Dios chu akxni tachiwinana ni lanka namakgkatsikana. Punchuna natachiwinanaw Dios. Komo chuna natlawayaw lu kxpaxtun wilaw namakgkatsiyaw lakomo chatum amigo tiku lhuwa paxkiyaw. Maski Jiova lu lanka xlakatsukut chu lhuwa litliwakga kgalhiy, kinkakgaxmatniyan kioraciónkan. ¿Pi punchuna tlawaniya oración Dios? (Salmo 65:2; 1 Tesalonicenses 5:17).
2. Oración na likakninaniyaw Dios. Wa xlakata, kaj watiya Dios Jiova natlawaniyaw oración. Akxni Jesús xlama kKatiyatni, punchuna xtlawaniy oración xTlat, chu nitiku achatum. Akin nachuna kilitlawatkan (Mateo 4:10; 6:9). Akxni natlawayaw oración kxtukuwani Jesús nalilakgtalakatsuwiyaw. Chuna limasiyayaw pi lakgachixkuwiliyaw tuku liwilikanit Jesús chu limasiyayaw pi kanajlaniyaw xtamakamastan xlakata talakgmaxtut (Juan 14:6; 1 Juan 2:1, 2).
3. Akxni xakgatliyaw Dios, nawaniyaw wantuku wi kkinakujkan. Ni watiya watiya nawaniyaw kkioraciónkan nipara kaj nalikgalhtawakgayaw klibro xla oración wantuku nawaniyaw (Mateo 6:7, 8). Tlan natayayaw, natawilayaw, natatsokgostayaw akxni natlawayaw oración pero xatakaknin kilitlawatkan, chu tlan anta niku natlawaputunaw chu na tlan tukuya hora natlawaputunaw. Dios na kgaxmata oración nema kaj xatsekg kkinakujkan taxtuyacha (1 Samuel 1:12, 13). Tlan natlawayaw kioraciónkan anta niku kakaks wi chu niti wi (Marcos 1:35).
4. ¿Tuku tlan nawanaw akxni tlawayaw oración? Tlan natlawaniya oración Jiova xlakata naskiniya tuku namakgtayayan natalakatsuwiniya kxtapaxkit o wantuku max mamakgxtakgniputunan xtapaxkit (Filipenses 4:6, 7). Anta oración xalikxilhtit masiyay pi kiliskinatkan xlakata katamalankilh xtukuwani Jiova chu kakgantaxtulh wantuku wanit natlaway. Natlan naskinaw tuku maklakaskinaw, natlan naskinaw kakinkatapatin kintalakgalhinkan chu kakinkamakgtayan xlakata ni natlawayaw tuku nitlan (Mateo 6:9-13). Akxni tlawayaw kioraciónkan ni naskinaw kaj wa tuku akin lakaskinaw. Kaj wa naskinaw tuku tlan akxilha Dios (1 Juan 5:14).
5. Wix tlan natlawaya oración lata xlimakglhuwa mi naku nalakgatiy namaxkiputun tapaxtikatsinit Dios o nawaniputuna lakswan tachiwin (1 Crónicas 29:10-13; Salmo 106:1). Tlakg natlawaya oración akxni nakgalhiya taʼakglhuwit wantuku namamakgatsankganiputunan mintakanajla (Salmo 55:22; 120:1). Natlan tlawakan oración akxni aku nawayankan (Mateo 14:19). Jiova kinkawaniyan katlawaniw oración «xaliankgalhin» (Efesios 6:18).
6. Snun xlakaskinka natlawayaw oración komo tlawanitaw akgtum xalanka talakgalhin, ni kaj chuna namakgxtakgaw naskiniyaw litlan Jiova kakinkalakgalhaman chu kakinkatapatin. Dios «skgalalh wi, xlakata nakinkatapatiyan» pero kaj akxni nawaniyaw kintalakgalhinkan chu kilitliwakgakan niaj natlawayaw (Salmo 86:5, NM; Proverbios 28:13).
7. Jiova kaj watiya kgaxmata xoraciónkan wantiku xalakatitum lama. Wix snun nalitakgoxiya nalilatapaya la wi xtamapakgsin Jiova chuna Dios nakgaxmata mioración (Proverbios 15:29; 1 Pedro 3:12). Wix ni lanka namakgkatsikana akxni natlawaya mioración (Lucas 18:9-14). Nalilatapaya chuna la wix skina kmioración. Akxni chuna natlawaya oración nalimasiyaya pi kgalhiya takanajla chu xlikana tuku kilhwampat. Komo chuna natlawaya Jiova nakgaxmata mioración (Hebreos 11:6).