¿Tiku ni xʼamigojkan Dios?

Tiku xapuxku ni xʼamigo Dios wa Satanas Diablo. Satanas Diablo wa chatum persona xaspiritu tiku tatlankaninilh Jiova. Tatlankaninimajku Dios, wa xpalakata latamanin kgalhikgoy lulhuwa takglhuwit. Satanas lulixkan xtayat, akgskgawina, chu makgnina (Juan 8:44).

Amakgapitsin persona xaspiritu la Satanas wankgolh chu akxtum tatlankaninikgolh Dios. Anta nak Biblia kawanikan demonio. Xtachuna Satanas, demonio ni xʼamigo kristiano; lakgatikgoy tlawaninankgoy tuku ni xatlan (Mateo 9:32, 33; 12:22). Jiova xlipan namalakgsputukgoy Satanas chu xdemonio. Niaj lhuwa kgalhikgoy kilhtamaku nakatlawanikgoy latamanin tuku ni xatlan (Apocalipsis 12:12).

Chu kon xʼamigo Dios wamputuna, ni militlawat tuku Satanas lakaskin natlawaya. Satanas chu xdemonio lusitsinikgoy Jiova. Ni xʼamigojkan Dios; lakaskinkgoy pi akinin nachuna nawanaw. Wa xpalakata kililaksakatkan tiku makgapaxawaputunaw: wa Satanas o wa Jiova. Kon xlipan latapaputuna mililaksakat natlawaya xtalakaskin Dios. Satanas lhuwa tuku liʼakgskgawinan chu liʼakgtlajaminan. Chuna kaʼakgskgawinita lulhuwa latamanin (Apocalipsis 12:9).